Wulu kɔ nuhua edwɛkɛ ne azo

Wulu kɔ nuninyɛne ne azo

 EDWƐKƐ 19

Gyekɔbo Lɛ Abusua Kpole

Gyekɔbo Lɛ Abusua Kpole

WƆMƆ nea abusua kpole ɛhye. Gyekɔbo amra mrenya 12 ne mɔ ɛne. Na ɛnee ɔlɛ mralɛ mraalɛ noko. Asoo ɛze ngakula ne mɔ bie duma ɔ? Maa yɛzukoa bie mɔ.

Liya wole Wulubɛn, Semɛyɔn, Livae nee Dwuda. Mɔɔ Relahyɛle nwunle kɛ ɔtɛwole ralɛ biala la, ɔ rɛle bɔle. Yemɔti ɔvale ye sonvolɛ raalɛ Belehaa ɔmanle Gyekɔbo, na Belehaa wole mralɛ mrenya nwiɔ mɔɔ bɛfɛlɛ bɛ Dan yɛɛ Nafetalae. Akee Liya noko vale ye sonvolɛ raalɛ Zelepa manle Gyekɔbo, na Zelepa wole Gaade nee Ahya. Akee eza Liya wole mralɛ mrenya nwiɔ bieko, Yesakaa nee Zɛbulɛn.

Ɛhye mɔ amuala anzi, Relahyɛle rawole ralɛ. Ɔdonle ye duma Dwosefi. Yɛbazukoa Dwosefi anwo ninyɛne dɔɔnwo amozii, ɔluakɛ ɔrayɛle sonla kpole mɔɔ anwo hyia a. Gyekɔbo amra 11 ne mɔɔ ɔnyianle bɛ mekɛ mɔɔ ɔ nee Relahyɛle ɔ ze Leeban dɛnlanle la a le ɛhye mɔ.

Gyekɔbo eza nyianle mralɛ mraalɛ, noko Baebolo ne bɔ bɛ nuhua kokye ala duma. Ye duma a le Daena.

Mekɛ bie rale mɔɔ Gyekɔbo bɔle kpɔkɛ kɛ ɔfi Leeban anwo yeazia yeahɔ Keena a. Yemɔti ɔboɔboale ye abusua kpole ne nee ye mboane ekpunli dɔɔnwo ne yɛɛ ye nlankɛ ne mɔ anloa na ɔbɔle adenle tendendenlenle ne abo.

Gyekɔbo nee ye abusua ne ziale rale Keena na ɔhyɛle ekyii la, Relahyɛle wole ralɛ nrenya bieko. Ɛhye zile mekɛ mɔɔ ɛnee bɛwɔ adendulɛ nu la. Relahyɛle awolɛ nu yɛle se kpalɛ, na ɔkawo yeawie la yɛɛ ɔwule a. Noko debie biala anyɛ adɔma ekyi ne mɔɔ ɛnee le nrenya la. Gyekɔbo donle ye duma Bɛngyaman.

Yɛkpondɛ kɛ yɛkakye Gyekɔbo amra mrenya 12 ne aluma ɔluakɛ Yizilayɛ maanle ne amuala vi bɛ nu a rale a. Nɔhalɛ nu, bɛvale Gyekɔbo amra mrenya 10 yɛɛ Dwosefi amra mrenya nwiɔ aluma a bɛdonle Yizilayɛ mbusua 12 ne a. Ayezeke dɛnlanle aze hyɛle ekyii wɔ ngakula mrenya ɛhye mɔ amuala awolɛ nzi, na ɔbayɛ kɛ ɔ nye liele kɛ ɔnyianle nlɔnra dɔɔnwo zɔhane la. Noko maa yɛnlea mɔɔ dole ye alɔnra raalɛ Daena la.