Wulu kɔ nuhua edwɛkɛ ne azo

Wulu kɔ nuninyɛne ne azo

 EDWƐKƐ 86

Menli Mɔɔ Ɛwɔlɔra Hilele Bɛ Adenle

Menli Mɔɔ Ɛwɔlɔra Hilele Bɛ Adenle

ASOO ɛnwu ɛwɔlɔra ne mɔɔ ɛlɛta mɔɔ menli ɛhye mɔ anu ko ɛlɛtende ɔ sa wɔ zolɛ la ɔ? Bɛnwunle ɛwɔlɔra ne wɔ mekɛ mɔɔ bɛvile Gyɛlusalɛm la. Menli ɛhye mɔ vi Aduduleɛ nehane, na bɛsukoa nwɔlɔra nwo debie. Bɛdie bɛdi kɛ ɛwɔlɔra fofolɛ ɛhye ɛlɛkile bɛ adenle ahɔ awie mɔɔ anwo hyia la ɛkɛ.

Mekɛ mɔɔ menli ne dwule Gyɛlusalɛm la, bɛbizale kɛ: ‘Nienwu a yɛkɛnwu Dwuuma belemgbunli ne mɔɔ bɛwo ye la a?’ “Dwuuma” le duma bieko mɔɔ bɛfa bɛfɛlɛ Yizilayɛma a. Menli ne hanle kɛ: ‘Yɛlumua yɛnwunle kakula ne ɛwɔlɔra ne wɔ Aduduleɛ nehane, na yɛra kɛ yɛbazonle ye.’

Mekɛ mɔɔ Hɛlɔdo, mɔɔ le belemgbunli wɔ Gyɛlusalɛm la, dele ɛhye la ye adwenle zɛkyele. Ɛnee ɔmkpondɛ kɛ belemgbunli fofolɛ bali ɔ gyakɛ anu. Yemɔti Hɛlɔdo vɛlɛle ɛsɔfo mgbanyima ne mɔ na ɔbizale kɛ: ‘Nienwu a ɔwɔ kɛ bɛwo belemgbunli ne mɔɔ bɛbɔ ɔ nwo ɛwɔkɛ la a?’ Bɛbuale ye kɛ: ‘Baebolo ne se wɔ Bɛtelɛhɛm.’

Yemɔti Hɛlɔdo vɛlɛle menli ne mɔɔ vi Aduduleɛ nehane la, na ɔhanle kɛ: ‘Bɛhɔ na bɛhɔdɔ alagye bɛkpondɛ kakula ne. Saa bɛnwu ye a, bɛrabɔ me amaneɛ. Mekpondɛ kɛ medame noko mekɔsonle ye bie.’ Noko, ɛnee Hɛlɔdo, kpondɛ kɛ ɔnwu kakula ne na ɔku ye!

Akee ɛwɔlɔra ne lile menli ne anyunlu hɔle Bɛtelɛhɛm hɔgyinlanle ɛleka mɔɔ kakula ne wɔ la anwuma. Mɔɔ menli ne hɔle sua ne anu la, bɛnwunle kakula Gyisɛse nee ɔ nli Mɛle. Bɛhyɛle Gyisɛse ninyɛne dɔɔnwo. Na nzinlii Gyihova bɔle menli ne kɔkɔ wɔ ɛlalɛ nu kɛ bɛmmasia bɛkɔ Hɛlɔdo anwo lɔ bieko. Yemɔti bɛvale adenle gyɛne zo bɛziale bɛhɔle bɛ maanle nu.

Mɔɔ Hɛlɔdo nwunle kɛ menli ne mɔɔ vi Aduduleɛ nehane la ɛhɔ sua nu la, ɔvale ɛya kpole. Yemɔti ɔlile mɛla kɛ bɛhu ngakula mrenya mɔɔ ɛli ɛvolɛ nwiɔ nee mɔɔ ɛtɛdwule ɛvolɛ nwiɔ mɔɔ wɔ Bɛtelɛhɛm la amuala. Noko Gyihova lumua bɔle Dwosefi kɔkɔ wɔ ɛlalɛ nu, na Dwosefi nee ye abusua ne hɔle Yigyibiti. Nzinlii, mɔɔ Dwosefi nwunle kɛ Hɛlɔdo ɛwu la, ɔvale Mɛle nee Gyisɛse ɔziale ɔrale sua nu wɔ Nazalɛte. Ɛke a le ɛleka mɔɔ Gyisɛse nyinle a.

Nwane a ɛdwenle kɛ ɔmanle zɔhane ɛwɔlɔra fofolɛ ne vindele a? Kakye kɛ, menli ne nwunle ɛwɔlɔra ne la bɛlumua bɛhɔle Gyɛlusalɛm. Ɛnee Seetan Abɔnsam kpondɛ kɛ ɔku Nyamenle Ara ne, na ɛnee ɔze kɛ Gyɛlusalɛm Belemgbunli Hɛlɔdo babɔ mɔdenle kɛ ɔku ye. Yemɔti ɔbayɛ kɛ Seetan a manle zɔhane ɛwɔlɔra ne vindele a.