Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 42

Dwɔnatan Lɛ Akɛnrasesebɛ Yɛɛ Ɔdi Nɔhalɛ

Dwɔnatan Lɛ Akɛnrasesebɛ Yɛɛ Ɔdi Nɔhalɛ

Ɛnee Belemgbunli Sɔɔlo ara Dwɔnatan le sogyanli mɔɔ lɛ akɛnrasesebɛ. Devidi hanle kɛ Dwɔnatan anwo yɛ ndɛ kɛ kɔleɛ yɛɛ ɔ nwo yɛ se kɛ awenade. Kenle ko bie, Dwɔnatan nwunle Filisitia sogyama 20 kɛ bɛgyi boka bie azo. Ɔhanle ɔhilele ye sonvolɛ ne mɔɔ lɛ ye konle ninyɛne ne la kɛ: ‘Saa Gyihova maa yɛ sɛkɛlɛneɛ a, yɛbahɔ yɛ nee bɛ aho. Saa bɛka kɛ yɛ nee bɛ ɛraho a, yɛbahɔ.’ Filisitiama ne deanle nu kɛ: ‘Bɛrɛla bɛmaa yɛho!’ Yemɔti bɛvole boka ne, bɛ nee Filisitiama hɔhonle na bɛlile konim.

Kɛmɔ Dwɔnatan a le Sɔɔlo ara kpanyinli la ati, ɔdaye a ɔwɔ kɛ ɔdi belemgbunli a. Noko kɛmɔ ɔze kɛ Gyihova ɛkpa Devidi kɛ ɔli belemgbunli la ati, ɔ nye ambolo ye. Dwɔnatan nee Devidi rayɛle agɔnwolɛma kpalɛ. Bɛbɔle ɛwɔkɛ kɛ bɛ nuhua ko biala babɔ ɔ gɔnwo  anwo bane. Dwɔnatan vale ye tɛladeɛ, konle dadeɛ, atwɛ nee ye bɛlɛte maanle Devidi ɔvale ɔhilele kɛ bɛle agɔnwolɛ.

Mɔɔ Devidi ɛlɛnriandi Sɔɔlo la, Dwɔnatan nee ye hɔle na ɔmaanle ye anwosesebɛ kɛ: ‘Gyinla kpundii na si ɛ kɛnra. Gyihova ɛkpa wɔ kɛ belemgbunli. Me papa bɔbɔ ze ɛhye.’ Saa ɛlɛ agɔnwolɛ kpalɛ mɔɔ le kɛ Dwɔnatan a, anrɛɛ ɔnyɛ wɔ fɛ ɔ?

Dwɔnatan vale ye ngoane dole esiane nu boale Devidi fane dɔɔnwo. Ɛnee ɔze kɛ ye papa Sɔɔlo kpondɛ kɛ ɔku Devidi, yemɔti ɔhanle ɔhilele ye papa kɛ: ‘Ɔle ɛtane kpole kɛ ɛbahu Devidi; ɔluakɛ ɔtɛyɛle wɔ ɛtane biala.’ Sɔɔlo vale Dwɔnatan anwo ɛya kpole. Nzinlii, Sɔɔlo nee Dwɔnatan wule konle nu.

Mɔɔ Dwɔnatan wule la, Devidi hɔkpondɛle ɔ ra nrenyia Mɛfebɔhyɛte. Mɔɔ Devidi nwunle Mɛfebɔhyɛte la, ɔzele ye kɛ: ‘Kɛmɔ ɛnee wɔ papa le me gɔnwo kpalɛ la ati, mebanlea wɔ kɔkpula kɛ ɛbawu. Me nee wɔ badɛnla me belemgbunli sua nu ɛkɛ na ɛ nee me adɛnla ɛkponle ko anwo ali aleɛ.’ Devidi arɛle anvi Dwɔnatan ɛlɛ.

“Bɛhulo bɛ nwo kɛ mɔɔ mehulo bɛ la. Awie biala ɛnlɛ ɛlɔlɛ kpole ɛndɛla ɛhye, kɛ awie kɛva ye ngoane kɛbɔ afɔle kɛmaa ɔ gɔnwo mɔ.”​—Dwɔn 15:12, 13