Wulu kɔ nuhua edwɛkɛ ne azo

Wulu kɔ nuninyɛne ne azo

 EDWƐKƐ 45

Azule Dwɔdan Ne Ɛpɛlɛ

Azule Dwɔdan Ne Ɛpɛlɛ

NEA! Yizilayɛma ɛlɛpɛ Azule Dwɔdan ne! Noko nzule ne wɔ nienwu? Ɔluakɛ ɛnee ezule dɔɔnwo tɔ wɔ zɔhane mekɛ ne anu wɔ ɛvolɛ ne anu la ati, ɛnee azule ne yile la ɔtɛkyɛle. Noko kɛkala nzule ne amuala ɛsesa! Na Yizilayɛma lua azɛlɛ resee zo kɛmɔ bɛyɛle ye wɔ Nyevile Kɔkɔlɛ ne anu la! Nienwu yɛɛ nzule ne amuala ɛhɔ a? Maa yɛnlea.

Mɔɔ mekɛ dwule kɛ Yizilayɛma pɛ Azule Dwɔdan ne la, mɔɔ Gyihova manle Dwɔhyua hanle hilele menli ne la ɛne: ‘Ɔwɔ kɛ ɛsɔfo ne mɔ fa ngyekyeleɛ ɛlɛka ne na bɛdumua bɛ nyunlu. Saa bɛwula bɛ gyakɛ Azule Dwɔdan ne anu a, nzule ne bagyakyi ɛzenlɛ.’

Yemɔti ɛsɔfo ne mɔ vale ngyekyeleɛ ɛlɛka ne na bɛlumuale menli ne anyunlu. Bɛhɔdwule Dwɔdan ne anloa la, ɛsɔfo ne mɔ dwule azule ne anu. Ɔle kuma na ɔlɛse kpole kpalɛ. Noko mekɛ mɔɔ bɛ gyakɛ hanle nzule ne ala la, azule ne gyakyile ɛzenlɛ! Ɛnee ɔyɛ nwanwane! Gyihova ɛmaa azule ne sɔlɔ ɛpɛ ɛyɛ bonrabonra wɔ ɛleka ko. Yeangyɛ azule ne sesanle yɛle resee!

Ɛsɔfo ne mɔ mɔɔ zo ngyekyeleɛ ɛlɛka ne la hɔgyinlanle azɛlɛ resee zo wɔ azule ne avinli. Ɛnwu bɛ wɔ nvoninli ne anu ɔ? Mekɛ mɔɔ bɛgyi ɛkɛ ne la Yizilayɛma ne amuala luale azɛlɛ resee zo pɛle Azule Dwɔdan ne!

Mɔɔ bɛ muala bɛwiele azule ne pɛ la, Gyihova manle Dwɔhyua hanle hilele mrenya anwosesebɛ 12 kɛ: ‘Bɛhɔ azule ne anu ɛleka mɔɔ ɛsɔfo ne mɔ zo ngyekyeleɛ ɛlɛka ne gyi la. Bɛsesa awolɛ 12, bɛhɔgua ɛleka mɔɔ bɛbazokoɛ ɛnɛ nɔe la. Saa kenlebie bɛ mra biza mɔɔ ɛhye kile la a, bɛze bɛ kɛ mekɛ mɔɔ Gyihova ngyekyeleɛ ɛlɛka ne pɛ Dwɔdan ne la azule ne tikale na ɔgyakyile ɛzenlɛ. Awolɛ ne bahakye bɛ nwanwane deɛ ɛhye!’ Dwɔhyua eza huohuanle awolɛ 12 wɔ ɛleka mɔɔ ɛsɔfo ne mɔ gyinlanle wɔ azule ne anu la.

Awieleɛ kolaa ne Dwɔhyua hanle hilele ɛsɔfo ne mɔ mɔɔ zo ngyekyeleɛ ɛlɛka ne la kɛ: ‘Bɛvo bɛhɔ Dwɔdan ne file zo.’ Mɔɔ bɛvole ala la, azule ne bɔle ɔ bo kɛ ɔse bieko.