Wulu kɔ nuhua edwɛkɛ ne azo

Wulu kɔ nuninyɛne ne azo

Kɛlata Mɔɔ Vi Neazo Eku Ne Ɛkɛ

Kɛlata Mɔɔ Vi Neazo Eku Ne Ɛkɛ

Mediema Diedima:

Kɛmɔ yɛsonle Gyihova la ati, yɛkulo ye Edwɛkɛ, Baebolo ne. Yɛdie yɛdi kɛ ɔka tetedwɛkɛ mɔɔ le nɔhalɛ, ɔmaa yɛ adehilelɛ kpalɛ yɛɛ ɔmaa yɛnwu daselɛ kɛnlɛma mɔɔ kile kɛ Gyihova kulo alesama la. (Edwɛndolɛ 119:105; Luku 1:3; 1 Dwɔn 4:19) Yɛkulo kɛ yɛboa awie mɔ yɛmaa bɛsukoa nɔhalɛ mɔɔ sonle bolɛ mɔɔ wɔ Nyamenle Edwɛkɛ ne anu la. Ɛhye ati, ɔyɛ yɛ fɛ kpalɛ kɛ yɛyɛ “Sukoa Debie Fi Baebolo Ne Anu” buluku ɛhye la. Bɛmaa yɛha nwolɛ edwɛkɛ ekyii yɛhile bɛ.

Ngakula ti a yɛyɛ buluku ɛhye a. Noko bɛbahola bɛava bɛaboa mgbanyinli mɔɔ kpondɛ kɛ bɛsukoa Baebolo ne anu debie la. Na kɛmɔ Baebolo ne wɔ ɛkɛ maa awie biala la ati, ɔda ali kɛ saa yɛ muala yɛsuzu ɛzukoalɛdeɛ mɔɔ wɔ nu la anwo a, ɔbaboa yɛ na yɛ nye alie kpalɛ.

Buluku ɛhye ka alesama anwo edwɛkɛ mɔɔ wɔ Baebolo ne anu la, ɔvi ninyɛne ɛbɔlɛ zo mɔɔ ba la. Yɛbɔ mɔdenle yɛha Baebolo ne anu edwɛkɛ ne kɛ mɔɔ bɛsisile la yɛmaa nuhua ɛla ɛkɛ wɔ adenle sikalɛ zo.

Noko akee, tɛ Baebolo ne anu edwɛkɛ ala a buluku ɛhye ka a. Adenle mɔɔ yɛlua zo yɛhɛlɛ nuhua edwɛkɛ ne nee nvoninli mɔɔ wɔ nu la bamaa Baebolo ne anu edwɛkɛ ne ayɛ anyelielɛ na yeamaa bɛanwu kɛzi menli mɔɔ bɛha bɛ nwo edwɛkɛ la dele nganeɛ la.

Buluku ɛhye boa maa yɛnwu kɛzi Baebolo ne le buluku mɔɔ ka menli nwo edwɛkɛ la​​—bɛdabɛ mɔɔ bɛdiele Gyihova yɛɛ bɛdabɛ mɔɔ bɛandie ye la. Eza ɔka yɛ ɔmaa yɛsukoa debie yɛfi bɛ neazo ne anu. (Wulomuma 15:4; 1 Kɔlentema 10:6) Bɛhyehyɛ buluku ɛhye anu  foa 14. Bɛpɛ ninyɛne mɔɔ yɛbahola yɛazukoa la bie mɔ sikalɛ wɔ foa biala mɔlebɛbo.

Saa ɛle awovolɛ a, ɛbahola ɛ nee ɛ ra agenga ɛzukoalɛdeɛ bie na bɛazuzu nwolɛ nvoninli ne anwo. Akee bɛ mu nwiɔ bɛbahola bɛagenga Baebolo ne anu edwɛkɛ ne mɔɔ bɛvale ɛzukoalɛdeɛ ne bɛvile nu la. Boa ɛ ra ne maa ɔva mɔɔ yegenga wɔ Baebolo ne anu la ɔtoto ɛzukoalɛdeɛ mɔɔ wɔ buluku ne anu la anwo. Saa yɛdua adenle ko ne ala azo yɛboa kpanyinli bie yɛmaa ɔnwu Baebolo ne anu edwɛkɛ a, ɔbaboa kpalɛ.

Yɛ nye la kɛ buluku ɛhye baboa ahonlekpalɛma kɔsɔɔti, ngakula nee mgbanyinli, yeamaa bɛazukoa debie bɛavi Nyamenle Edwɛkɛ ne anu na bɛava nuhua ɛzukoalɛdeɛ ne bɛabɔ bɛ ɛbɛla. Ɔlua zo bɛdabɛ noko bɛbahola bɛazonle ye na bɛaboka menli mɔɔ ɔkulo bɛ edwɛkɛ la anwo.

Bɛ mediema,

Gyihova Alasevolɛ Neazo Eku