Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 54

Gyihova Nyianle Dwona Anwo Abotane

Gyihova Nyianle Dwona Anwo Abotane

Ɛnee menli mɔɔ wɔ Aselea suakpole Nenɛvɛ azo la le amumuyɛma. Gyihova zoanle ye ngapezonli Dwona kɛ ɔhɔbɔ Nenɛvɛ amra kɔkɔ kɛ bɛhakyi bɛ subane. Noko Dwona nriandile hɔle ɛleka fofolɛ. Ɔhɔvole meli bie kɛ ɔkɔ Tahyehye.

Mɔɔ meli ne la nyevile ne anye la, ahumu kpole bie dule, na ɔmaanle melikavolɛma ne ahonle dule. Bɛzɛlɛle bɛ nyamenle ne mɔ na bɛbizale kɛ: ‘Duzu ati a edwɛkɛ ɛhye ɛlɛsi a?’ Akee Dwona hanle hilele bɛ kɛ: ‘Medi ɛzonle. Gyihova ɛzoa me, na melɛnriandi. Bɛvuandi me bɛdo nyevile ne anu na ahumu ne bagyakyi.’ Ɛnee melikavolɛma ne ɛmkpondɛ kɛ bɛfuandi Dwona bɛto nyevile ne anu, noko ɔhanle ɔtinlinle zo kɛ bɛvuandi ye bɛdo nu. Mɔɔ bɛvuandinle ye bɛdole nyevile ne anu la, ahumu ne gyakyile.

Ɛnee Dwona dwenle kɛ ɔbawu. Mɔɔ ɔlɛnoma yeahɔ nyevile ne abo kpalɛ la, ɔyɛle asɔne. Akee Gyihova zoanle fɛlɛ kpole bie maanle ɔramenle Dwona, noko yeangu ye. Mɔɔ Dwona wɔ fɛlɛ ne akunlu la, ɔyɛle asɔne kɛ: ‘Mebɔ wɔ ɛwɔkɛ kɛ mebadie ɛ ne mekɛ biala.’ Gyihova bɔle Dwona anwo bane wɔ fɛlɛ ne akunlu too kenle nsa, na akee ɔkpule ye ɔdole file zo.

Kɛmɔ Gyihova liele Dwona ngoane la ati, asoo ɛhye kile kɛ ɔnle kɛ ɔkɔ Nenɛvɛ bieko ɔ? Kyɛkyɛ. Gyihova hanle hilele Dwona bieko kɛ  ɔhɔ Nenɛvɛ. Mekɛ ɛhye, Dwona diele. Ɔhɔle na ɔhanle ɔhilele menli zɔhane mɔɔ bɛle amumuyɛ la kɛ: “Yeha kenle abulanla na bɛazɛkye Nenɛvɛ!” Edwɛkɛ bie mɔɔ yɛ azibɛnwo la zile​​—Nenɛvɛma diele edwɛkɛ ne na bɛhakyile bɛ subane. Nenɛvɛ belemgbunli ne zele ye menli ne kɛ: ‘Bɛzɛlɛ Nyamenle, na bɛnlu bɛ nwo. Na bie a ɔnrɛzɛkye yɛ.’ Mɔɔ Gyihova nwunle kɛ Nenɛvɛma ɛnlu bɛ nwo la, yeanzɛkye bɛ.

Dwona vale ɛya kɛ bɛanzɛkye suakpole ne la. Dwenle nwolɛ nea: Gyihova nyianle Dwona anwo abotane yɛɛ ɔzele ye anwunvɔne, noko Dwona anze Nenɛvɛma anwunvɔne. Emomu, ɔhɔdɛnlanle baka bie abo wɔ suakpole ne kandiba na ɔvale ɛya. Nzinlii baka ne wule, na akee Dwona vale ɛya kpole. Gyihova hanle hilele Dwona kɛ: ‘Ɛdwenle baka ye anwo kpalɛ ɛtɛla Nenɛvɛma. Menzele bɛ anwunvɔne, na bɛnyianle ngoane.’ Duzu a ɛhye kile a? Nenɛvɛma anwo hyia kpalɛ tɛla baka biala.

‘Gyihova lɛ bɛ nwo abotane ɔluakɛ ɔngulo kɛ bɛsɛkye awie biala, emomu ɔkulo kɛ menli kɔsɔɔti nu bɛ nwo.’​—2 Pita 3:9