Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 39

Yizilayɛma Belemgbunli Mɔɔ Limoa

Yizilayɛma Belemgbunli Mɔɔ Limoa

Gyihova maanle Yizilayɛma ndɛnebuavolɛma mɔɔ nea bɛ nwo zo a, noko bɛhanle kɛ bɛkpondɛ belemgbunli. Bɛzele Samoɛle kɛ: ‘Maanle mɔɔ ɛbɔ yɛ nwo ɛyia la amuala lɛ arelemgbunli. Yɛdayɛ noko yɛkpondɛ bie.’ Samoɛle nwunle kɛ ɛhye ɛnle adwenle kpalɛ, yemɔti ɔyɛle nwolɛ asɔne. Gyihova zele ye kɛ: ‘Tɛ ɛdawɔ a menli ne ɛlɛkpo wɔ a. Medame a bɛlɛkpo me a. Ka kile bɛ kɛ bɛbanyia belemgbunli noko ɔbamaa bɛayɛ ninyɛne dɔɔnwo.’ Noko menli ne hanle kɛ: ‘Ɔnvale yɛ nwo, yɛmɛ yɛkpondɛ belemgbunli!’

Gyihova hanle hilele Samoɛle kɛ ɔbamaa nrenyia bie mɔɔ bɛfɛlɛ ye Sɔɔlo la ali bɛ belemgbunli. Mekɛ mɔɔ Sɔɔlo hɔkpɔlale Samoɛle wɔ Releema la, ɔvale nwole ɔkpokpale ye kɛ Yizilayɛ belemgbunli mɔɔ limoa.

Akee Samoɛle maanle Yizilayɛma amuala yiale kɛ ɔfa bɛ belemgbunli fofolɛ ne yeahile bɛ. Noko ɛnee bɛnnwu Sɔɔlo wɔ ɛkɛ. Ɛnea a duzu ati ɔ? Ɔluakɛ ɔnriandile ɔhɔveale. Nzinlii mɔɔ bɛnwunle Sɔɔlo la, bɛ nee ye rale menli ne anyunlu. Ɛnee ɔwale ɔtɛla awie biala yɛɛ ɛnee ɔ nwo yɛ fɛ kpalɛ. Samoɛle hanle kɛ: ‘Bɛnlea ahenle mɔɔ Gyihova ɛkpa nu ɛye ye la.’ Menli ne deanle nu kɛ: ‘Belemgbunli, nyi kyɛ!’

Mɔlebɛbo ne, Sɔɔlo diele Samoɛle nee Gyihova. Noko amozii ɔhakyile. Kɛ neazo la, ɛnee ɔnle kɛ belemgbunli ne bɔ afɔle. Kenle ko, Samoɛle hanle hilele Sɔɔlo kɛ ɔhendɛ ye, noko Samoɛle amba ndɛ. Yemɔti Sɔɔlo zile kpɔkɛ kɛ ɔdaye mumua ne ɔbabɔ afɔle ne. Duzu a Samoɛle yɛle a? Ɔhanle ɔhilele ye kɛ: ‘Anrɛɛ ɔwɔ kɛ ɛtie Gyihova.’ Asoo Sɔɔlo zukoale debie vile ɛtane mɔɔ ɔyɛle la anu ɔ?

Nzinlii, Sɔɔlo hɔle kɛ ɔ nee Amalɛkema kaho. Samoɛle hanle hilele ye kɛ anrɛɛ ɔmmagyakyi sonla ko bɔbɔ. Noko Sɔɔlo gyakyile Egage, bɛ belemgbunli ne. Gyihova zele Samoɛle kɛ: ‘Sɔɔlo ɛkpo me yɛɛ ɔndie me ne.’ Samoɛle lile nyane kpole na ɔzele Sɔɔlo kɛ: ‘Kɛmɔ ɛndie Gyihova ane la ati, ɔbakpa belemgbunli fofolɛ.’ Mɔɔ Samoɛle hakyile  ɔ nwo kɛ ɔkɔ la, Sɔɔlo zɔle ye tɛladeɛ ne anu, yemɔti ye tɛladeɛ aguzo ne anloa dele. Akee Samoɛle zele ye kɛ: ‘Gyihova ɛlie belemgbunlililɛ ne ɛvi ɛ sa nu.’ Ɛnee Gyihova bava belemgbunlililɛ ne amaa awie fofolɛ mɔɔ ɔkulo ye na ɔtie ye la.

‘Tieyɛ le kpalɛ tɛla azubɔlɛ.’​​—1 Samoɛle 15:22