Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 38

Gyihova Maanle Samesɛn Anwo Yɛle Se

Gyihova Maanle Samesɛn Anwo Yɛle Se

Yizilayɛma dɔɔnwo hɔzonlenle awozonle bieko, yemɔti Gyihova maanle Filisitiama honle vale bɛ. Noko ɛnee Yizilayɛma bie mɔ kulo Gyihova. Bɛ nuhua ko a le Manowa. Ɛnee ɔ nee ɔ ye ɛtɛwole. Kenle ko, Gyihova zoanle anwumabɔvolɛ wɔ Manowa aye ne anwo ɛkɛ. Anwumabɔvolɛ ne zele ye kɛ: ‘Ɛbawo ralɛ nrenyia. Ɔbalie Yizilayɛma yeavi Filisitiama asa nu. Ɔbayɛ Nazalaenli.’ Nwane mɔ a ɛnee bɛfɛlɛ bɛ Nazalaema a? Ɛnee bɛle Gyihova azonvolɛ titili. Ɛnee Nazalaema ɛmkpa bɛ ti enrinli.

Mekɛ hɔle bie la, bɛwole kakula ne na bɛdonle ye Samesɛn. Mɔɔ Samesɛn yɛle kpanyinli la, Gyihova maanle ɔ nwo yɛle se kpalɛ. Ɛnee ɔkola ɔfa ɔ sa mgbane ɔku awenade. Kenle ko bie, Samesɛn angomekye hunle Filisitiama 30. Filisitiama kpɔle ye na ɛnee bɛlɛkpondɛ adenle bɛalua zo bɛahu ye. Kenle ko bie mɔɔ Samesɛn hɔle Gaza la, bɛhɔziale sua ne anlenkɛ kpole ne anloa kɛ saa aleɛ kye a, bɛbahu ye. Noko nɔe ne, Samesɛn dwazole hɔle suakpole ne anlenkɛ kpole ne anwo na ɔdule ye. Ɔvale anlenkɛ ne ɔdole ɔ kɔme zo ɔhɔle boka bie mɔɔ bikye Hibulɔn la azo!

Nzinlii, Filisitiama hɔle Samesɛn nwewe bie mɔɔ bɛfɛlɛ ye Dɛlaela la ɛkɛ hɔzele ye kɛ: ‘Saa ɛmaa yɛnwu deɛmɔti Samesɛn anwo yɛ se zɔhane la a, yɛbamaa wɔ dwɛtɛ fufule apenle apenle. Yɛkulo kɛ yɛkye ye yɛto efiade.’ Dɛlaela liele dole nuhua. Mɔlebɛbo ne, Samesɛn anga deɛmɔti ɔ nwo yɛ se la angile ye. Noko amozii ɔgyegyele Samesɛn too ɔmaanle ɔhanle ye fealeranu edwɛkɛ biala ɔhilele ye. Ɔse: ‘Mele Nazalaenli yemɔti bɛtɛpepɛle me ti enrinli ɛlɛ.’ Ɔdoale zo kɛ ‘Saa bɛpepɛ me ti enrinli a, me anwosesebɛ ne amuala baminli.’ Samesɛn ɛyɛ nvonleɛ kpole kɛ yeha yehile ye a, ɔnle zɔ ɔ?

 Ndɛndɛ ne ala Dɛlaela hanle hilele Filisitiama kɛ: ‘Kɛkala akee yeha debie biala yehile me!’ Ɔmaanle Samesɛn lafele ɔ gyakɛ azo na ɔmaanle awie pepɛle ye enrinli ne. Ɔdeanle nu kɛ: ‘Samesɛn, Filisitiama ɛra ɛ nwo zo!’ Mɔɔ Samesɛn dwazole la, ɔnwunle kɛ ye anwosesebɛ ne ɛhɔ. Filisitiama ne hyele ye, bɛbobɔle ɔ nye na bɛvale ye bɛdole efiade.

Kenle ko, Filisitiama hɔyiale bɛ bozonle Deegɔn ɛzonlenlɛ sua ne anu na bɛdeɛdeanle nuhua kɛ: ‘Yɛ bozonle ne ɛye Samesɛn ɛmaa yɛ! Bɛva ye bɛvinde bɛmaa ɔlielie yɛ nye!’ Bɛvale ye bɛziele mpila nwiɔ avinli na bɛgolole ɔ nwo. Samesɛn deanle nu kɛ: ‘O Gyihova, mesɛlɛ wɔ maa me anwosesebɛ wɔ mekɛ ɛhye anu.’ Ɛnee Samesɛn enrinli ne ɛvi bieko. Ɔvale ye anwosesebɛ kɔsɔɔti ɔzuhunle mpila nwiɔ ne mɔɔ sosɔ bɛ ɛzonlenlɛ sua ne la. Ɛzonlenlɛ sua ne amuala bule guale aze na ɔhunle menli mɔɔ wɔ nu la kɔsɔɔti. Samesɛn noko wule.

“Melɛ anwosesebɛ wɔ debie biala anu ɔlua ahenle mɔɔ maa me tumi la ati.”​​—Felepaema 4:13