Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 3

Asoo Amgba Edwɛkpa Ne Vi Nyamenle Ɛkɛ?

Asoo Amgba Edwɛkpa Ne Vi Nyamenle Ɛkɛ?

1. Nwane a le Baebolo ne Kɛlɛvolɛ a?

Edwɛkpa mɔɔ kile kɛ menli badɛnla azɛlɛ ye azo dahuu la wɔ Baebolo ne anu. (Edwɛne 37:29) Mbuluku ngyikyi 66 a wɔ Baebolo ne anu a. Nyamenle a maanle mrenyia nɔhavoma kɛyɛ 40 hɛlɛle a. Mosisi a hɛlɛle mbuluku nnu ne mɔɔ limoa la wɔ ɛvolɛ kɛyɛ 3,500 mɔɔ ɛze ɛhɔ la a. Ɛzoanvolɛ Dwɔn a hɛlɛle buluku ne mɔɔ li awieleɛ la wɔ ɛvolɛ mɔɔ bo 1,900 mɔɔ ɛze ɛhɔ la a. Nwane edwɛkɛ a Baebolo kɛlɛvoma ne hɛlɛle a? Nyamenle luale ye sunsum nwuanzanwuanza ne azo dendɛle hilele menli mɔɔ hɛlɛle la. (2 Samoɛle 23:2) Nyamenle edwɛkɛ a bɛhɛlɛle a na tɛ bɛdabɛ mumua ne bɛ nzuzulɛ ɔ. Yemɔti Gyihova a le Baebolo ne Kɛlɛvolɛ a.​—Kenga 2 Timote 3:16; 2 Pita 1:20, 21.

Nea Nwane A Le Baebolo Ne Kɛlɛvolɛ A? vidio ne.

2. Kɛ ɔkɛyɛ na yɛanwu kɛ Baebolo ne le nɔhalɛ ɛ?

Yɛze kɛ Baebolo ne vi Nyamenle ɛkɛ ɔluakɛ ɔka mɔɔ bazi kenle bie la pɛpɛɛpɛ. Dasanli biala ɛnrɛhola ɛnrɛyɛ zɔ. (Dwɔhyua 23:14) Nyamenle Tumivolɛ Bedevinli ne angomekye a ze alesama kenle bie edwɛkɛ a.​—Kenga Ayezaya 42:9; 46:10.

Yɛ nye la kɛ buluku mɔɔ vi Nyamenle ɛkɛ la bayɛ ngakyile, na zɔhane a ɔde a. Bɛva Baebolo mgbe mgbe dɔɔnwo bɛmaa wɔ aneɛ ngakyile nu. Baebolo ne ɛhyɛ ɛdeɛ noko ɔ nee mɔɔ abɔdeɛ nwo nrɛlɛbɛ ka la le ko. Bieko, menli 40 ne mɔɔ hɛlɛle la anu biala edwɛkɛ ɛntia ɔ gɔnwo ɛdeɛ. * Eza Nyamenle ɛlɔlɛ ne mɔɔ Baebolo ne ka nwolɛ edwɛkɛ la kola kakyi menli subane maa bɛbɔ ɛbɛla kpalɛ. Edwɛkɛ ɛhye mɔ maa menli dɔɔnwo die di kɛ Baebolo ne le Nyamenle Edwɛkɛ.​—Kenga 1 Tɛsalonaekama 2:13.

Nea Kɛ Ɔkɛyɛ Na Yɛanwu Kɛ Baebolo Ne Le Nɔhalɛ Ɛ? vidio ne.

 3. Duzu a Baebolo ne ka nwolɛ edwɛkɛ a?

Baebolo ne ka edwɛkpa mɔɔ fale bodane mɔɔ Nyamenle lɛ maa alesama la anwo edwɛkɛ titili. Ngɛlɛlera ne kilehile kɛzi adenle mɔɔ sonla nyianle kɛ ɔbadɛnla paladaese azɛlɛ zo vile ɔ sa nee kɛzi yɛ sa baha paladaese ne bieko la anu.​—Kenga Yekile 21:4, 5.

Ngyinlazo, mɛla nee folɛdulɛ noko wɔ Nyamenle Edwɛkɛ ne anu. Bieko, kɛzi Nyamenle nee menli luale wɔ tete ne la anwo tetedwɛkɛ wɔ nu, tetedwɛkɛ ɛhye maa yɛnwu Nyamenle subane. Yemɔti, Baebolo ne kola boa wɔ maa ɛnwu Nyamenle. Ɔkilehile kɛzi ɛbahola wɔayɛ ɔ gɔnwo la anu.​—Kenga Edwɛne 19:7, 11; Gyemise 2:23; 4:8.

4. Kɛ ɔkɛyɛ na wɔade Baebolo ne abo ɛ?

Buluku ɛhye balua adenle ko ne ala mɔɔ Gyisɛse luale zo la azo aboa wɔ yeamaa wɔade Baebolo ne abo. Ɔhwenle adwenle ɔhɔle Baebolo ne azo na ɔhilehilele nu “ɔmaanle bɛdele Ngɛlɛlera ne abo.”​—Kenga Luku 24:27, 45.

Edwɛkpa ne mɔɔ vi Nyamenle ɛkɛ la yɛ anyelielɛ tɛla ninyɛne dɔɔnwo. Noko bie mɔ anye ɛnlie nwolɛ yɛɛ ɔka bie mɔ ɛya bɔbɔ. Mmamaa ɛ sa nu to. Dahuu ngoane mɔɔ ɛbanyia la gyi Nyamenle mɔɔ ɛbanwu ye la azo.​—Kenga Dwɔn 17:3.

 

^ ɛden. 3 Nea A Book for All People buluku ne mɔɔ wɔ Nrelenza nu la.