Wulu kɔ nuhua edwɛkɛ ne azo

Wulu kɔ nuninyɛne ne azo

 TILE BULU NEE KO

Ɔzinzale Na Ɔhendɛle

Ɔzinzale Na Ɔhendɛle

1, 2. Duzu gyima ɛsesebɛ a ɛnee ɔwɔ kɛ Yilaegya yɛ a, na ndenle boni mɔ azo a ɛnee ngakyile wɔ ye nee Ehabe avinli a?

YILAEGYA kulo kɛ ɔfa ye nzɛlɛlɛ ɔto ye anwuma Selɛ ne anyunlu wɔ fealera nu. Noko menli dɔɔnwo ne mɔɔ ɛbɔ ɛyia ye la nwunle kɛ ngapezonli ɛhye mɔɔ di nɔhalɛ la manle senle vile anwuma rale la ɛtɛkyɛle, na ɛnee bɛ nuhua dɔɔnwo kpondɛ kɛ bɛkanvo ye bɛmaa ɔ nye die bɛ nwo. Kolaa na Yilaegya ahɔ Kamɛle Boka ne azo na yeava ye nzɛlɛlɛ yeado Gyihova Nyamenle anyunlu wɔ fealera nu la, ɛnee ɔwɔ kɛ ɔyɛ gyima ɛsesebɛ bie. Ɔwɔ kɛ ɔ nee Belemgbunli Ehabe kɔtendɛ.

2 Ngakyile kpole kpalɛ wɔ Ehabe nee Yilaegya avinli. Ehabe mɔɔ wula belemgbunli tɛladeɛ la le anyebolo, yekpɔkye yɛɛ menli kola nyia ɔ nwo zo tumi maa ɔyɛ ninyɛndane a. Yilaegya wula ngapezoma tɛladeɛ mɔɔ ɔnle hyeleenyi—bie a bɛvale nane nwoma anzɛɛ afunlumu anzɛɛ abɔnkye enrinli a bɛnwonle a. Ɛnee ɔlɛ akɛnrasesebɛ, ɔdi nɔhalɛ, yɛɛ ɔlɛ diedi. Kenle ne mɔɔ ɛnee ɔlɛkɔ ye awieleɛ la manle bɛ nuhua ko biala subane lale ali kpalɛ.

3, 4. (a) Duzu ati a kenle ne angɔ boɛ ammaa Ehabe nee Beeyale ɛzonlenlɛma ne ɛ? (b) Kpuyia boni mɔ a yɛbazuzu nwo a?

3 Kenle ne angɔ boɛ ammaa Ehabe nee Beeyale ɛzonlenlɛma ne. Bɛzɛkyele adalɛ ɛzonlenlɛ mɔɔ Ehabe nee ɔ ye, Belemgbunli Raalɛ Gyɛzɛbɛle vale ziele ɛkɛ wɔ Yizilayɛ mbusua-bulu belemgbunlililɛ ne anu la. Bɛkpale Beeyale anwo ɛdanlɛ kɛ ɔle adalɛ. Zɔhane nyamenle ne mɔɔ ngoane ɛnle ye nu la angola ammaa senle mgbane bɔbɔ anzɔ yeanva yeambua ye ngapezoma mɔɔ mogya biale bɛ takaa la nzɛlɛlɛ ne. Beeyale angola anlie mrenya 450 zɔhane anvi ɛhunlɛ mɔɔ ɛnee fɛta bɛ la anu. Eza adalɛ nyamenle ne angola anyɛ debie bieko, na mɔɔ yeangola ye yɛ la ɛlɛba arala ali bɔkɔɔ. Kɛmɔ ɛnee ezule ɛtɛtɔle wɔ ɛvolɛ mɔɔ bo nsa anu la ati, Beeyale ngapezoma ne mɔ zɛlɛle ye kɛ ɔmaa ezule ɛdɔ, noko yeangola. Ɛnee ɔnrɛhyɛ na Gyihova amaa ezule adɔ na yeala ye ali kɛ ɔdaye a ɔle nɔhalɛ Nyamenle ne a.—1 Arl. 16:30–17:1; 18:1-40.

4 Noko, mekɛ boni a Gyihova bali ninyɛne nwo gyima a? Duzu a Yilaegya bayɛ kolaa na mekɛ ne adwu a? Na duzu a yɛbahola yɛazukoa yɛavi nrenya ɛhye mɔɔ lɛ diedi la ɛkɛ a? Bɛmaa yɛzuzu  kɛlɛtokɛ ne anwo na yɛnlea.—Bɛgenga 1 Arelemgbunli 18:41-46.

Ɔhɔle Zo Ɔzɛlɛle

5. Duzu a Yilaegya zele Ehabe kɛ ɔyɛ a, na asoo Ehabe zukoale debie vile mɔɔ ɔhɔle zo wɔ alehyenlɛ ne anu la anu?

5 Yilaegya hɔle Ehabe ɛkɛ na ɔzele ye kɛ: “Kɔli na no, ɔboalekɛ mede nganeɛ mɔɔ kile kɛ ezule ɛlɛba aradɔ a.” Asoo belemgbunli ɛtane ɛhye zukoale debie vile mɔɔ ɔhɔle zo wɔ alehyenlɛ ne anu la anu? Kɛlɛtokɛ ne anga, noko yɛnnwu edwɛkɛ biala mɔɔ kile kɛ ɔnlunle ɔ nwo na ɔzɛlɛle ngapezonli ne kɛ ɔboa ye ɔmaa ɔzɛlɛ ɛtanefakyɛ ɔvi Gyihova ɛkɛ a. Ehabe anyɛ, emomu ‘ɔhɔle kɛ ɔkali debie.’ (1 Arl. 18:41, 42) Na Yilaegya noko ɛ?

6, 7. Duzu a Yilaegya yɛle nwolɛ nzɛlɛlɛ a, na duzu ati ɔ?

6 “Yilaegya vole hɔle Kamɛle Boka ne azo, ɔkponle ɔ nwo na ɔvale ɔ ti ɔzianle ɔ gyakɛ avinli.” Ehabe hɔle kɛ ɔkali aleɛ la, Yilaegya nyianle adenle vale ye nzɛlɛlɛ dole ye anwuma Selɛ ne anyunlu. Yɛ kɛzi bɛhanle ye mɛlɛbɛnwoaze ne anwo edwɛkɛ wɔ ɛke la nzonlɛ—Yilaegya hotole na ɔkponle ɔ nwo mɔɔ asɛɛ ɔ nyunlu ɛbikye ɔ gyakɛ kpɔkɛ. Duzu a ɛnee ɔlɛyɛ a? Ɔngyia kɛ yɛbabɔ yɛ ati anu yɛaha. Baebolo ne ka kile yɛ wɔ Gyemise 5:18 kɛ,  Yilaegya zɛlɛle bieko manle ezule dɔle. Ɔbayɛ kɛ nzɛlɛlɛ ɛhye a ɛnee ɔlɛyɛ wɔ Kamɛle Boka ne azo la.

Yilaegya nzɛlɛlɛ ne lale kɛzi ɔkulo kɛ Nyamenle ɛhulolɛdeɛ yɛ ɛkɛ la ali

7 Gyihova lumuale hanle kɛ: “Mebamaa ezule adɔ.” (1 Arl. 18:1) Ɛhye ati Yilaegya zɛlɛle kɛ Gyihova ɛhulolɛdeɛ ɛyɛ ɛkɛ kɛmɔ Gyisɛse hilele ye ɛdoavolɛ ne mɔ wɔ ɛvolɛ kɛyɛ apenle ko anzi kɛ bɛyɛ la.—Mat. 6:9, 10.

8. Duzu a Yilaegya neazo ne maa yɛnwu ye wɔ nzɛlɛlɛ nwo a?

8 Yilaegya neazo ne kile yɛ ninyɛne dɔɔnwo wɔ nzɛlɛlɛ nwo. Debie mɔɔ ɛnee hyia Yilaegya kpalɛ la a le Nyamenle ɛhulolɛdeɛ mɔɔ ɔbara nu la. Yɛlɛyɛ nzɛlɛlɛ a ɔle kpalɛ kɛ yɛbahakye kɛ: “Saa yɛdua [Nyamenle] ɛhulolɛ zo yɛbiza ye debie biala a ɔtie yɛ.” (1 Dwɔn 5:14) Ɔda ali kɛ ɔwɔ kɛ yɛnwu Nyamenle ɛhulolɛdeɛ amaa yeadie yɛ nzɛlɛlɛ—ɛhye ati a ɔwɔ kɛ yɛsukoa Baebolo ne dahuu la. Nɔhalɛ nu, kɛmɔ ɛnee menli ne kɔsɔɔti mɔɔ wɔ Yilaegya sua zo la ɛlɛnwu amaneɛ la ati, ɛnee ɔkpondɛ kɛ ezule ne tɔ. Ɔbayɛ kɛ mekɛ mɔɔ ɔnwunle nwanwane ninyɛne mɔɔ Gyihova ɛyɛ wɔ kenle zɔhane la, ɔvile ahonle nu ɔyɛle Gyihova mo. Yɛdayɛ noko yɛkpondɛ kɛ yɛfi ahonle nu yɛyɛ Gyihova mo wɔ yɛ nzɛlɛlɛ nu na yɛkile kɛ yɛdwenle awie mɔ anwo.—Bɛgenga 2 Kɔlentema 1:11; Felepaema 4:6.

Ɔnyianle Anwodozo Na Ɔzinzale

9. Duzu a Yilaegya zele ye sonvolɛ ne kɛ ɔyɛ a, na subane nwiɔ boni a yɛbazuzu nwo a?

9 Yilaegya nyianle anwodozo kɛ Gyihova bamaa ezule adɔ, noko ɛnee ɔnze mekɛ mɔɔ Gyihova bayɛ ɛhye a. Yemɔti duzu a ngapezonli ne yɛle wɔ zɔhane mekɛ ne anu a? Yɛ mɔɔ kɛlɛtokɛ ne hanle la nzonlɛ: “Ɔzele ye sonvolɛ ne kɛ, ‘Kɔ ɛ nyunlu na to ɛ nye nyevile nu.’ Sonvolɛ ne hɔle na ɔrahanle kɛ, ‘Mennwu debie wɔ nehane.’ Yilaegya zele ye kɛ, ‘Kɔ zɔhane fane nsuu.’” (1 Arl. 18:43) Yilaegya neazo ne maa yɛnwu ɛzukoalɛdeɛ nwiɔ bie. Mɔɔ lumua la, yɛ anwodozo mɔɔ ngapezonli ne nyianle la nzonlɛ. Akee suzu kɛzi ɔzinzale la anwo.

Yilaegya kpondɛle sɛkɛlɛneɛ mɔɔ ɔkile kɛ ɔnrɛhyɛ Gyihova bamaa ezule adɔ la

10, 11. (a) Adenle boni azo a Yilaegya lale anwodozo mɔɔ ɔlɛ wɔ Gyihova ɛwɔkɛ ne anu la ali ɛ? (b) Duzu ati a ɔwɔ kɛ yɛnyia anwodozo ko ne ala ɛ?

10 Ɔluakɛ Yilaegya nyianle Gyihova ɛwɔkɛ ne anu anwodozo la ati, ɔkpondɛle sɛkɛlɛneɛ mɔɔ ɔbahile kɛ ɔnrɛhyɛ Gyihova bamaa ezule adɔ la. Ɔzoanle ye sonvolɛ ne kɛ ɔhɔgyinla ɛleka mɔɔ wɔ anwuma kpalɛ la ɔnlea saa ɔbanwu debie mɔɔ kile kɛ ezule ne  ɛlɛba aradɔ la a. Ye sonvolɛ ne ziale rahanle arɛlebɔlɛ edwɛkɛ ɛhye: “Mennwu debie wɔ nehane.” Ɛnee maanle nu le wienyi yɛɛ ɔda ali kɛ ezule ne ɛtɛmunlanle. Ɛyɛle debie ngakyile bie nzonlɛ ɔ? Kakye kɛ ɛnee ɔtɛkyɛle biala a Yilaegya hanle hilele Belemgbunli Ehabe kɛ: “Mede nganeɛ mɔɔ kile kɛ ezule ɛlɛba aradɔ a.” Duzu ati a ngapezonli ne hanle edwɛkɛ ɛhye wɔ mekɛ mɔɔ ezule ne ɛtɛmunlanle la ɛ?

11 Ɛnee Yilaegya ze ɛwɔkɛ mɔɔ Gyihova ɛbɔ la. Kɛ Gyihova ngapezonli nee ɔ gyakɛ anu gyinlavolɛ la, ɔnyianle anwodozo kɛ Nyamenle bali Ye edwɛkɛ zo. Ɛnee Yilaegya anwodozo ne anu yɛ se, yemɔti ɔdele nganeɛ kɛ ezule ne ɛlɛtɔ bɔbɔ. Ɛhye maa yɛkakye edwɛkɛ mɔɔ Baebolo ne hanle wɔ Mosisi anwo la: “Ɔgyinlanle kpundii kɛ sonla mɔɔ ɛnwu Nyamenle ne mɔɔ bɛnnwu ye la.” Asoo zɔhane a ɛdie Nyamenle ɛdi a? Ɔmaa yɛ ninyɛne dɔɔnwo mɔɔ yɛbahola yɛagyinla zo yɛanyia ɔ nee ye ɛwɔkɛ ne mɔ anu diedi la.—Hib. 11:1, 27.

12. Kɛzi Yilaegya lale ye ali kɛ ɔlɛsinza ɛ, na kɛzi ɔyɛle ye nyɛleɛ wɔ amungu ekyi ne mɔɔ ɔdele nwolɛ edwɛkɛ la anwo ɛ?

12 Eza yɛ kɛzi Yilaegya zinzale la nzonlɛ. Ɔzoanle ye sonvolɛ ne bieko, tɛ ko anzɛɛ fane nwiɔ, emomu fane nsuu! Nea kɛzi gyima ɛhye mɔɔ sonvolɛ ne yɛle la bamaa yeavɛ a, noko Yilaegya ammaa ɔ sa nu ando na ɛnee yebɔ kpɔkɛ kɛ ɔkpondɛ sɛkɛlɛneɛ. Na sonvolɛ ne hɔle mɔɔ tɔ zolɛ fane nsuu ne la, ɔrahanle ɔhilele Yilaegya kɛ: “Menwu amungu ekyi bie mɔɔ ye kpole le kɛ sonla sa taakɛ la kɛ ɔlɛmaa ɔ nwo zo wɔ nyevile nu lɔ.” Ɛbahola wɔayɛ sonvolɛ ne mɔɔ yedɛlɛ ɔ sa nu na ɔlɛfa ɔ sa taakɛ ne yeazuzu amungu ne mɔɔ ɔlɛmaa ɔ nwo zo wɔ Nyevile Kpole ne anu la anwo nvoninli ɔ? Bie a sonvolɛ ne adwenle yɛle ye kɛ amungu ekyi ne ɛnrɛhola ɛnrɛyɛ ɛhwee. Noko ɛnee ɔle debie titile ɔmaa Yilaegya. Yilaegya zele ye sonvolɛ ne kɛ: “Ka ɛ nwo kɔze Belemgbunli Ehabe kɛ, ɔziezie ye konle ehwili ne mɔɔ ɔtɛnla nu la na ɔmaa ɔ nwo ɛyɛ ndɛ ɔhɔ sua nu na anrɛɛ ezule kɛbo ye.”—1 Arl. 18:44.

13, 14. (a) Kɛ ɔkɛyɛ na yɛazukoa kɛzi Yilaegya zinzale la ɛ? (b) Duzu a maa yɛnwu kɛ ɔwɔ kɛ yɛyɛ ninyɛne ndɛndɛ a?

13 Yilaegya yɛle neazo bieko manle yɛ. Yɛdayɛ noko yɛde mekɛ mɔɔ ɔnrɛhyɛ na Nyamenle ali ninyɛne nwo gyima yeamaa ye bodane ara nu la anu. Yilaegya hendɛle manle ezule ne dɔle; Nyamenle azonvolɛ mɔɔ wɔ ɛkɛ ɛnɛ la ɛlɛkendɛ mekɛ mɔɔ ewiade ɛtane ɛhye bahɔ ye awieleɛ la. (1 Dwɔn 2:17) Kɔkpula kɛ Gyihova Nyamenle bali ninyɛne nwo gyima la, ɔhyia kɛ yɛsinza dahuu kɛmɔ Yilaegya yɛle la. Nyamenle Ara ne, Gyisɛse, dule ye ɛdoavolɛma folɛ kɛ: “Yemɔti bɛzinza, ɔboalekɛ bɛnze kenle mɔɔ bɛ Awulae ne kɛra la.” (Mat. 24:42) Asoo ɛnee Gyisɛse ɛlɛkile kɛ ye ɛdoavolɛma ne  ɛnrɛnwu mɔɔ bazi kolaa na awieleɛ ne ara la ɔ? Kyɛkyɛ, ɔluakɛ ɔhanle ninyɛne mɔɔ basisi kolaa na awieleɛ ne ara la anwo edwɛkɛ dɔɔnwo. Yɛ muala yɛbahola yɛanwu sɛkɛlɛneɛ mɔɔ kile kɛ “ewiade ɛhye ɛlɛba awieleɛ la.”—Bɛgenga Mateyu 24:3-7.

Amungu ekyi ne manle Yilaegya nyianle anwodozo kɛ ɔnrɛhyɛ na Gyihova amaa ezule adɔ. Awieleɛ mekɛ ne anwo sɛkɛlɛneɛ ne maa yɛnwu kɛ ɔwɔ kɛ yɛyɛ yɛ ninyɛne ndɛndɛ

14 Sɛkɛlɛneɛ ne foa biala maa yɛnyia daselɛ mɔɔ di munli mɔɔ tumi wɔ nu. Asoo daselɛ ɛhye mɔ ala baboa amaa yɛayɛ yɛ ninyɛne ndɛndɛ wɔ yɛ ɛzonlenlɛ mɔɔ yɛfa yɛmaa Gyihova la anu ɔ? Amungu ekyi ne manle Yilaegya nyianle anwodozo kɛ ɔnrɛhyɛ na Gyihova amaa ezule adɔ. Asoo bɛyele ngapezonli ne mɔɔ di nɔhalɛ la arɛle bɛdole ɔ sa nu?

Gyihova Manle Bɛ Nwo Dɔle Bɛ Na Ɔyilale Bɛ

15, 16. Duzu ninyɛne a sisile ndɛndɛ a, na duzu a ɛnee Yilaegya anye la kɛ Ehabe bayɛ a?

15 Kɛlɛtokɛ ne ka kile yɛ kɛ: “Yeangyɛ biala yɛɛ maanle nu munlanle na eza ɔbɔle ɔ bo kɛ ɔtu anwoma a. Ezule ne dɔle kpole kpalɛ. Ehabe hanle ye ehwili ne hɔle Gyɛzɛlii nehane.” (1 Arl. 18:45) Ninyɛne sisile ndɛndɛ. Mɔɔ ɛnee Yilaegya sonvolɛ ne ɛlɛka ngapezonli ne nrɛlaleɛ ne ahile Ehabe la, amungu ekyi ne yɛle dɔɔnwo na ɔmanle maanle nu yɛle awozinli. Anwoma kpole bie dule. Awieleɛ kolaa ne, wɔ ɛvolɛ nsa siane nsia anzi, ezule ne dɔle wɔ Yizilayɛ. Azɛlɛ ne mɔɔ ɛnee ɛyɛ resee la nyianle nzule. Kɛmɔ ezule ne dɔle kpole la ati, azule Kaehyɔn ne yile na ɔwowole Beeyale ngapezoma mɔɔ bɛhunle bɛ la mogya ne. Ɛhye manle Yizilayɛma mɔɔ ɛde atua la nyianle adenle yele Beeyale ɛzonlenlɛ vile ɛkɛ na bɛnyianle ɛtanefakyɛ.

“Ezule ne dɔle kpole kpalɛ”

16 Zɔhane ala a ɛnee Yilaegya anye la kɛ ɔbayɛ a! Bie a ɛnee ɔlɛdwenle kɛzi Ehabe bayɛ ye nyɛleɛ wɔ ninyɛne mɔɔ ɛnee ɛlɛkɔ zo la anwo. Asoo Ehabe banlu ɔ nwo na yeahwe ɔ nwo yeavi Beeyale ɛzonlenlɛ mɔɔ ɛkpɔlɔ la anwo? Mɔɔ hɔle zo kenle ko ne la manle ɔnyianle ninyɛne dɔɔnwo mɔɔ ɔbagyinla zo yeayɛ nzenzaleɛ a. Nɔhalɛ nu, yɛnrɛhola yɛnrɛnwu debie mɔɔ ɛnee Ehabe ɛlɛdwenle nwo a. Kɛlɛtokɛ ne ka kile yɛ sikalɛ kɛ belemgbunli ne “hanle ye ehwili ne hɔle Gyɛzɛlii nehane.” Asoo ɔzukoale debie ɔvile mɔɔ zile la anu? Asoo ɔzile kpɔkɛ kɛ ɔbahakyi ye adwenle? Edwɛkɛ mɔɔ sisile nzinlii la hilele kɛ yeanyɛ zɔ. Noko ɛnee kenle ne ɛtɛkɔle awieleɛ ɛtɛmanle Ehabe nee Yilaegya.

17, 18. (a) Yilaegya lua Gyɛzɛlii adenle ne azo la, duzu a zile a? (b) Duzu a yɛ nwanwane wɔ kɛzi Yilaegya nriandile vile Kamɛle hɔle Gyɛzɛlii la anwo a? (Eza nea ɔ bo ɛkɛ edwɛkɛ ne.)

 17 Gyihova ngapezonli ne vale adenle mɔɔ Ehabe noko vale zo la azo. Ɛnee adenle ne wale, maanle nu ɛyɛ awozinli, na adenle ne anu ɛyɛ mɛtɛlɛmɛtɛlɛ. Noko edwɛkɛ fofolɛ bieko zile.

18 “Mekɛ ne anu ɛnee [Gyihova] Sunsum ne gyi Yilaegya anwo, yemɔti ɔbɛzale na ɔnriandile ɔlumuale Ehabe anyunlu ɔhɔle Gyɛzɛlii.” (1 Arl. 18:46) Ɔda ali kɛ ɛnee ‘Gyihova sunsum ne’ wɔ Yilaegya anwo zo wɔ nwanwane adenle zo. Ɔvi ɛleka mɔɔ ɔwɔ mɔɔ ɔkɔ Gyɛzɛlii la le mayɛlɛ 19, na ɛnee Yilaegya ɛyɛ kpanyinli. * Pɛ kɛzi ngapezonli ne hwehwenle ye tɛladeɛ tendenle ne hɔle anwuma, na ɔkyekyele amaa ɔ nwo ayɛ ndɛ na yeanriandi yeava adenle ne mɔɔ zolɛ ɛyɛ mɛtɛlɛmɛtɛlɛ azo la anwo nvoninli nea—ɔnriandile ɛsesebɛ ɔhɔdole belemgbunli ne konle ehwile ne na ɔzenle ɔ nwo ɔhɔle teatea!

19. (a) Ngapezo boni mɔ a anwosesebɛ mɔɔ Nyamenle vale manle Yilaegya la maa yɛkakye a? (b) Mekɛ mɔɔ Yilaegya ɛlɛnriandi ahɔ Gyɛzɛlii la, duzu a ɔnwunle ye wienyi a?

19 Nea kɛzi ɛhye bayɛ nyilalɛ amaa Yilaegya a! Bie a anwosesebɛ mɔɔ ɔnyianle, mɔɔ ɔbayɛ kɛ yeanyia bie ɛlɛ wɔ ye mgbavolɛ nu la manle ɔ nye liele kpole. Ɛhye maa yɛkakye ngapezo ne mɔ mɔɔ kile kɛ nɔhavoma banyia kpɔkɛdelɛ mɔɔ di munli nee anwosesebɛ wɔ azɛlɛ ye azo Paladaese ne anu la. (Bɛgenga Ayezaya 35:6; Luku 23:43) Mekɛ mɔɔ Yilaegya lua adenle ne mɔɔ zolɛ ɛyɛ mɛtɛlɛmɛtɛlɛ anu la, ɔnwunle ye wienyi kɛ ɔ Ze Gyihova, nɔhalɛ Nyamenle ne, anye ɛlie ɔ nwo!

20. Duzu a yɛyɛ a Gyihova bayila yɛ a?

20 Gyihova lɛ ɛhulolɛ kɛ ɔbayila yɛ. Bɛmaa yɛyɛ ninyɛne mɔɔ ɔbamaa yeayila yɛ la; mɔdenle biala mɔɔ yɛbabɔ la fɛta. Kɛmɔ Yilaegya yɛle la, ɔhyia kɛ yɛsinza, na yɛneɛnlea daselɛ mɔɔ kile kɛ ɔnrɛhyɛ na Gyihova ali ninyɛne nwo gyima ndɛndɛ wɔ mekɛ ɛtane ɛhye anu la anu. Yɛlɛ daselɛ dɔɔnwo mɔɔ maa yɛnyia anwodozo bɔkɔɔ wɔ Gyihova, “nɔhavo Nyamenle” ne anu kɛmɔ Yilaegya yɛle la.—Edw. 31:5.

^ ɛden. 18 Ɛhye anzi, Gyihova manle Yilaegya tetele Yilaehya mɔɔ nzinlii bɛhanle kɛ “yemɔ yɛɛ anrɛɛ boa Yilaegya wɔ ye gyima ne ɛyɛlɛ nu” la. (2 Arl. 3:11) Yilaehya yɛle Yilaegya sonvolɛ, na ɔda ali kɛ ɔboale nrenya kpanyinli ne.