Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 8

Dwosaya Nyianle Agɔnwolɛma Kpalɛ

Dwosaya Nyianle Agɔnwolɛma Kpalɛ

Ɛnea a ɔyɛ se kɛ ɛbayɛ mɔɔ le kpalɛ ɔ?— Menli dɔɔnwo dwenle kɛ ɔyɛ se. Baebolo ne ka kɛ ɛnee ɔyɛ se kpalɛ ɔmaa kakula bie mɔɔ bɛfɛlɛ ye Dwosaya la kɛ ɔbayɛ mɔɔ le kpalɛ la. Noko ɔnyianle agɔnwolɛma kpalɛ mɔɔ boale ye la. Maa yɛzukoa Dwosaya nee ɔ gɔnwo mɔ anwo debie dɔɔnwo.

Dwosaya papa a le Emɔn, mɔɔ ɛnee le Dwuda belemgbunli la. Emɔn yɛle ɛtane na ɔzonlenle awozonle. Mekɛ mɔɔ Dwosaya papa wule la, bɛziele Dwosaya belemgbunli wɔ Dwuda. Noko ɛnee yeli ɛvolɛ mɔtwɛ ala! Ɛnea a ɔyɛle ɛtane kɛ ye papa la ɔ?— Kyɛkyɛ, yeanyɛ zɔ!

Zɛfanaya bɔle menli ne kɔkɔ kɛ bɛmmasonle awozonle

Mekɛ bɔbɔ mɔɔ Dwosaya le kakula la, ɛnee ɔkulo kɛ ɔtie Gyihova. Yemɔti menli mɔɔ kulo Gyihova ala a ɔvale bɛ agɔnwolɛ a. Na bɛboale Dwosaya bɛmanle ɔyɛle mɔɔ le kpalɛ la. Dwosaya agɔnwo mɔ bie a le nwane?

Ɔ gɔnwo ko a le Zɛfanaya. Zɛfanaya le ngapezonli mɔɔ bɔle Dwudama kɔkɔ kɛ  bɛangyakyi awozonle ɛzonlenlɛ a edwɛkɛ ɛtane bado bɛ la. Dwosaya diele Zɛfanaya na ɔzonlenle Gyihova, yeanzonle awozonle.

Dwosaya agɔnwo bieko a le Gyɛlɛmaya. Ɛnee asɛɛ ɔ nee Dwosaya bɛ ɛvolɛ le ko yɛɛ mekɛ mɔɔ bɛlɛnyi la ɛnee bɛde ɛleka mɔɔ ɔbikye nwolɛ la. Ɛnee bɛle agɔnwolɛ kpalɛ, yemɔti mekɛ mɔɔ Dwosaya wule la, Gyɛlɛmaya hɛlɛle kɛzi ɔ nwo dɔ Dwosaya la anwo edwɛne titile bie. Gyɛlɛmaya nee Dwosaya boale bɛ nwo manle bɛyɛle mɔɔ le kpalɛ la na bɛdiele Gyihova.

Dwosaya nee Gyɛlɛmaya boale bɛ nwo na bɛyɛle mɔɔ le kpalɛ la

Duzu a ɛsukoa ɛfi Dwosaya neazo ne anu a?— Dwosaya le kakula bɔbɔ la, ɛnee ɔkulo kɛ ɔyɛ mɔɔ le kpalɛ la. Ɛnee ɔze kɛ ɔwɔ kɛ ɔfa menli mɔɔ kulo Gyihova la agɔnwolɛ. Nea kɛ ɛbava menli mɔɔ kulo Gyihova mɔɔ bɛbaboa wɔ bɛamaa wɔayɛ mɔɔ le kpalɛ la agɔnwolɛ!