Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 5

Bodane Boni Ati A Nyamenle Bɔle Azɛlɛ Ye A?

Bodane Boni Ati A Nyamenle Bɔle Azɛlɛ Ye A?

1. Duzu ati a Nyamenle bɔle azɛlɛ ye a?

Gyihova vale azɛlɛ ye maanle alesama. Ɔle yɛ sua nu. Yemɔti, bɛambɔ Adam nee Yive, agyalɛma mɔɔ limoa la kɛ bɛwo bɛmaa anwuma ɛyi​—ɛnee Nyamenle ɛbɔ anwumabɔvolɛma ɛgua anwuma dɛbadɛba. (Dwobu 38:4, 7) Emomu, Nyamenle maanle Adam hɔdɛnlanle paladaese kɛnlɛma bie mɔɔ bɛfɛlɛ ye Yidɛn tola la anu. (Gyɛnɛsese 2:15-17) Ɛnee Gyihova bodane a le kɛ Adam nee ɔ bo zo amra anye balie wɔ azɛlɛ ye azo dahuu.​—Kenga Edwɛne 37:29; 115:16.

Mɔlebɛbo ne, ɛnee Yidɛn tola ne angomekye a le paladaese a. Ɛnee ɔwɔ kɛ agyalɛma mɔɔ limoa la wo maa azɛlɛ ne yi. Nzinlii, bɛbanlea azɛlɛ ye kɔsɔɔti azo bɛamaa yeayɛ paladaese. (Gyɛnɛsese 1:28) Bɛnrɛzɛkye azɛlɛ ye ɛlɛ. Ɔbayɛ alesama sua nu dahuu.​—Kenga Edwɛne 104:5.

Nea Duzu Ati A Nyamenle Bɔle Azɛlɛ Ye A? vidio ne.

2. Duzu ati a ɛnɛ azɛlɛ ye ɛnle paladaese a?

Adam nee Yive andie Nyamenle, yemɔti Gyihova yele bɛ vile tola ne anu. Paladaese minlinle, na dasanli biala ɛtɛkolale ye kyekye bieko. Baebolo ne ka kɛ: “Bɛva azɛlɛ ne bɛwula amumuyɛma asa anu.”​—Dwobu 9:24.​—Kenga Gyɛnɛsese 3:23, 24.

Asoo Gyihova arɛle ɛvi bodane mɔɔ ɔti ɔbɔle alesama la? Kyɛkyɛ! Ɔle tumivolɛ bedevinli. Ɔyɛ mɔɔ ɔkɛha la. (Ayezaya 45:18) Ɔbamaa alesama azia anyia mɔɔ ɔbɔle nwolɛ kpɔkɛ la.​—Kenga Edwɛne 37:11, 34.

3. Kɛ ɔkɛyɛ na Paladaese ara bieko ɛ?

Paladaese bara azɛlɛ ye azo bieko wɔ mekɛ mɔɔ Gyisɛse ɛlɛdi tumi kɛ Nyamenle Belemgbunli la. Wɔ Amagɛdɔn konle ne anu, Gyisɛse bali Nyamenle anwumabɔvolɛma ne mɔ anyunlu yeamaa bɛazɛkye menli mɔɔ dwazo tia Nyamenle la kɔsɔɔti.  Akee Gyisɛse bado Seetan efiade ɛvolɛ 1,000. Nyamenle menli banyia bɛ ti wɔ ɛzɛkyelɛ ne anu ɔluakɛ Gyisɛse bahile bɛ adenle na yeabɔ bɛ nwo bane. Bɛbanyia dahuu ngoane wɔ Paladaese azɛlɛ zo.​—Kenga Yekile 20:1-3; 21:3, 4.

4. Mekɛ boni a amaneɛnwunlɛ bo bapɛ a?

Mekɛ boni a Nyamenle baye ɛtaneyɛlɛ avi azɛlɛ ye azo a? Gyisɛse maanle yɛ “sɛkɛlɛneɛ” mɔɔ bahile kɛ awieleɛ ne ɛbikye la. Ninyɛne mɔɔ ɛlɛsisi ɛnɛ la le esiane maa alesama na bɛkile kɛ “mekɛ ɛhye ɛlɛkɔ awieleɛ.”​—Kenga Mateyu 24:3, 7-14, 21, 22.

Wɔ ɛvolɛ 1,000 ne mɔɔ Gyisɛse badɛnla anwuma ali tumi wɔ azɛlɛ ye azo la anu, ɔbaye amaneɛnwunlɛ kɔsɔɔti yeavi ɛkɛ. (Ayezaya 9:6, 7; 11:9) Gyisɛse bayɛ Belemgbunli, eza ɔbayɛ Ɛsɔfo Kpanyinli na ɔbava menli mɔɔ kulo Nyamenle la amuala ɛtane yeahyɛ bɛ. Ɛhye ati, Nyamenle balua Gyisɛse anwo zo aye anwodolɛ, kpanyinliyɛlɛ nee ewule avi ɛkɛ.​—Kenga Ayezaya 25:8; 33:24.

5. Nwane mɔ a badɛnla kenle bie Paladaese ne anu a?

Ɛbayia menli mɔɔ kulo Nyamenle na bɛkulo kɛ bɛyɛ mɔɔ sɔ ɔ nye la wɔ Belemgbunlililɛ Asalo ɛkɛ

Menli mɔɔ tie Nyamenle la a badɛnla Paladaese a. (1 Dwɔn 2:17) Gyisɛse zoanle ye ɛdoavolɛma kɛ bɛhɔkpondɛ bɛlɛvoma na bɛhile bɛ mɔɔ bɛyɛ a Nyamenle balie bɛ ado nu la. Ɛnɛ, Gyihova ɛlɛsiezie menli mgbe dɔɔnwo yeamaa ɛbɛlabɔlɛ wɔ azɛlɛ ye azo Paladaese ne mɔɔ ɛlɛba la anu. (Zɛfanaya 2:3) Bɛkilehile menli kɛzi ɔwɔ kɛ bɛyɛ kunlima nee selɛma kpalɛ, yelɛma nee mrɛladane kpalɛ la wɔ Gyihova Alasevolɛ Belemgbunlililɛ Asalo ne mɔ anu. Ngakula nee bɛ awovolɛ bɔ nu sonle na bɛsukoa kɛzi bɛbanyia edwɛkpa ne azo nvasoɛ la.​—Kenga Maeka 4:1-4.