Wulu kɔ nuhua edwɛkɛ ne azo

Wulu kɔ nuninyɛne ne azo

 EDWƐKƐ 11

Nyangondonle Mɔɔ Lumua

Nyangondonle Mɔɔ Lumua

ASOO ɛze debie mɔɔ Nowa lumua yɛle wɔ mekɛ mɔɔ ɔ nee ye abusua ne vi ɛlɛne ne anu vindele la ɔ? Ɔbɔle afɔle ɔmanle Nyamenle. Ɛkola ɛnwu ye wɔ nvoninli ne mɔɔ wɔ aze ɛkɛ ne la anu kɛ ɔlɛyɛ ɛhye. Nowa vale nane bɔle afɔle ɛhye lale Nyamenle ase kɛ yelie ye abusua ne yevi azuyilɛ kpole ne anu la.

Asoo ɛdie ɛdi kɛ Gyihova anye zɔle afɔle ne ɔ? Ɛhɛe, ɔ nye zɔle ye. Yemɔti ɔbɔle Nowa ɛwɔkɛ kɛ ɔnrɛva azuyilɛ ɔnrɛzɛkye ewiade ye bieko ɛlɛ.

Yeangyɛ biala azɛlɛ ne azo amuala yɛle resee, na Nowa nee ye abusua ne mɔɔ bɛvi ɛlɛne ne anu bɛvindele la bɔle asetɛnla fofolɛ bo. Nyamenle yilale bɛ na ɔzele bɛ kɛ: ‘Bɛwo mralɛ dɔɔnwo. Bɛmaa bɛ nwo ɛzo ɔhɔdwu kɛ menli badɛnla azɛlɛ ne azo ɛleka biala.’

Noko amozii, saa menli te azuyilɛ kpole ne anwo edwɛkɛ a, bie a bɛbazulo kɛ azuyilɛ zɔhane bieko bara. Yemɔti Nyamenle vale debie mɔɔ bahakye menli ye ɛwɔkɛ mɔɔ yebɔ kɛ ɔnrɛmaa azuyilɛ ɛnrɛzɛkye azɛlɛ ye amuala bieko la ɔmanle. Ɛze debie mɔɔ ɔvale ɔmanle amaa yeahakye bɛ la ɔ? Nyangondonle ɔ.

Nyangondonle ta to anwomanyunlu wɔ mekɛ mɔɔ ezule kɛdɔ kɛwie na ewia ne ɛlɛfi la. Nyangondonle bahola anyia kɔla ngɛnlɛma ngɛnlɛma dɔɔnwo. Wɔnwu bie ɛlɛ ɔ? Asoo ɛnwu mɔɔ wɔ nvoninli ye anu la ɔ?

Edwɛkɛ mɔɔ Nyamenle hanle la ɛne: ‘Mebɔ ɛwɔkɛ kɛ azuyilɛ ɛnrɛzɛkye menli nee nane amuala bieko ɛlɛ. Mebado me nyangondonle ne wɔ anwomanyunlu. Na mekɛ biala mɔɔ nyangondonle kɛdo la, mebanwu ye na meahakye me ɛwɔkɛ ne.’

Yemɔti saa ɛnwu nyangondonle a, duzu a ɔwɔ kɛ ɔkakye wɔ a? Ɛhɛe, Nyamenle ɛwɔkɛ mɔɔ ɔbɔle kɛ ɔnrɛva azuyilɛ kpole ɔnrɛzɛkye ewiade ye bieko la ɔ.