Wulu kɔ nuhua edwɛkɛ ne azo

Wulu kɔ nuninyɛne ne azo

 EDWƐKƐ 75

Mgbavolɛ Nna Wɔ Babelɔn

Mgbavolɛ Nna Wɔ Babelɔn

BELEMGBUNLI Nɛbukadenɛza vale Yizilayɛma mɔɔ ze nwoma kpalɛ la amuala hɔle Babelɔn. Ɛhye anzi belemgbunli ne kpale nu yele mgbavolɛ ne mɔ mɔɔ anwo yɛ fɛ kpalɛ na eza bɛze nrɛlɛbɛ la. Mgbavolɛ ɛhye anu nna a ɛnwu bɛ wɔ ɛke la. Ko a le Daneɛle, na nsa ne mɔɔ ɛha la Babelɔnma donle bɛ Hyeedelake, Mehyake, yɛɛ Abɛdenɛgo.

Nɛbukadenɛza bɔle adwenle kɛ ɔtete mgbavolɛ ne mɔ na bazonle wɔ ye sua nu ɛkɛ. Ɛvolɛ nsa ndeteleɛ ne anzi akee ɔbaye nuhua mɔɔ bɛze nrɛlɛbɛ kpalɛ la yeamaa bɛaboa ye wɔ gyimalilɛ nu. Ɛnee Belemgbunli ne kpondɛ kɛ mgbavolɛ ne mɔ nyia anwosesebɛ nee kpɔkɛdelɛ kpalɛ wɔ mekɛ mɔɔ bɛlɛtete bɛ la. Ɔti ɔzele ye azonvolɛ ne mɔ kɛ bɛva aleɛ nee nza kpalɛ mɔɔ ɔdaye mumua ne ɔ nee ye abusua ne di la bie bɛmaa bɛ.

Nea kpavolɛ Daneɛle. Ɛze mɔɔ ɔlɛka yeahile Nɛbukadenɛza sonvolɛ kpanyinli Ahyepinaze la ɔ? Daneɛle ɛlɛka ahile ye kɛ ɔngulo kɛ ɔkɛli ninyɛne mgbalɛ ne mɔɔ vi belemgbunli ɛkponle ne azo la. Ɛhye gyegyele Ahyepinaze. Ɔhanle kɛ: ‘Belemgbunli ɛhile aleɛ nee nza mɔɔ bɛva bɛmaa wɔ la. Na saa wɔanyia anwosesebɛ kɛ ɛ gɔnwo mɔ a, wɔannea a ɔbahu me.’

Yemɔti Daneɛle hɔle sonvolɛ ne mɔɔ Ahyepinaze ɛye ye kɛ ɔnlea ɔdaye nee ɔ gɔnwo mɔ nsa ne anwo zo la ɛkɛ ne. Ɔzele ye kɛ: ‘Mesɛlɛ wɔ sɔ yɛ nea kenle 10 pɛ. Maa bɛmaa yɛ nya nya yɛli na bɛmaa yɛ nzule yɛnlo. Na fa yɛ to menli mɔɔ ɛlɛdi belemgbunli aleɛ ne la anwo, na nea mɔɔ te kpɔkɛ kpalɛ la.’

Sonvolɛ ne kponlenle zolɛ kɛ ɔbayɛ. Na mekɛ mɔɔ kenle 10 ne dwule la, Daneɛle nee ɔ gɔnwo mɔ nsa ne nyianle kpɔkɛdelɛ kpalɛ dɛlale mgbavolɛ mɔɔ ɛha la amuala. Ɔti kɛ anrɛɛ bɛkɛli mɔɔ belemgbunli ne fa maa bɛ la sonvolɛ ne manle bɛhɔle zo bɛlile nya nya ne.

Ɛvolɛ nsa ne dwule la bɛvale mgbavolɛ ne mɔ amuala bɛhɔle Nɛbukadenɛza anyunlu. Mekɛ mɔɔ ɔ nee bɛ muala dendɛle wiele la, belemgbunli ne nwunle Daneɛle nee ɔ gɔnwo mɔ nsa ne kɛ bɛze nrɛlɛbɛ kpalɛ. Ɔti ɔvale bɛ kɛ bɛboa ye wɔ ye sua nu ɛkɛ ne. Na mekɛ biala mɔɔ belemgbunli ne kɛbiza Daneɛle, Hyeedelake, Mehyake nee Abɛdenɛgo edwɛkɛ anzɛɛ kɛmaa bɛ gyima mɔɔ anu yɛ se kpalɛ la, bɛnyia nwolɛ adwenle mɔnwo 10 bɛtɛla ye ɛsɔfo ne mɔ anzɛɛ nrɛlɛbɛvolɛma ne mɔ.