Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 2

Nyamenle A Le Nwane?

Nyamenle A Le Nwane?

1. Duzu ati a ɔwɔ kɛ yɛsonle Nyamenle a?

Nɔhalɛ Nyamenle ne a le ninyɛne kɔsɔɔti Bɔvolɛ a. Ɔnlɛ ye mɔlebɛbo yɛɛ ɔnrɛnyia ye awieleɛ. (Edwɛne 90:2) Ɔdaye a edwɛkpa ne mɔɔ wɔ Baebolo ne anu la vi ye ɛkɛ a. (1 Timote 1:11) Kɛmɔ Nyamenle a maanle yɛ ngoane la ati, ɔ ngome a ɔwɔ kɛ yɛsonle ye a.​—Kenga Yekile 4:11.

2. Kɛzi Nyamenle de ɛ?

Dasanli biala ɛtɛnwunle Nyamenle ɛlɛ ɔluakɛ ɔle Sunsum. Ye ngoane ne kpogya tɛla alesama mɔɔ bɛle nwonane na bɛde azɛlɛ ye azo la ɛdeɛ. (Dwɔn 1:18; 4:24) Noko yɛkola yɛnwu Nyamenle subane wɔ ninyɛne mɔɔ yebɔ la anu. Kɛ neazo la, mbakama nee felawɔse ngakyile ne mɔ maa yɛnwu ye ɛlɔlɛ nee ye nrɛlɛbɛ ne. Kɛzi aleɛabo kpole de la maa yɛnwu ye tumi ne.​—Kenga Wulomuma 1:20.

Saa yɛkenga Baebolo ne a yɛkola yɛsukoa Nyamenle subane ne mɔ anwo ninyɛne dɔɔnwo. Kɛ neazo la, ɔmaa yɛnwu mɔɔ Nyamenle kulo nee mɔɔ ɔngulo, kɛzi ɔ nee menli di, yɛɛ kɛzi ɔdi tɛnlabelɛ ngakyile nwo gyima la.​—Kenga Edwɛne 103:7-10.

3. Asoo Nyamenle lɛ duma?

Gyisɛse hanle kɛ: “Yɛ Ze mɔɔ wɔ anwuma, wɔ duma nwo ɛde.” (Mateyu 6:9) Nyamenle lɛ amodinli dɔɔnwo ɛdeɛ, noko ɔlɛ duma ko ala. Asolo kɛzi bɛbɔ ye wɔ aneɛ biala anu a. Wɔ Nzema nu bɛbɔ ye “Gyihova.”​—Kenga Edwɛne 83:18.

Bɛye Nyamenle duma ne bɛvi Baebolo dɔɔnwo anu na bɛva amodinli Awulae anzɛɛ Nyamenle bɛzie ɔ gyakɛ anu. Noko mekɛ mɔɔ bɛhɛlɛle Baebolo ne la, ɛnee Nyamenle duma ne finde nu kɛyɛ 7,000. Gyisɛse maanle menli nwunle  Nyamenle duma wɔ mekɛ mɔɔ ɔhilehile bɛ Nyamenle anwo debie la.​—Kenga Dwɔn 17:26.

Nea Asoo Nyamenle Lɛ Duma? video ne.

4. Asoo Nyamenle dwenle yɛ nwo?

Nyamenle le kɛ selɛ ɛhye mɔɔ lɛ ɛlɔlɛ la, mɔɔ ɔlɛyɛ la baboa yɛ dahuu

Asoo amaneɛnwunlɛ mɔɔ ɛzo la kile kɛ Gyihova Nyamenle ɛndwenle yɛ nwo ɔ? Menli bie mɔ ka kɛ ɔmaa yɛnwu amaneɛ ɔfa ɔsɔ yɛ ɔnea, noko ɛhye ɛnle nɔhalɛ.​—Kenga Gyemise 1:13.

Nyamenle ɛmaa sonla adenle kɛ ɔkola ɔfi ye ɛhulolɛ nu ɔyɛ debie. Asoo yɛ nye ɛnzɔ fanwodi mɔɔ yɛlɛ yɛfa yɛsi kpɔkɛ kɛ yɛbazonle Nyamenle la ɔ? (Dwɔhyua 24:15) Noko menli dɔɔnwo yɛ bɛ gɔnwo mɔ ɛtane, yemɔti amaneɛnwunlɛ ɛbu. Saa Gyihova nwu ninyɛndane ɛhye mɔ a ɔdi nyane.​—Kenga Gyɛnɛsese 6:5, 6.

Gyihova Nyamenle dwenle yɛ nwo. Ɔkulo kɛ yɛ nye die. Ɔnrɛhyɛ ɔbaye amaneɛnwunlɛ nee menli mɔɔ fa ba la yeavi ɛkɛ. Noko adwenle kpalɛ bie ati a yemaa amaneɛnwunlɛ nwo adenle mekɛ ekyi a. Yɛbazukoa deɛmɔti Nyamenle ɛmaa amaneɛnwunlɛ nwo adenle la wɔ Ɛzukoalɛdeɛ 8 ne anu.​—Kenga 2 Pita 2:9; 3:7, 13.

5. Kɛ ɔkɛyɛ na yɛabikye Nyamenle ɛ?

Gyihova se yɛlua asɔneyɛlɛ zo yɛbikye ye. Ɔdwenle yɛ nuhua ko biala anwo. (Edwɛne 65:2; 145:18) Ɔkulo kɛ ɔfa yɛ ɛtane ɔkyɛ yɛ. Saa ɔyɛ na yɛfo bɔbɔ a, ɔnwu mɔdenle mɔɔ yɛlɛbɔ kɛ yɛyɛ mɔɔ ɔkulo la. Yemɔti ɔnva nwo kɛ yɛnli munli la, yɛbahola yɛ nee Nyamenle anyia agɔnwolɛvalɛ kyengye.​—Kenga Edwɛne 103:12-14; Gyemise 4:8.

Kɛmɔ Gyihova ɛmaa yɛ ngoane la ati, ɔwɔ kɛ yɛkulo ye yɛtɛla awie gyɛne biala. (Maake 12:30) Saa ɛsukoa Nyamenle anwo ninyɛne dɔɔnwo na ɛyɛ mɔɔ ɔka la ɛfa ɛkile kɛ ɛkulo ye a ɛbabikye ye kpalɛ.​—Kenga 1 Timote 2:4; 1 Dwɔn 5:3.