Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 12

Gyekɔbo Asa Hanle Agyapadeɛ Ne

Gyekɔbo Asa Hanle Agyapadeɛ Ne

Ayezeke lile ɛvolɛ 40 la yɛɛ ɔgyale Relɛbɛka a. Ɛnee ɔkulo Relɛbɛka kpalɛ. Mekɛ hɔle bie la, bɛwole ngakula nwiɔ​​—ɛnee bɛle ndalɛ.

Bɛfɛlɛ kpanyinli ne Yisɔ yɛɛ kakula ne Gyekɔbo. Ɛnee Yisɔ kulo ɛvindelɛ yɛɛ ɛnee ɔze ɛbɔlɛ nye zo kpalɛ. Noko ɛnee Gyekɔbo ɛngulo ɛvindelɛ.

Tete ne, ɛnee saa papa ne wu a, bɛfa ye azɛlɛ nee ye ezukoa ne anu dɔɔnwo bɛmaa ɔ ra nrenyia kpanyinli ne. Bɛfɛlɛ ɛhye agyapadeɛ. Wɔ Ayezeke abusua ne anu, ɛnee ɛwɔkɛ mɔɔ Gyihova ɛbɔ Ebileham la boka agyapadeɛ ne anwo. Ɛnee ɛwɔkɛ ɛhye mɔ anwo edwɛkɛ ɛngyia Yisɔ noko ɛnee Gyekɔbo ze kɛ ɔhyia kpalɛ.

Kenle ko bie, Yisɔ vi ɛbɔlɛlilɛ rale la ɛnee yevɛ kpalɛ. Mekɛ mɔɔ ɔdele aleɛ ne mɔɔ Gyekɔbo ɛlɛto evuanlɛ la, ɔhanle kɛ: ‘Ɛhɔne ɛlɛku me! Maa me wɔ subue ne bie menli.’ Gyekɔbo hanle kɛ: ‘Mebamaa wɔ bie, noko dimoa ka ndane kɛ wɔ agyapadeɛ ne bayɛ me ɛdeɛ.’ Yisɔ hanle kɛ: ‘Duzu a le agyapadeɛ? Ɛbahola wɔava. Aleɛ a mekpondɛ meali a.’ Asoo nrɛlɛbɛ wɔ mɔɔ Yisɔ yɛle la anu? Kyɛkyɛ. Yisɔ vale debie mɔɔ hyia kpalɛ la maanle liele subue ala.

 Mɔɔ Ayezeke yɛle ɛrelera la, ɛnee ɔwɔ kɛ ɔyila ɔ ra kpanyinli ne. Noko Relɛbɛka boale ɔ ra kakula ne ɔmaanle ɔliele nyilalɛ ne. Mɔɔ Yisɔ dele la, ɔvale ɛya na ɔhanle kɛ ɔku ɔ diema ne. Ɛnee Ayezeke nee Relɛbɛka kulo kɛ bɛbɔ Gyekɔbo anwo bane, yemɔti bɛzele ye kɛ: ‘Nriandi kɔ wɔ ankele Leeban anwo lɔ kɔkpula kɛ Yisɔ ɛya ne kɛha aze.’ Gyekɔbo diele bɛ folɛdulɛ ne na ɔnriandile ɔhɔle.

“Saa sonla nyia ewiade ye amuala na ɔminli ye ngoane a, nvasoɛ boni a ɔbanyia a? Na duzu bɔbɔ a sonla kɛva kɛzenza ye ngoane a?”​​—Maake 8:36, 37