Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 32

Adekilevolɛ Fofolɛ Nee Mraalɛ Nwiɔ Mɔɔ Bɛlɛ Akɛnrasesebɛ

Adekilevolɛ Fofolɛ Nee Mraalɛ Nwiɔ Mɔɔ Bɛlɛ Akɛnrasesebɛ

Dwɔhyua lile Nyamenle menli ne anyunlu ɛvolɛ dɔɔnwo, mɔɔ ɔnyianle ɛvolɛ 110 la ɔwule. Yizilayɛma zonlenle Gyihova wɔ mekɛ mɔɔ Dwɔhyua de aze la. Noko mɔɔ ɔwule la, bɛbɔle ɔ bo kɛ bɛsonle awozonle kɛ mɔɔ ɛnee Keenama yɛ la. Kɛ mɔɔ bɛyɛle Gyihova anwo anzosesebɛ la ati, ɔmaanle Keena belemgbunli Gyeeben hilele bɛ nyane. Yizilayɛma zunle vɛlɛle Gyihova. Yemɔti Gyihova maanle bɛ adekilevolɛ fofolɛ, yemɔ a le Balake. Ɔbaboa menli ne yeamaa bɛazia bɛazonle Gyihova.

Ngapezonli raalɛ Dɛbola zoanle kɛ bɛhɔvɛlɛ Balake bɛrɛla. Ɛnee ɔwɔ kɛ ɔka Gyihova nrɛlaleɛ bie ɔkile ye: ‘Fa mrenyia 10,000 na kɔyia Gyeeben sogyama ne wɔ azudenle Kaehyɔn ne anloa. Ɛbali Gyeeben sogya kpanyinli Sesɛla anwo zo konim.’ Balake zele Dɛbola kɛ: ‘Mebahɔ, noko kyesɛ ɛkɔ bie.’ Ɔhanle kɛ: ‘Me nee wɔ bahɔ. Noko tɛ ɛdawɔ a ɛbahu Sesɛla a. Gyihova se raalɛ a bahu ye a.’

Dɛbola nee Balake nee ye sogyama ne hɔle Teebɔ Boka ne azo kɛ bɛkaziezie bɛ nwo bɛamaa konle ne. Mɔɔ Sesɛla dele la, ɔboɔboale ye konle ehwili ne mɔ nee ye sogyama ne anloa wɔ  bɔnza ne anu. Dɛbola zele Balake kɛ: ‘Ɛnɛ, Gyihova bamaa wɔali konim.’ Balake nee ye menli 10,000 ne hɔyiale Sesɛla sogyama mɔɔ ze konle nye zo la wɔ bɔnza ne anu.

Gyihova maanle azudenle Kaehyɔn ne yile. Sesɛla konle ehwili ne mɔ miminle ndɛtɛlɛ ne anu. Yemɔti ɔgyakyile ye konle ehwili ne ɛkɛ na ɔnriandile. Balake nee ye sogyama lile Sesɛla menli ne anwo zo konim, noko Sesɛla nriandile! Ɔnriandile ɔhɔveale raalɛ bie mɔɔ bɛfɛlɛ ye Gyeeyɛle la ɛdanlɛsua nu. Gyeeyɛle maanle ye meleke ɔnlonle na ɔvale kundu ɔguale ɔ nwo. Sesɛla mɔɔ ɛvɛ la lale botoo. Akee Gyeeyɛle yɛle nyaa nyaa hɔvale ɛdanlɛsua baka ekyi bie wɔle ɔ ti anu maanle ɔwule.

Balake rale kɛ ɔbakpondɛ Sesɛla. Gyeeyɛle vi ye sua ne anu razele ye kɛ: ‘Bɛla banlea ahenle mɔɔ ɛlɛkpondɛ ye la, mebahile wɔ.’ Balake hɔle sua ne anu na ɔnwunle kɛ yewu ɔla ɛkɛ. Yemɔti Balake nee Dɛbola dole edwɛne yele Gyihova ayɛlɛ kɛ yemaa Yizilayɛma ɛli bɛ agbɔvolɛ nwo zo konim la. Yizilayɛma dɛnlanle anzodwolɛ nu too ɛvolɛ 40.

‘Mraalɛ mɔɔ vale edwɛkɛ ne hɔle la zonle.’​​—Edwɛndolɛ 68:11