Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 100

Pɔɔlo Nee Timote

Pɔɔlo Nee Timote

Ɛnee Timote le adiema kpavolɛ wɔ Lesetela asafo ne anu. Ɛnee ye papa le Gilikinli yɛɛ ye mame le Dwuunli. Ye mame Yunise nee ye nana Loyese hilehilele ye Gyihova anwo debie wɔ ye ngakula nu.

Mɔɔ Pɔɔlo ɛlɛkɔ ahɔha edwɛkɛ ne wɔ mekɛ mɔɔ tɔ zo nwiɔ na ɔdwule Lesetela la, ɔnwunle kɛ Timote kulo mediema ne mɔ kpalɛ na ɔkulo kɛ ɔboa bɛ. Pɔɔlo vale Timote bokale ɔ nwo wɔ ye adendulɛ ne anu. Ɔtetele Timote ɔmaanle ɔyɛle edwɛkpakavolɛ nee kilehilevolɛ kpalɛ.

Sunsum nwuanzanwuanza ne hilele Pɔɔlo nee Timote adenle wɔ ɛleka biala mɔɔ bɛhɔle la. Kenle ko nɔɔzo, Pɔɔlo nwunle ye wɔ yekile bie anu kɛ, nrenyia bie se ɔrɛla Masidonea ɔraboa bɛ. Yemɔti Pɔɔlo, Timote, Saelase nee Luku hɔhanle edwɛkɛ ne wɔ ɛkɛ na bɛdele asafo ngakyile.

Wɔ Masidonea suakpole Tɛsalonaeka azo, mrenyia nee mraalɛ dɔɔnwo rayɛle Kilisienema. Noko Dwuuma bie mɔ anye bolole Pɔɔlo nee ɔ gɔnwo mɔ. Bɛvale menli mɔɔ bɛyɛ basabasa la dɔɔnwo bɛmaanle bɛhwenle mediema ne mɔ bɛhɔle sua ne azo mgbanyima ɛkɛ na bɛdeɛdeanle nu kɛ: ‘Menli ɛhye mɔ dwazo tia Wulomu arane ne!’ Ɛnee bɛnyia Pɔɔlo nee Timote a bɛbahu bɛ, yemɔti nɔe ne bɛnriandile bɛhɔle Bɛlia.

Ɛnee menli mɔɔ wɔ Bɛlia la kulo kɛ bɛtie edwɛkpa ne, na Gilikima nee Dwuuma mɔɔ bɛwɔ ɛkɛ la rayɛle diedima. Noko mɔɔ Dwuuma bie mɔ vale basabasayɛlɛ rale Tɛsalonaeka la, Pɔɔlo vile ɛkɛ ne hɔle Atɛnse. Timote nee Saelase dɛnlanle Bɛlia maanle mediema ne mɔ anwosesebɛ. Nzinlii, Pɔɔlo zoanle Timote kɛ ɔzia ɔhɔ Tɛsalonaeka ɔhɔboa mediema ne mɔ ɔmaa bɛgyinla dwazotia kpole mɔɔ bɛlɛyia wɔ  ɛkɛ la anloa. Eza Pɔɔlo zoanle Timote maanle ɔhɔkpɔlale asafo ngakyile na ɔmaanle bɛ anwosesebɛ.

Pɔɔlo hanle hilele Timote kɛ: ‘Bɛdabɛ mɔɔ bɛkulo kɛ bɛsonle Gyihova la, bɛbakpɔ bɛ.’ Ɔlua Timote diedi ne ati, bɛkpɔle ye na bɛdole ye efiade. Ɔ nye liele kɛ yenyia nwolɛ adenle yeli nɔhalɛ yemaa Gyihova la.

Pɔɔlo zele Felepaema kɛ: ‘Melɛsoa Timote wɔ bɛ nwo lɔ. Ɔbahilehile bɛ kɛzi bɛdua nɔhalɛ ne anu la na yeatete bɛ wɔ edwɛkɛhanlɛ gyima ne anu.’ Ɛnee Pɔɔlo ze kɛ ɔbahola yeava ɔ nwo yeado Timote anwo zo. Bɛyɛle agɔnwolɛ na bɛbɔle nu bɛyɛle gyima ɛvolɛ dɔɔnwo.

“Menlɛ awie biala mɔɔ ye subane le kɛ ɔdaye mɔɔ dwenle bɛ nwo kpalɛ a. Ɔluakɛ bɛdabɛ mɔɔ bɛha la amuala ɛlɛkpondɛ mɔɔ hyia bɛ la, na tɛ mɔɔ hyia Gyisɛse Kelaese la ɔ.”​—Felepaema 2:20, 21