Wulu kɔ nuhua edwɛkɛ ne azo

Wulu kɔ nuninyɛne ne azo

 EDWƐKƐ 67

Gyɛhɔhyafate Die Gyihova Di

Gyɛhɔhyafate Die Gyihova Di

ASOO ɛze mrenya ɛhye mɔ na ɛze debie mɔɔ bɛlɛyɛ a? Bɛlɛkɔ konle, na mrenya ne mɔ mɔɔ lumua la ɛlɛto edwɛne. Noko wɔannea ɛkɛbiza kɛ: ‘Duzu ati a edwɛndovoma ne mɔ ɛnlɛ dadeɛ nee atwɛ mɔɔ bɛfa baho a?’ Maa yɛnlea.

Gyɛhɔhyafate a le Yizilayɛ mbusua nwiɔ belemgbunlililɛ ne azo belemgbunli a. Ɔdɛnlanle aze wɔ mekɛ mɔɔ Belemgbunli Ehabe nee Gyɛzɛbɛle lile sɔlɔ mbusua 10 belemgbunlililɛ ne azo la. Gyɛhɔhyafate le belemgbunli kpalɛ, na kɛ ɛnee ɔ ze Esa noko de ala ɛne. Yemɔti menli mɔɔ wɔ nyiakɛ mbusua nwiɔ belemgbunlililɛ ne anu la nyianle asetɛnla kpalɛ wɔ mekɛ dɔɔnwo anu.

Noko akee edwɛkɛ bie zile mɔɔ manle menli ne ahonle dule a. Menli bie rabɔle Gyɛhɔhyafate amaneɛ kɛ: ‘Ɛlɔnema mɔɔ vi Mowabe, Amɔn, nee Siyɛ Boka ne azo la ɛva yɛ aze.’ Yizilayɛma dɔɔnwo bɔle gua wɔ Gyɛlusalɛm kɛ bɛkpondɛ Gyihova ɛkɛ ne moalɛ. Bɛhɔle ɛzonlenlɛ sua ne anu, na ɛkɛ ne yɛɛ Gyɛhɔhyafate yɛle asɔne kɛ: ‘O Gyihova yɛ Nyamenle, yɛnnwu mɔɔ yɛyɛ a. Yɛnlɛ anwosesebɛ biala wɔ ɛlɔnema ɛhye anyunlu. Ɛ nyunlu ala a yɛ nye gyi a.’

Gyihova diele, na ɔmanle ye sonvolɛ ne mɔ ko hanle hilele menli ne kɛ: ‘Konle ne ɛnle bɛ konle, ɔle Nyamenle ɛdeɛ. Ɔnrɛhyia kɛ bɛkɛho. Bɛmɛ bɛgyinla , na bɛnlea kɛ Gyihova bazi alie bɛ la.’

Yemɔti aleɛ hyenle la Gyɛhɔhyafate zele menli ne kɛ: ‘Bɛlie Gyihova bɛli!’ Akee ɔvale edwɛndovoma ɔlile ɛlɔnema ne ati, na bɛdole edwɛne bɛyele Gyihova ayɛlɛ bɛlile menli ne anyunlu. Asoo ɛze mɔɔ zile mekɛ mɔɔ bɛbikyele azokoɛleɛ ne la ɔ? Gyihova manle agbɔvolɛ ne mɔ nee bɛ nwo honle. Na mekɛ mɔɔ Yizilayɛma hɔdwule ɛkɛ ne la, ɛnee ɛlɔnema ne amuala ɛwu!

Asoo nrɛlɛbɛ ɛnle nu kɛ Gyɛhɔhyafate nyianle diedi wɔ Gyihova anu la ɔ? Saa yɛdayɛ noko yɛdie Ye yɛdi a yɛbayɛ nrɛlɛbɛvolɛma.