Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 25

Ɛzonlenlɛ Ɛdanlɛsua

Ɛzonlenlɛ Ɛdanlɛsua

Mosisi hɔle Saenae Boka ne azo la, Gyihova hanle kɛ ɔzi tɛnte bie mɔɔ bɛfɛlɛ ye ɛdanlɛsua la, na ɛkɛ ne a Yizilayɛma bazonle Ye a. Bɛbahola bɛadudu ɛdanlɛsua ne bɛahɔ ɛleka biala mɔɔ bɛlɛkɔ la.

Gyihova hanle kɛ: ‘Ka kile menli ne kɛ bɛva debie biala mɔɔ bɛbahola la bɛboa bɛmaa bɛva bɛzi ɛdanlɛsua ne.’ Yizilayɛma vale nvutuke, dwɛtɛ fufule, kɔbele, awolɛ mɔɔ sonle bolɛ yɛɛ agudeɛ rale. Eza bɛvale mboane enrinli, lenen, nane nwoma, yɛɛ ninyɛne ngakyile dɔɔnwo bɛrale. Bɛvale ninyɛne dɔɔnwo bɛrale yemɔti Mosisi hanle hilele bɛ kɛ: ‘Mɔɔ yɛnyia la le kpalɛ! Bɛmmafa bieko bɛba.’

Mrenyia nee mraalɛ dɔɔnwo mɔɔ bɛze ninyɛne ngakyile yɛ la boale maanle bɛzile ɛdanlɛsua ne. Gyihova maanle bɛ nrɛlɛbɛ ɔmaanle bɛyɛle gyima ne. Bie mɔ vale nyɛma nwonle ninyɛne ngakyile. Bie mɔ zieziele awolɛ, bie mɔ vale nvutuke yɛle ninyɛne ngakyile yɛɛ bie mɔ zele mbaka.

Bɛzile ɛdanlɛsua ne kɛ mɔɔ Gyihova hanle kɛ bɛyɛ ye la. Bɛyɛle mgbɛnu ɛdanlɛ kɛnlɛma ko bɛhyɛle ɛdanlɛsua ne anu nwiɔ, Nwuanzanwuanza Ɛleka yɛɛ Nwuanzanwuanza Nu Nwuanzaanwu Ɛleka. Ɛnee ngyekyeleɛ ɛlɛka ne mɔɔ bɛva akasea baka yɛɛ nvutuke a bɛyɛ la gyi Nwuanzanwuanza Nu Nwuanzaanwu Ɛleka ne. Ɛkɛ ne a kɛnlaneɛ baka ne, ɛkponle ne yɛɛ afɔlemokyea mɔɔ bɛbayela ayilevuanlɛ zo la wɔ a. Kɔbele kyɛnze kpole yɛɛ afɔlemokyea kpole bie gyigyi alie ne anwo. Ngyekyeleɛ ɛlɛka ne hakyele Yizilayɛma  kɛ bɛbɔ Gyihova ɛwɔkɛ kɛ bɛbadie ye. Ɛze ngyekyeleɛ deɛ holɛ ɔ? Ɔle ɛwɔkɛ titili bie.

Gyihova kpale Aalɔn nee ɔ mra ne mɔ kɛ bɛbayɛ ɛsɔfoma wɔ ɛdanlɛsua ne anu. Ɛnee ɔwɔ kɛ bɛsiezie ɛkɛ na bɛbɔ afɔle wɔ ɛkɛ bɛmaa Gyihova. Ɛnee Aalɔn mɔɔ le ɛsɔfo kpanyinli la angomekye a kola kɔ Nwuanzanwuanza Nu Nwuanzaanwu Ɛleka ne a. Ɛvolɛ biala ɔkɔ ɛkɛ ne kokye ɔkɔbɔ ɔdaye, ye abusua ne yɛɛ Yizilayɛ maanle ne amuala ɛtane nwo afɔle.

Yizilayɛma vile Yigyibiti la, ye ɛvolɛ ko anzi yɛɛ bɛwiele ɛdanlɛsua ne si a. Yemɔti akee bɛnyianle ɛleka mɔɔ bɛbazonle Gyihova a.

Gyihova hilele kɛ ɔ nye die ɛdanlɛsua ne anwo na ɔmaanle amungu hedale zolɛ. Saa amungu ne ɛtɛfile ɛdanlɛsua ne azo a, Yizilayɛma ɛngɔ ɛleka biala. Noko saa amungu ne maa ɔ nwo zo a, ɛnee bɛnwu kɛ ɔwɔ kɛ bɛtu bɛ bo. Bɛtudu ɛdanlɛsua ne na bɛdi amungu ne anzi.

“Akee mendele ɛnelɛ kpole bie menvile belemgbunli ebia ne azo kɛ: ‘Nea! Nyamenle ɛdanlɛsua ne wɔ alesama avinli, na ɔ nee bɛ badɛnla na bɛayɛ ye menli. Na Nyamenle mumua ne nee bɛ badɛnla.’”​​—Yekile 21:3