Wulu kɔ nuhua edwɛkɛ ne azo

Wulu kɔ nuninyɛne ne azo

Mukenye

Mukenye

‘Bɛzukoa menli mɔɔ bɛlua bɛ diedi nee abotane zo bɛnyia mɔɔ Nyamenle ɛva ɛbɔ ɛwɔkɛ la.’—HIBULUMA 6:12.

1, 2. Kɛzi neavolɛ adenduvo ko nwunle Baebolo nu menli mɔɔ bɛdi nɔhalɛ la ɛ, na kɛzi menli ɛhye mɔ bayɛ agɔnwolɛma kpalɛ ɛ?

“ƆKA Baebolo nu menli ne anwo edwɛkɛ kɛ asɛɛ bɛle ɔ gɔnwo mɔ dɛba.” Keleseɛnenli raalɛ bie edwɛkɛ mɔɔ ɔhanle wɔ mekɛ mɔɔ ɔdiele neavolɛ adenduvo kpanyinli bie ɛdendɛlɛ ɔwiele la ɛne. Adiema raalɛ ne edwɛkɛ ne le nɔhalɛ, ɔluakɛ adiema nrenya ne ɛva ɛvolɛ dɔɔnwo ɛzukoa Nyamenle Edwɛkɛ ne na ɔfa ɔkilehile—saa ɔka Baebolo ne anu menli ne bie anwo edwɛkɛ a ɔle kɛ asɛɛ amgba ɔlɛka ɔ gɔnwo mɔ dɛba bie anwo edwɛkɛ.

2 Ɔle kpalɛ kɛ yɛbanyia Baebolo ne anu menli dɔɔnwo ɛhye mɔ kɛ yɛ gɔnwo mɔ. Asoo zɔhane a ɛnwu bɛ a? Nea kɛzi ɛnyia mekɛ kɛ ɛnee Nowa, Ebileham, Wulutu, Yilaegya, nee Ɛseta dua nwo na ɛ nee bɛ tendɛ kɛ ɛkulo kɛ ɛnwu bɛ a ɛbade nganeɛ a. Nea kɛzi bɛ subane baha wɔ ɛbɛlabɔlɛ a—bɛ folɛdulɛ mɔɔ sonle bolɛ nee anwosesebɛ mɔɔ bie a bɛbava bɛamaa wɔ la!—Bɛgenga Mrɛlɛbulɛ 13:20.

3. (a) Kɛzi Baebolo nu menli mɔɔ bɛlɛ diedi mɔɔ yɛbazukoa bɛ nwo debie la bahola aboa yɛ ɛ? (b) Kpuyia boni mɔ a yɛbazuzu nwo a?

3 Nɔhalɛ nu, wɔ mekɛ mɔɔ “kpalɛyɛlɛma badwazo ara ngoane nu” la, zɔhane agɔnwolɛvalɛ ne bara nu bɔkɔɔ. (Gyi. 24:15) Kɛkala bɔbɔ, Baebolo nu menli mɔɔ bɛlɛ diedi mɔɔ yɛbazukoa bɛ nwo debie la bahola aboa yɛ. Adenle boni azo? Ɛzoanvolɛ Pɔɔlo maa yɛ mualɛ mɔɔ ɔfɛta: ‘Bɛzukoa menli mɔɔ bɛlua bɛ diedi nee abotane zo bɛnyia mɔɔ Nyamenle ɛva ɛbɔ ɛwɔkɛ la.’ (Hib. 6:12) Mekɛ mɔɔ yɛlɛbɔ ɔ bo yɛazukoa mrenya nee mraalɛ mɔɔ bɛlɛ diedi anwo debie la, bɛmaa yɛzuzu kpuyia bie mɔ mɔɔ Pɔɔlo edwɛkɛ ne maa ɔba yɛ adwenle nu la anwo: Diedi a le duzu, na duzu ati a yɛhyia nwo a? Kɛ ɔkɛyɛ na yɛazukoa nɔhavoma mɔɔ dɛnlanle aze wɔ tete ne la ɛ?

Diedi—Mɔɔ Ɔkile Nee Deɛmɔti Yɛhyia Nwo La

4. Kɛzi menli adwenle yɛ bɛ wɔ diedi nwo ɛ, na duzu ati a bɛvo a?

4 Diedi le subane kɛnlɛma mɔɔ nvasoɛ wɔ zo, subane mɔɔ mrenya nee mraalɛ mɔɔ yɛbazukoa bɛ nwo debie wɔ buluku ɛhye anu la bule ye kɛ ɔsonle bolɛ kpalɛ la. Menli dɔɔnwo mɔɔ bɛwɔ ɛkɛ ɛnɛ la ɛnde mɔɔ diedi kile la abo kpalɛ, bɛ adwenle kile bɛ kɛ ɛdie debie wɔali mɔɔ ɛnlɛ ngyinlazo anzɛɛ daselɛ kpalɛ biala. Bɛvo kpole. Nɔhalɛ diedi ɛmbɛlɛbɛla; ɔnle nganeɛdelɛ ala; ɔtɛla debie mɔɔ  ɛdie wɔali ala. Diedi mɔɔ ɔnlɛ ngyinlazo la le esiane. Nganeɛdelɛ ta kakyi, yɛɛ wɔ Nyamenle anwo, diedi angome ɛnli munli, ɔluakɛ “mbɔnsam noko die di, na ɛzulolɛ maa bɛ nwo wozo bɛ.”—Gye. 2:19.

5, 6. (a) Ninyɛne nwiɔ mɔɔ yɛnnwu bɛ la boni a yɛ diedi ne gyi zo a? (b) Kɛzi ɔwɔ kɛ yɛ diedi ne anu yɛ se ɛ? Maa neazo.

5 Nɔhalɛ diedi tɛla mɛlɛbɛla anzɛɛ diedi ala. Kakye kɛzi Baebolo ne hanle nwolɛ edwɛkɛ la. (Bɛgenga Hibuluma 11:1.) Pɔɔlo hanle kɛ diedi gyi ninyɛne nwiɔ mɔɔ yɛnva yɛ nye yɛnnwu bɛ la azo. Ko a le kɛ ɔgyi nɔhalɛ edwɛkɛ mɔɔ ɛlɛsisi mɔɔ “ɛnyelɛ ɛnnwu bɛ” la azo. Yɛngola yɛnva yɛ nye yɛnnwu ninyɛne mɔɔ wɔ anwuma—mɔɔ le kɛ Gyihova Nyamenle, ɔ Ra ne, anzɛɛ Belemgbunlililɛ ne mɔɔ kɛkala ɔlɛdi tumi wɔ anwuma la. Mɔɔ tɔ zo nwiɔ, diedi gyi “ninyɛne mɔɔ yɛ nye la zolɛ”—ninyɛne mɔɔ ɔtɛsisile la azo. Yɛnrɛhola yɛnrɛnwu ewiade fofolɛ ne mɔɔ Nyamenle Belemgbunlililɛ ne bava ara kenlensa ye la kɛkala. Asoo ɛhye kile kɛ ninyɛne mɔɔ ɛlɛsisi nee mɔɔ yɛ nye la zo la ɛngyi kpɔkɛ zo?

6 Ɔnle zɔ fee! Pɔɔlo hilehilele nu kɛ nɔhalɛ diedi gyi adiabo kpalɛ zo. Mekɛ mɔɔ ɔhanle kɛ diedi a le ninyɛne mɔɔ “bɛwɔ ɛkɛ” la, ɔvale edwɛkɛ mɔɔ eza ɔ bo kile “mɛla adenle zo kɛlata mɔɔ kile kɛ debie le awie ɛdeɛ” la ɔlile gyima. Fa ye kɛ awie se ɔkyɛ wɔ sua. Bie a ɔbava nwolɛ kɛlata ne yeamaa wɔ na yeaha kɛ, “Wɔ sua fofolɛ ne ɛne.” Ɛhye ɛngile kɛ ɛbadɛnla kɛlata sinli zɔhane azo; mɔɔ ɔkpondɛ yeahile la a le kɛ wɔ mɛla adenle zo, debie biala mɔɔ wɔ kɛlata ne azo la kile kɛ sua ne le wɔ ɛdeɛ, yemɔti saa ɛ sa ka kɛlata ne a ɔle kɛ ɛ sa ɛha sua ne ala la. Zɔhane ala a debie mɔɔ maa yɛnyia diedi la anu yɛ se kpalɛ mɔɔ ɔti yɛkola yɛfa yɛto yɛ diedi mumua ne anwo a.

7. Duzu a boka nɔhalɛ diedi nwo a?

7 Ɛhye ati, ninyɛne mɔɔ ɛsisi ɛlɛ la maa yɛnyia Gyihova Nyamenle anu nɔhalɛ diedi mɔɔ gyi pi. Diedi maa yɛnwu kɛ yɛ Ze kulo yɛ na yɛdie yɛdi kɛ ye ɛwɔkɛ ne mɔ amuala bara nu. Noko dɔɔnwo boka nɔhalɛ diedi nwo. Ɔle kɛ tease abɔdeɛ la, ɔwɔ kɛ yɛmaa ye aleɛ na yeanwu. Ɔwɔ kɛ yɛfa yɛyɛ gyima, tɛ ye zɔ a ɔbawu.—Gye. 2:26.

8. Duzu ati a diedi hyia kpalɛ ɛ?

8 Duzu ati a diedi hyia kpalɛ ɛ? Pɔɔlo vale mualɛ mɔɔ maa anwosesebɛ la manle. (Bɛgenga Hibuluma 11:6.) Saa yɛnlɛ diedi a yɛnrɛhola yɛnrɛbikye Gyihova anzɛɛ yɛnrɛzɔ ɔ nye. Ɛhye ati yɛhyia diedi amaa yɛahola yɛadwu bodane kpole mɔɔ yɛlɛ kɛ abɔdeɛ mɔɔ ze nrɛlɛbɛ la anwo: kɛ yɛbahwe yɛabikye yɛ anwuma Selɛ Gyihova na yɛawula ye anyunlunyia.

9. Kɛzi Gyihova ɛmaa yela ali kɛ ɔze kɛ yɛhyia diedi ɛ?

9 Gyihova ze kɛzi yɛhyia diedi la, yemɔti yemaa yɛ neazo dɔɔnwo mɔɔ maa yɛnwu kɛzi yɛnyia diedi na yɛda ye ali la. Ɔyila  Keleseɛne asafo ne ɔmaa bɛnyia mrenya nɔhavoma mɔɔ bɛdi yɛ nyunlu bɛyɛ neazo bɛmaa yɛ. Ye Edwɛkɛ ne ka kɛ: “Bɛzukoa bɛ diedi ne.” (Hib. 13:7) Eza yemaa yɛ ninyɛne dɔɔnwo. Pɔɔlo hɛlɛle “dasevolɛma pemgbenleamgbe,” mrenya nee mraalɛ mɔɔ dɛnlanle aze wɔ tete ne mɔɔ bɛyɛle diedi nwo neazo kɛnlɛma la anwo edwɛkɛ. (Hib. 12:1) Tɛ nɔhavoma ne mɔ amuala a Pɔɔlo hanle bɛ nwo edwɛkɛ wɔ Hibuluma tile 11 a. Mrenya nee mraalɛ, ngakula nee mgbanyinli mɔɔ asolo biala tɛnlabelɛ mɔɔ bɛvale diedi bɛbɔle bɛ ɛbɛla mɔɔ bɛbahilehile yɛ ninyɛne dɔɔnwo la anwo nɔhalɛ edwɛkɛ wɔ Baebolo ne anu.

Kɛ Ɔkɛyɛ Na Yɛazukoa Awie Mɔ Diedi Ɛ?

10. Kɛzi yɛ ti anwo debiezukoalɛ baboa yɛ yeamaa yɛazukoa nɔhavoma mɔɔ bɛwɔ Baebolo ne anu la ɛ?

10 Ɛnrɛhola ɛnrɛzukoa awie kyesɛ ɛdumua ɛgua ɛ nye aze ɛnea ye. Mekɛ mɔɔ ɛlɛkenga buluku ɛhye la, ɛbanwu kɛ bɛyɛle neɛnleanu dɔɔnwo amaa yeaboa wɔ yeamaa wɔanwu mrenya nee mraalɛ ɛhye mɔɔ bɛlɛ diedi la. Duzu ati a ɛnzukoa na ɛnyɛ neɛnleanu ne bie ɛmboka nwo ɛ? Wɔ ɛ ti anwo debiezukoalɛ nu, dua ninyɛne mɔɔ bɛfa bɛyɛ neɛnleanu mɔɔ ɛlɛ bie la azo sukoa Baebolo ne kpalɛ. Mekɛ mɔɔ ɛlɛdwenledwenle mɔɔ ɛlɛsukoa la anwo la, bɔ mɔdenle yɛ ɛleka mɔɔ edwɛkɛ ne zile la nee Baebolo nu menli ne anwo nvoninli. Bɔ mɔdenle kɛ ɛbanwu ɛleka mɔɔ ɛnee bɛwɔ, ɛbade dede ne nee evuanlɛ ne, kɛmɔ yɛbaha la. Mɔɔ hyia kpalɛ la, bɔ mɔdenle kɛ ɛbanwu kɛzi menli ne dele nganeɛ la. Mekɛ mɔɔ ɛlɛte zɔhane mrenya nee mraalɛ nɔhavoma ne edwɛkɛ bo la, ɛbanwu bɛ kpalɛ—bie mɔ bɔbɔ bayɛ kɛ ɛ gɔnwo mɔ dɛba la.

11, 12. (a) Kɛ ɔkɛyɛ na wɔayɛ kɛ Ebilam nee Sɛleeyae ɛ? (b) Kɛzi Hana, Yilaegya, anzɛɛ Samoɛle neazo ne baboa wɔ ɛ?

11 Saa ɛnwu bɛ kpalɛ a, ɛbahulo kɛ ɛbazukoa bɛ. Kɛ neazo la, fa ye kɛ ɛlɛdwenle- dwenle gyima fofolɛ bie anwo. Bie a Gyihova ahyehyɛdeɛ ne ɛdo ɛsalɛ ɛvɛlɛ wɔ kɛ ɛhɔdɛlɛ wɔ ɛzonlenlɛ gyima ne anu wɔ adenle bie azo. Bie a bɛse ɛhɔ azɛlɛsinli mɔɔ bɛhyia nolobɔlɛma anwo ndɛndɛ la anu, anzɛɛ bie a ɔwɔ kɛ ɛsɔ daselɛlilɛ ne foa bie mɔɔ ɛtɛyɛle bie ɛlɛ la ɛnea. Mekɛ mɔɔ ɛlɛdwenle gyima ne anwo na ɛlɛyɛ nwolɛ asɔne la, asoo Ebilam neazo ne mɔɔ ɛbadwenle nwolɛ la baboa wɔ? Ɔ nee Sɛleeyae vile bɛ ɛhulolɛ nu bɛkpole Yule asetɛnla kpalɛ ne na ɛhye manle bɛnyianle nyilalɛ. Saa ɛdi bɛ neazo ne anzi a, ɛbanwu kɛ wɔnwu bɛ kpalɛ wɔdɛla kɛzi ɛnee ɛze bɛ la.

12 Bieko, saa awie mɔɔ bikye wɔ la kile wɔ nyane ɔmaa ɛ sa nu to—bie a ɛte nganeɛ kɛ ɛnrɛhɔ debiezukoalɛ bieko noko ɛ? Saa ɛdwenledwenle Hana neazo ne nee kɛzi yeammaa Pɛnena ngyegyelɛ ne anvo ɔ nwo zo la anwo a, ɔbaboa wɔ yeamaa wɔazi kpɔkɛ  kpalɛ—na ɔbamaa Hana arayɛ kɛ ɛ gɔnwo kpalɛ. Saa ɛte nganeɛ kɛ ɛnfɛta la ati ɛ sa nu ɛdo a, ɛbahola wɔade nganeɛ kɛ Yilaegya wɔ mekɛ mɔɔ ninyɛne gyegyele ye nee kɛzi Gyihova kyekyele ɔ rɛle la. Ngakula mɔɔ bɛ gɔnwo mɔ sukuluma fa ɛbɛlatane nwo edwɛkɛ gyegye bɛ la noko bahola ayɛ kɛ Samoɛle wɔ mekɛ mɔɔ bɛbazukoa kɛzi ɔlile Yilae amra mrenya ne mɔ ɛbɛlatane ne anwo gyima wɔ ndanlɛ sua ne anu la.

13. Asoo Baebolo nu menli mɔɔ ɛbazukoa bɛ diedi la kile kɛ wɔ diedi ɛdeɛ ne ɛnli munli ɔ? Kilehile nu.

13 Asoo Baebolo nu menli mɔɔ ɛbazukoa bɛ diedi la kile kɛ wɔ diedi ɛdeɛ ne ɛnli munli ɔ? Ɔnle zɔ fee! Kakye kɛ Gyihova Edwɛkɛ ne maa yɛ anwosesebɛ kɛ yɛzukoa menli mɔɔ bɛlɛ diedi la. (1 Kɔl. 4:16; 11:1; 2 Tɛs. 3:7, 9) Debie bieko a le kɛ menli mɔɔ yɛbazukoa bɛ nwo debie wɔ buluku ɛhye anu la mumua ne zukoale menli mɔɔ ɛnee li bɛ nyunlu la. Kɛ neazo la, yɛbanwu ye wɔ buluku ɛhye Tile 17 ne anu kɛ wɔ Mɛle ɛdendɛlɛ nu, ɔvale Hana edwɛkɛ ne bie ɔhanle, ɔda ali kɛ ɔnwunle kɛ ɔle neazo ɔmaa ye. Asoo ɛhye kile kɛ ɛnee Mɛle diedi ne anu ɛmmia? Kyɛkyɛ! Emomu, Hana neazo ne boale Mɛle ɔmanle ɔnyianle diedi amaa ɔdaye noko yeanyia duma kpalɛ wɔ Gyihova Nyamenle anyunlu.

14, 15. Ninyɛne boni mɔ a wɔ buluku ɛhye anu a, na kɛzi yɛbava yɛali gyima kpalɛ ɛ?

14 Bɛyɛ buluku ɛhye amaa yeaboa wɔ yeamaa wɔ diedi nu amia. Adile ne mɔ mɔɔ doɔdoa zo la bie vi edwɛkɛtile “Sukoa Bɛ Diedi” mɔɔ rale wɔ Nrelenza Ɛzinzalɛ Arane ɔvi 2008 kɔdwu 2013 la anu. Noko akee, bɛva ninyɛne fofolɛ bie mɔ bɛboka nwo. Bɛva kpuyia mɔɔ baboa yɛ amaa yɛanwu kɛzi yɛbava edwɛkɛ ne yɛali gyima la bɛboka nwo. Bɛva nvoninli ngɛnlɛma mɔɔ nuhua la ɛkɛ la bɛboka buluku ɛhye anwo, yɛɛ bɛyɛ mɔɔ wɔ nu dɛba la mgbole. Ninyɛne ngakyile dɔɔnwo mɔɔ bie a le mekɛ mɔɔ deɛ ne zile nee ɛleka mɔɔ ɔzile la wɔ nu. Bɛyɛ Sukoa Bɛ Diedi ne bɛmaa abusua, asafo nee bɛ ti anwo debiezukoalɛ. Mbusua dɔɔnwo anye balie nwo kɛ bɛbabɔ nu bɛagenga ye kpole.

15 Ɔrɛla ye kɛ buluku ɛhye baboa wɔ yeamaa wɔazukoa Gyihova azonvolɛ nɔhavoma mɔɔ dɛnlanle aze wɔ tete ne la. Maa ɔboa wɔ ɔmaa wɔ diedi nu ɛmia wɔ mekɛ mɔɔ ɛlɛbikye wɔ anwuma Selɛ, Gyihova la!