Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 18

Kpɔkɛ Mɔɔ Ɛlɛsɔ

Kpɔkɛ Mɔɔ Ɛlɛsɔ

Mosisi lile ɛvolɛ 40 wɔ Medean. Ɔgyale na ɔwole mralɛ. Kenle ko bie mɔɔ ɛnee ɔlɛnea ye mboane wɔ ɛleka bie mɔɔ bikye Saenae Boka la, ɔnwunle debie bie mɔɔ yɛ azibɛnwo la. Ɛnee kpɔkɛ bie ɛlɛsɔ, noko ɔnyela! Mɔɔ Mosisi bikyele ye kɛ ɔnea ye kpalɛ la, ɛnelɛ bie vi kpɔkɛ ne anu zele ye kɛ: ‘Mosisi! Mmabikye ye. Yeye wɔ mgbɔlaboa ne, ɔluakɛ ɛleka mɔɔ ɛgyi la le nwuanzanwuanza.’ Gyihova a ɛnee ɔlɛdua anwumabɔvolɛ nwo zo ɔ nee Mosisi adendɛ a.

Ɛnee Mosisi sulo yemɔti ɔhedale ɔ nyunlu. Ɛnelɛ ne hanle kɛ: ‘Menwu kɛzi Yizilayɛma ɛlɛnwu amaneɛ la. Mebalie bɛ meavi Yigyibitima asa anu na me nee bɛ ahɔ azɛlɛ kpalɛ zo. Ɛdawɔ a ɛbaye me menli ne wɔavi Yigyibiti a.’ Ɛnlie ɛnli kɛ ɛhye zinle Mosisi anwo ɔ?

Mosisi bizale kɛ: ‘Saa mekɔ na bɛbiza me kɛ nwane a zoanle me a, duzu edwɛkɛ a menga a?’ Nyamenle buale kɛ: ‘Ka kile bɛ kɛ Gyihova, Ebileham Nyamenle ne, Ayezeke Nyamenle ne, nee Gyekɔbo Nyamenle ne a ɛzoa me bɛ nwo ɛke a.’ Mosisi bizale kɛ: ‘Na saa menli ne andie me ɛ?’ Gyihova maanle Mosisi nwunle kɛ amgba ɔbaboa ye. Ɔhanle ɔhilele Mosisi kɛ ɔvuandi ye baka ne ɔdo azɛlɛ ne anwo. Baka ne hakyile ɛwɔlɛ! Mɔɔ Mosisi zɔle ɛwɔlɛ ne adua la, ɔhakyile baka bieko. Gyihova hanle kɛ: ‘Saa ɛyɛ sɛkɛlɛneɛ ɛhye ɛkile bɛ a, ɔbamaa bɛalie bɛali kɛ medame a mezoa wɔ a.’

Mosisi hanle kɛ: ‘Me nloa ɛtɛtele.’ Gyihova bɔle ye ɛwɔkɛ kɛ: ‘Mebahile wɔ mɔɔ ɔwɔ kɛ ɛka la, mebamaa ɛ diema Aalɔn aboa wɔ.’ Kɛmɔ Mosisi nwunle kɛ Gyihova nee ye lua la ati, ɔ nee ɔ ye nee ɔ mra ne mɔ ziale hɔle Yigyibiti.

“Bɛmmadwenledwenle kɛzi bɛbadendɛ anzɛɛ mɔɔ bɛbaha la anwo, ɔluakɛ bɛbava mɔɔ bɛbaha la bɛamaa bɛ wɔ dɔnehwele zɔhane anu.”​​—Mateyu 10:19