Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 52

Gyihova Sogyama Mɔɔ Dede Senle Mgbɔnwɔ Zo

Gyihova Sogyama Mɔɔ Dede Senle Mgbɔnwɔ Zo

Ɛnee Selea belemgbunli Bɛneheedade ta fa konle toa Yizilayɛma. Noko ngapezonli Yilaehya bɔle Yizilayɛ belemgbunli ne kɔkɔ mekɛ biala, yemɔti bɛ sa anga ye. Yemɔti Bɛneheedade yɛle ye adwenle kɛ ɔkye Yilaehya. Ɔdele kɛ Yilaehya wɔ suakpole Dotan azo, yemɔti ɔzoanle Selea sogyama kɛ bɛhɔhye ye.

Seleama ne hɔdwule Dotan nɔɔzo. Mɔɔ Yilaehya sonvolɛ ne dwazole nwonlomɔ mangyee ne la, ɔnwunle kɛ sogyama ɛbɔ sua ne ɛyia. Ye ahonle dule na ɔbizale Yilaehya kɛ: ‘Yilaehya, duzu a yɛyɛ a?’ Yilaehya zele ye kɛ: ‘Sogyama mɔɔ nee yɛ lua la zonle tɛla bɛ.’ Ɛkɛ ne ala, Gyihova maanle Yilaehya sonvolɛ ne nwunle kɛ sogyama mɔɔ dede senle mgbɔnwɔ zo nee konle ehwili nu la ɛyi awoka mɔɔ wɔ ɛkɛ la amuala azo.

Mɔɔ Selea sogyama ne bɔle mɔdenle kɛ bɛkye Yilaehya la, ɔzɛlɛle kɛ: ‘Gyihova mesɛlɛ wɔ, maa bɛ nye ɛzi.’ Ɛkɛ ne ala, ɛnee bɛkola bɛnwu debie ɛdeɛ, noko bɛannwu ɛleka mɔɔ bɛlua a. Yilaehya zele sogyama  ne kɛ: ‘Ayi mɔ, bɛminli. Bɛdoa me na me nee bɛ bahɔ ahenle mɔɔ bɛlɛkpondɛ ye la ɛkɛ.’ Na bɛ nee Yilaehya hɔle Samɛlea, ɛleka mɔɔ Yizilayɛ belemgbunli ne de la.

Akee Seleama nwunle ɛleka mɔɔ bɛwɔ la. Yizilayɛ belemgbunli ne bizale Yilaehya kɛ: “Mengu bɛ ɔ?” Asoo Yilaehya nwunle kɛ ɔle nwolɛ adenle mɔɔ ɔbalua zo yeali menli ɛhye mɔɔ bɛngulo ye edwɛkɛ la nzenralɛ ɔ? Kyɛkyɛ. Yilaehya hanle kɛ: ‘Mmaku bɛ. Maa bɛ debie maa bɛli na gyakyi bɛ maa bɛhɔ.’ Yemɔti belemgbunli ne dole bɛ ɛkponle kpole bie na akee ɔmaanle bɛziale bɛhɔle bɛ sua zo.

“Na anwodozo mɔɔ yɛlɛ wɔ ye nu la a le kɛ, debie biala mɔɔ yɛbiza ye wɔ ye ɛhulolɛdeɛ zo la, ɔtie yɛ.”​—1 Dwɔn 5:14