Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 53

Gyɛhɔyada Akɛnrasesebɛ Ne

Gyɛhɔyada Akɛnrasesebɛ Ne

Gyɛzɛbɛle ara raalɛ a le Atalaya, na ɔ ti yɛ se kɛ ye mame la. Dwuda belemgbunli ne gyale Atalaya. Mɔɔ ɔ hu wule la, ɔ ra nrenyia a lile ebia ne a. Noko, mɔɔ ɔ ra ne wule la, ɔyɛle ɔ nwo Dwuda belemgbunli raalɛ. Ɔbɔle mɔdenle kɛ ɔku abusua ne mɔɔ bɛdi ebia ne la anu menli ne amuala, ɔhunle awie biala mɔɔ bahola ayɛ belemgbunli la, bɔbɔ ɔdaye mumua ne ye nlɔnra mrenyia. Ɛnee awie biala sulo ye.

Ɛsɔfo Kpanyinli Gyɛhɔyada nee ɔ ye Gyihɔhyɛba nwunle kɛ mɔɔ Atalaya ɛlɛyɛ la ɛnle kpalɛ fee. Bɛvale bɛ ngoane bɛdole esiane nu na bɛvale Atalaya nlɔnra ne mɔ anu ko mɔɔ bɛfɛlɛ ye Dwowahye la bɛziele. Bɛtetele ye wɔ ɛzonlenlɛ sua ne anu.

Mɔɔ Dwowahye lile ɛvolɛ nsuu la, Gyɛhɔyada vɛlɛle mgbanyima ne mɔ nee Livaema kɔsɔɔti na ɔzele bɛ kɛ: ‘Bɛzinza ɛzonlenlɛ sua nlenkɛ ne mɔ na bɛmmamaa awie biala ba ɛke.’ Akee Gyɛhɔyada ziele Dwowahye Dwuda belemgbunli na ɔzoale ye belemgbunli kyɛlɛ. Dwudama deanle nu kɛ: “Belemgbunli ɛnyi ɛhyɛ!”

Belemgbunli Raalɛ Atalaya dele kɛ menli ne ɛlɛteɛdea nuhua la, ɔhɔle ɛzonlenlɛ sua ne anu. Mɔɔ ɔnwunle belemgbunli fofolɛ ne la, ɔdeanle nu kɛ: “Maamɔlɛ! Maamɔlɛ!” Mgbanyima ne mɔ hyele ye ɛkɛ ne ala na bɛhɔhunle ye. Na ninyɛndane mɔɔ ɔyɛle wɔ maanle ne anu la noko ɛ?

Gyɛhɔyada boale maanle ne ɔmaanle bɛ nee Gyihova yɛle ngyekyeleɛ, na bɛbɔle Gyihova ɛwɔkɛ kɛ bɛbazonle Ɔ ngomekye. Gyɛhɔyada maanle bɛzɛkyele Beeyale ɛzonlenlɛ sua ne nee ye ananze ne mɔ. Ɔkpale ɛsɔfoma nee  Livaema ɔmaanle bɛyɛle gyima wɔ ɛzonlenlɛ sua ne anu amaa menli ne ahola azonle ɛkɛ bieko. Ɔkpale sinzavolɛma ɔmaanle bɛzinzale ɛzonlenlɛ sua ne amaa awie biala mɔɔ anwo ɛnde la angɔ ɛkɛ. Akee Gyɛhɔyada nee mgbanyima ne mɔ vale Dwowahye hɔle belemgbunli awuke nu na bɛdɛnlanle ye wɔ belemgbunli ebia ne azo. Dwudama anye liele. Bɛzɛkyele Atalaya atisesebɛ nee Beeyale ɛzonlenlɛ, yemɔti bɛbahola bɛazonle Gyihova kpalɛ. Wɔnwu kɛzi Gyɛhɔyada akɛnrasesebɛ ne boale menli dɔɔnwo la ɔ?

“Na bɛmmasulo bɛdabɛ mɔɔ bɛku sonlabaka ne na bɛngola bɛnzɛkye ngoane ne la; emomu, bɛzulo mɔɔ kola sɛkye ngoane ne nee sonlabaka ne amuala wɔ Gehenna la.”​—Mateyu 10:28