Wulu kɔ nuhua edwɛkɛ ne azo

Wulu kɔ nuninyɛne ne azo

 EDWƐKƐ 5

Asetɛnla Mɔɔ Anu Yɛ Se Bɔle Ɔ Bo

Asetɛnla Mɔɔ Anu Yɛ Se Bɔle Ɔ Bo

ADAM nee Yive yiale ngyegyelɛ dɔɔnwo wɔ Yidɛn tola ne anzi. Ɛnee ɔwɔ kɛ bɛyɛ gyima ɛsesebɛ na bɛanyia aleɛ. Kɛ anrɛɛ bɛkɛnwu mbaka ngɛnlɛma mɔɔ so ma la kɛ ɛlɛfifi la, mbowule ngakyile a bɛnwunle bɛ wɔ ɛkɛ a. Ɛhye a zile wɔ mekɛ mɔɔ Adam nee Yive andie Nyamenle na bɛangɔ zo bɛanyɛ Ɔ gɔnwo bieko la.

Akee mɔɔ tɛla ɛhye bɔbɔ la, Adam nee Yive bɔle ɔ bo kɛ bɛwu. Kakye kɛ, Nyamenle bɔle bɛ kɔkɔ kɛ saa bɛdi baka ma bie mɔɔ wɔ ɛkɛ ne la bie a bɛbawu. Kenle ko ne mɔɔ bɛlile bie la bɛbɔle ɔ bo kɛ bɛwu. Nea koasea mɔɔ bɛyɛle kɛ bɛandie Nyamenle a!

Adam nee Yive wole bɛ mra ne mɔ amuala wɔ mekɛ mɔɔ Nyamenle voanle bɛ vile Yidɛn tola ne anu la anzi. Ɛhye kile kɛ bɛ mra ne mɔ noko banyinyi na bɛawu.

Saa Adam nee Yive diele Gyihova a, yɛɛ anrɛɛ bɛ nee bɛ mra ne mɔ azedɛnlanlɛ bayɛ anyelielɛ a. Anrɛɛ bɛ muala bɛbahola bɛadɛnla aze dahuu wɔ anyelielɛ nu wɔ azɛlɛ ye azo. Anrɛɛ awie biala ɛnrɛyɛ kpanyinli, ɔ nwo ɛnrɛdo ye na yeawu bɔbɔ.

Nyamenle kpondɛ kɛ menli tɛnla aze dahuu wɔ anyelielɛ nu, na Yebɔ ɛwɔkɛ kɛ kenlebie ɔbayɛ zɔ. Tɛ azɛlɛ ne amuala azo angomekye a bayɛ kɛnlɛma a, na menli kɔsɔɔti banyia kpɔkɛdelɛ kpalɛ noko. Na awie ko biala mɔɔ wɔ azɛlɛ ne azo la nee menli kɔsɔɔti, yɛɛ Nyamenle, banyia agɔnwolɛvalɛ kpalɛ.

Noko ɛnee Yive ɛnle Nyamenle agɔnwo bieko. Yemɔti mekɛ mɔɔ ɔwo ɔ mra ne mɔ la, yeanyɛ bɛtɛɛ yeammaa ye. Ɔdele nyane. Tieyɛ mɔɔ yeanyɛ yeammaa Gyihova la vale ngyegyelɛ dɔɔnwo rɛlɛle ye, ɛnlie ɛndo nu ɔ?

Adam nee Yive nyianle mralɛ mrenya nee mraalɛ dɔɔnwo. Mɔɔ bɛwole bɛ ra nrenya mɔɔ lumua la bɛdonle ye duma Keen. Bɛvɛlɛle bɛ ra nrenya mɔɔ tɔ zolɛ nwiɔ la Ebɛle. Duzu a dole bɛ a? Ɛze ɔ?