Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 45

Belemgbunlililɛ Ne Anu Hyɛle Nwiɔ

Belemgbunlililɛ Ne Anu Hyɛle Nwiɔ

Mɔɔ ɛnee Sɔlɔmɔn sonle Gyihova la, Yizilayɛma nyianle anzodwolɛ. Noko Sɔlɔmɔn gyale mraalɛ dɔɔnwo mɔɔ vi maanle gyɛne nu mɔɔ bɛsonle awozonle la. Yemɔti ngyikyi ngyikyi Sɔlɔmɔn adwenle hakyile na ɔbɔle ɔ bo kɛ ɔsonle awozonle. Gyihova vale ɛya. Ɔzele Sɔlɔmɔn kɛ: ‘Yizilayɛma bade bɛ nwo avi ɛ nwo na bɛ nu ahyɛ nwiɔ. Mebava foa ne mɔɔ bɛ nwo zonle la meamaa wɔ sonvolɛ ne mɔ ko, na foa ko ne mɔɔ bɛanzo la ayɛ ɛ nee wɔ abusua ne ɛdeɛ.’

Eza Gyihova maanle bɛnwunle ɛhye wienyi wɔ adenle fofolɛ zo. Ɛnee Sɔlɔmɔn sonvolɛ bie mɔɔ bɛfɛlɛ ye Gyɛlɔbowam la ɛlɛtu adenle, ɔyiale ngapezonli Ahaegya. Ahaegya tetele ye tɛladeɛ mɔɔ ɔwula la anu azinli 12, na ɔzele Gyɛlɔbowam kɛ: ‘Gyihova balie Yizilayɛ belemgbunlililɛ ne avi Sɔlɔmɔn abusua ne asa anu na yeahyɛ nuhua nwiɔ. Die azinli 10 ɔluakɛ ɛbayɛ mbusua 10 azo belemgbunli.’ Mɔɔ Belemgbunli Sɔlɔmɔn dele ɛhye la, ɔyɛle kɛ ɔku Gyɛlɔbowam! Yemɔti Gyɛlɔbowam nriandile hɔle Yigyibiti. Nzinlii, Sɔlɔmɔn wule na bɛziele ɔ ra Rilihɔbowam belemgbunli. Yemɔti Gyɛlɔbowam nwunle kɛ ɔbahola yeazia yeahɔ Yizilayɛ bieko.

Yizilayɛ mgbanyima zele Rilihɔbowam kɛ: ‘Saa ɛ nee menli  ne di ye boɛ a, bɛbali nɔhalɛ bɛamaa wɔ.’ Noko Rilihɔbowam agɔnwo mɔ mgbavolɛ dule ye folɛ kɛ: ‘Mmamaa menli ne anwo tɔ bɛ! Maa bɛyɛ gyima ɛsesebɛ!’ Rilihɔbowam diele ɔ gɔnwo mɔ mgbavolɛ folɛdulɛ ne. Ɔ ti yɛle se wɔ menli ne anwo, yemɔti menli ne dele atua. Bɛvale Gyɛlɔbowam bɛziele mbusua bulu ne azo belemgbunli na bɛvɛlɛle bɛ Yizilayɛ belemgbunlililɛ. Bɛvɛlɛle ekpunli nwiɔ ne mɔɔ hale la Dwuda belemgbunlililɛ na bɛlile nɔhalɛ bɛmaanle Rilihɔbowam. Kɛkala, Yizilayɛ mbusua ekpunli 12 ne anu ɛhyɛ nwiɔ.

Ɛnee Gyɛlɔbowam ɛngulo kɛ ye menli ne kɔsonle wɔ Gyɛlusalɛm mɔɔ wɔ Rilihɔbowam tumililɛ bo la. Ɛze deɛmɔti ɔ? Ɛnee ɔsulo kɛ menli ne badwazo atia ye ahɔli Rilihɔbowam anzi. Yemɔti ɔyɛle nvutuke ɛnlankɛ mralɛ nwiɔ na ɔzele menli ne kɛ: ‘Ɛke mɔɔ kɔ Gyɛlusalɛm la wale. Bɛbahola bɛazonle wɔ ɛke ala.’ Menli ne bɔle ɔ bo zonlenle nvutuke nlankɛ mralɛ ne mɔ na bɛ rɛle vile Gyihova bieko.

“Bɛ nee menli mɔɔ bɛnle diedima la mmatu. Na agɔnwolɛvalɛ boni a wɔ tenleneyɛlɛ nee amumuyɛyɛlɛ avinli a? . .  Anzɛɛ kyɛfoa boni a diedinli nee mɔɔ ɛnle diedinli la lɛ a?”​​—2 Kɔlentema 6:14, 15