Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 6

Anyelazo Boni A Wɔ Ɛkɛ Maa Mowuamra A?

Anyelazo Boni A Wɔ Ɛkɛ Maa Mowuamra A?

1. Mowuamra anwo edwɛkpa boni a wɔ ɛkɛ a?

Mekɛ mɔɔ Gyisɛse dwule Bɛtani mɔɔ bikye Gyɛlusalɛm la, ɛnee ɔ gɔnwo Lazalɛse ɛwu yeli kenle nna. Gyisɛse nee Lazalɛse amediema mraalɛ Maata nee Mɛle hɔle nla ne azo. Yeangyɛ, menli dɔɔnwo rayiale ɛkɛ. Nea kɛzi Maata nee Mɛle anye liele wɔ mekɛ mɔɔ Gyisɛse dwazole Lazalɛse la!​—Kenga Dwɔn 11:21-24, 38-44.

Ɛnee Maata ze mowuamra anwo edwɛkpa ne dɛba. Ɛnee ɔze kɛ Gyihova badwazo mowuamra yeamaa bɛadɛnla azɛlɛ ye azo bieko.​—Kenga Dwobu 14:14, 15.

2. Tɛnlabelɛ boni a mowuamra wɔ nu a?

Nyamenle zele Adam kɛ: “Ɛle ndɛtɛlɛ na ɛbazia wɔahɔ ndɛtɛlɛ nu.”​—GYƐNƐSESE 3:19.

Bɛvale ndɛtɛlɛ a bɛbɔle sonla a. (Gyɛnɛsese 2:7; 3:19) Sunsum biala ɛnde yɛ sonlabaka ne anu. Yemɔti debie biala ɛnle yɛ nu mɔɔ saa yɛwu a ɔkɔ zo ɔtɛnla aze a. Saa yɛwu a, yɛ adwenle noko wu na yɛ nzuzulɛ minli. Ɛhye ati, Lazalɛse anga debie mɔɔ zile wɔ ye ewule nu la ɔluakɛ mowuamra ɛnze ɛhwee.​—Kenga Edwɛne 146:4; Nolobɔvo 9:5, 6, 10.

Asoo Nyamenle kile menli mɔɔ kɛwu la nyane wɔ senle nu? Kɛmɔ Baebolo ne kile kɛ mowuamra ɛnze ɛhwee la ati, abɔnsam senle ne le adalɛ ngilehilelɛ mɔɔ maa menli bɔ Nyamenle somolɛ a. Ɔkyi adwenle mɔɔ menli lɛ kɛ bɛfa senle bɛkile menli nyane la.​—Kenga Gyɛlɛmaya 7:31.

Nea Tɛnlabelɛ Boni A Mowuamra Wɔ Nu A? vidio ne.

 3. Asoo mowuamra kola nee yɛ tendɛ?

Mowuamra ɛndendɛ yɛɛ bɛnde edwɛkɛ. (Edwɛne 115:17) Noko anwumabɔvolɛma bie mɔ ati yɛ se na bɛkola bɛyɛ bɛ nwo kɛ menli mɔɔ ɛwu la na bɛtendɛ bɛkile menli. (2 Pita 2:4) Gyihova kyi mɔdenle mɔɔ awie bɔ kɛ ɔ nee mowuamra kɛdendɛ la.​—Kenga Ditilɔnomi 18:10, 11.

4. Nwane mɔ a bɛbadwazo bɛ a?

Menli mgbe dɔɔnwo mɔɔ ɛwu la badwazo ara azɛlɛ ye azo. Bɛbadwazo menli bɔbɔ mɔɔ ɛnee bɛnze Nyamenle na ɔlua zo bɛyɛle ninyɛndane la anu bie mɔ.​—Kenga Luku 23:43; Gyima ne 24:15.

Menli mɔɔ bɛbadwazo bɛ la bɛanyia adenle azukoa Nyamenle anwo debie na bɛahile kɛ bɛlɛ diedi wɔ Gyisɛse anu ɔlua tieyɛ mɔɔ bɛbayɛ la azo. (Yekile 20:11-13) Menli mɔɔ bɛdwazo bɛ a bɛbabɔ ɛbɛla kpalɛ la bɛanyia dahuu ngoane wɔ azɛlɛ ye azo.​—Kenga Dwɔn 5:28, 29.

5. Duzu a ewudwazo ne maa yɛnwu ye wɔ Gyihova anwo a?

Nyamenle zoanle ɔ Ra ne maanle ɔrawule ɔmaanle yɛ na ɔlua zo ɔmaanle mowuamra nyianle anyelazo. Ɔti, ewudwazo ne maa yɛnwu Gyihova ɛlɔlɛ nee ye ɛlolɛ kpole ne. Saa bɛdwazo mowuamra a, nwane titili a ɛkulo kɛ ɛnwu ye a?​—Kenga Dwɔn 3:16; Wulomuma 6:23.