Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 14

Belemgbunlililɛ Mɔɔ Bali Tumi Wɔ Ewiade Amuala

Belemgbunlililɛ Mɔɔ Bali Tumi Wɔ Ewiade Amuala

Ɛbahola wɔahile Belemgbunlililɛ mɔɔ yɛlɛka nwolɛ edwɛkɛ la ɔ?— Nyamenle Belemgbunlililɛ ne ɔ, Belemgbunlililɛ ne mɔɔ bamaa azɛlɛ ye ayɛ paladaese la. Ɛkulo kɛ ɛsukoa Belemgbunlililɛ ɛhye anwo debie dɔɔnwo ɔ?—

Belemgbunlililɛ biala lɛ ye belemgbunli. Na belemgbunli ne di ye menli ne azo tumi. Ɛze Nyamenle Belemgbunlililɛ ne azo Belemgbunli ne ɔ?​— Yemɔ a le Gyisɛse Kelaese. Ɔwɔ anwuma. Ɔnrɛhyɛ ɔbayɛ awie biala mɔɔ wɔ azɛlɛ ye azo la Belemgbunli! Ɛnea a Gyisɛse yɛ ewiade amuala Belemgbunli a yɛ nye balie ɔ?—

Duzu a ɛ nye la ye ade wɔ Paladaese a?

Yɛ nye balie kpole kpalɛ! Wɔ Paladaese, menli ɛnrɛho anzɛɛ bɛnrɛhɔ konle bieko. Awie biala bahulo ɔ gɔnwo. Awie anwo ɛnrɛdo ye anzɛɛ ɔnrɛwu. Anyezinlirama banwu debie, anzodilirama bade edwɛkɛ, na menli mɔɔ bɛngola tia la bɛahola anriandi na bɛawuluwulu. Awie biala banyia aleɛ dɔɔnwo ali. Nane ngakyile bali nwɔhoa na bɛava yɛ agɔnwolɛ. Menli mɔɔ bɛwu la bɛazia ara ngoane nu. Mrenya nee mraalɛ dɔɔnwo mɔɔ wɔzukoa bɛ nwo debie wɔ brohyua ɛhye anu mɔɔ le kɛ Relɛbɛka, Releehabe, Devidi yɛɛ Yilaegya la noko  bazia ara ngoane nu! Ɛkulo kɛ bɛsia bɛba a ɛ nee bɛ yia ɔ?—

Gyihova kulo wɔ na ɔkulo kɛ ɛ nye die. Saa ɛkɔ zo ɛsukoa Gyihova anwo debie na ɛtie ye a, ɛbahola wɔadɛnla aze dahuu wɔ paladaese kɛnlɛma bie anu! Ɛkulo ye zɔ ɔ?—