Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 30

Releehabe Vale Busiama Ne Veale

Releehabe Vale Busiama Ne Veale

Mɔɔ Yizilayɛ busiama ne hɔle Gyɛleko la, bɛdɛnlanle raalɛ bie mɔɔ bɛfɛlɛ ye Releehabe la sua nu. Gyɛleko belemgbunli ne dele nwolɛ edwɛkɛ na ɔzoanle sogyama wɔ Releehabe sua nu ɛkɛ. Ɔvale busiama ne ɔveale ye sua ne ati zo anwuma na ɔmaanle sogyama ne vale ɛleka fofolɛ hɔle. Ɔhanle ɔhilele busiama ne kɛ: ‘Mebaboa bɛ ɔluakɛ meze kɛ Gyihova nee bɛ lua yɛɛ bɛbava azɛlɛ ne. Mesɛlɛ bɛ, bɛbɔ me ɛwɔkɛ kɛ bɛbalie me sua nu amra.’

Busiama ne hanle hilele Releehabe kɛ: ‘Yɛbɔ wɔ ɛwɔkɛ kɛ awie biala mɔɔ wɔ wɔ sua nu ɛke la ɛnrɛwu, fa nyɛma kɔkɔlɛ ɛhye kenda wɔ nvɛnzɛlɛ ne na yɛnrɛhu bɛ.’

Releehabe vale nyɛma zɔle ye nvɛnzɛlɛ ne ɔmaanle busiama ne luale nwolɛ dwule aze. Bɛhɔveale awoka ne mɔ azo lɔ too kenle nsa na bɛahɔ Dwɔhyua anwo ɛkɛ. Akee Yizilayɛma pɛle Azule Dwɔdan ne kɛ bɛkava azɛlɛ ne. Gyɛleko sua ne a bɛlimoale bɛvale a. Gyihova hanle hilele menli ne kɛ bɛdia kilikili bɛbɔ suakpole ne mgbɔlɔka  bɛyia kenle ko biala. Bɛbayɛ ɛhye too kenle nsia. Kenle ne mɔɔ tɔ zolɛ nsuu la, bɛdiale kilikili bɛbɔle sua ne mgbɔlɔka fane nsuu. Akee ɛsɔfo ne mɔ bɔle bɛ aweɛne ndendenle ne, na sogyama ne deanle nuhua kpole kpalɛ. Sua ne bane ne dele guale! Noko Releehabe sua ɛdeɛ ne mɔɔ zua bane ne la ande angua. Releehabe nee ye sua nu amra anwu ɔluakɛ ɔliele Gyihova ɔlile.

“Tɛ zɔhane ala a bɛluale . . . Releehabe gyima zo bɛbuale ye benle wɔ mekɛ mɔɔ ɔliele busiama ne kɛnlɛma na ɔmaanle bɛluale adenle fofolɛ nu bɛhɔle la ɔ?”​​—Gyemise 2:25