Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 35

Hana Yɛle Asɔne Kɛ Nyamenle Ɛmaa Ɔwo

Hana Yɛle Asɔne Kɛ Nyamenle Ɛmaa Ɔwo

Ɛnee Yizilayɛnli bie mɔɔ bɛfɛlɛ ye Ɛlekana la gya mraalɛ nwiɔ. Bɛfɛlɛ bɛ Hana yɛɛ Pɛnena, noko ɛnee ɔkulo Hana kpalɛ. Kɛmɔ Pɛnena wole dɔɔnwo na Hana ɛtɛwole la ati, ɛnee ɔgolo Hana anwo dahuu. Ɛvolɛ biala, ɛnee Ɛlekana nee ye abusua ne kɔsonle wɔ Hyaelo. Mekɛ bie mɔɔ bɛhɔle Hyaelo la, ɔnwunle kɛ ye kulovolɛ Hana ɛlɛdi nyane. Ɔzele ye kɛ: ‘Hana, mmasu bieko. Mewɔ ɛke yɛɛ mekulo wɔ.’

Nzinlii, Hana angome hɔle kɛ ɔkayɛ asɔne. Ɔvale ɛzunlɛ ɔzɛlɛle Gyihova kɛ ɔboa ye. Ɔbɔle ɛwɔkɛ kɛ: ‘Gyihova, saa ɛmaa mewo kakula nrenyia a, mebava ye meamaa wɔ na yeazonle wɔ ye ngoane mekɛ kɔsɔɔti anu.’

Ɛsɔfo Kpanyinli Yilae nwunle Hana kɛ ɔlɛsu la, ye adwenle yɛle ye kɛ Hana ɛbo. Hana buale kɛ: ‘Me menle, metɛbole. Melɛ ngyegyelɛ kpole na yemɔ a melɛka nwolɛ edwɛkɛ meahile Gyihova a.’ Yilae nwunle kɛ ɔtɛbole, yemɔti ɔzele Hana kɛ: ‘Nyamenle ɛva mɔɔ ɛkpondɛ la ɛmaa wɔ.’ Hana arɛle kyekyele na ɔhɔle sua nu. Yeandwu ɛvolɛ ko yɛɛ ɔwole ralɛ nrenyia a, na ɔdonle ye Samoɛle. Ɛnea a, kɛzi Hana anyelielɛ ne bayɛ ɛ?

 Hana arɛle anvi ɛwɔkɛ mɔɔ ɔbɔle Gyihova la. Mɔɔ ɔpɛle Samoɛle nyɛfonlɛ ala la yɛɛ ɔvale ye ɔhɔle ɛdanlɛsua ne anu a. Ɔhanle ɔhilele Yilae kɛ: ‘Kakula ne mɔɔ ɛnee melɛyɛ nwolɛ asɔne la ɛne. Meva ye mehyɛ Gyihova bɔkɔɔ.’ Ɛnee Ɛlekana nee Hana kɔkpɔla Samoɛle ɛvolɛ biala na bɛmaa ye adɛladeɛ fofolɛ. Nzinlii, Gyihova maanle Hana wole ngakula nnu bieko, mrenyia nsa yɛɛ mraalɛ nwiɔ.

“Bɛhɔ zo bɛbiza, na bɛ sa baha ye; bɛhɔ zo bɛkpondɛ, na bɛbanwu ye.”​​—Mateyu 7:7