Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 9

Akee Bɛwole!

Akee Bɛwole!

Ebileham nee Sɛla gyale la ɛvolɛ dɔɔnwo ɛgua nu. Bɛgyakyile Yule asetɛnla kpalɛ ne na bɛhɔdɛnlanle ɛdanlɛsua nu. Noko Sɛla andendɛ ɔ nzo abo, ɔluakɛ ɛnee ɔze kɛ saa bɛyɛ mɔɔ Gyihova ka la a, ɔbaboa bɛ kpalɛ.

Ɛnee Sɛla kpondɛ kɛ ɔwo, yemɔti ɔzele Ebileham kɛ: ‘Saa me sonvolɛ Heega wo a, ɔbayɛ me ra.’ Yeangyɛ, Heega wole ralɛ nrenyia. Bɛdonle ye Yehyemeeyɛle.

Ɛvolɛ dɔɔnwo anzi, mɔɔ ɛnee Ebileham ɛli ɛvolɛ 99 na Sɛla noko ɛli ɛvolɛ 89 la, bɛnyianle nyɛvolɛ nsa bie. Ebileham maanle bɛliele bɛ menle wɔ baka bie abo na ɔmaanle bɛ aleɛ bɛlile. Ɛze nyɛvolɛ ne mɔ menli holɛ ɔ? Bɛle anwumabɔvolɛma! Bɛzele Ebileham kɛ: ‘Ɛvolɛ bieko kamenzɛ ɛ nee ɛ ye bawo ralɛ nrenyia.’ Ɛnee Sɛla wɔ ɛdanlɛsua ne anu ɔlɛtie. Yemɔti ɔzelele na ɔhanle ye ɔ ti anu kɛ: ‘Asoo kɛkala mɔɔ mewie ɛrelera yɛ la yɛɛ mebawo ralɛ nrenyia a?’

Ye ɛvolɛ ko pɛpɛɛpɛ, Sɛla wole ralɛ nrenyia kɛ mɔɔ Gyihova anwumabɔvolɛ ne hanle la. Ebileham donle ye Ayezeke, ɔkile “Ɛzelekɛ.”

 Mɔɔ Ayezeke lile ɛvolɛ nnu la, Sɛla nwunle kɛ Yehyemeeyɛle ɛlɛsi ye amgbu. Ɛnee ɔkpondɛ kɛ ɔbɔ ɔ ra ne anwo bane, yemɔti ɔhanle kɛ Ebileham ɛmaa Heega nee Yehyemeeyɛle ɛvi ɛkɛ. Mɔlebɛbo ne, ɛnee Ebileham ɛmkpondɛ kɛ ɔyɛ. Noko Gyihova zele Ebileham kɛ: ‘Tie Sɛla edwɛkɛ ne. Mebanlea Yehyemeeyɛle. Noko ɔlua Ayezeke anwo zo a me ɛwɔkɛ ne mɔ bara nu a.’

“Diedi ti a Sɛla noko nyianle anwosesebɛ nrenzɛle a, . . . ɔluakɛ ɔbule Ahenle mɔɔ bɔle ɛwɔkɛ ne la nɔhavo.”​​—Hibuluma 11:11