Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 98

Kilisiene Ɛzonlenlɛ Dɛlɛle

Kilisiene Ɛzonlenlɛ Dɛlɛle

Ɛzoanvolɛma ne lile Gyisɛse mɛla mɔɔ se bɛhɔbɔ edwɛkpa ne nolo wɔ ewiade amuala la azo. Wɔ ɛvolɛ 47 Y.M. anu, mediema mɔɔ wɔ Anteɔko la zoanle Pɔɔlo nee Baanabase kɛ bɛhɔha edwɛkɛ ne wɔ ɛleka ngakyile. Nolobɔlɛma nwiɔ ɛhye mɔɔ bɔ mɔdenle la dule adenle hɔle Ehyea Ekyi azua le kɛ Dɛbi, Lesetela, nee Ayekoneɛm azo.

Pɔɔlo nee Baanabase hanle edwɛkɛ ne hilele awie biala, sukoavolɛma, ehyiavolɛma, ngakula nee mgbanyinli. Menli dɔɔnwo liele Kelaese anwo nɔhalɛ ne lile. Mɔɔ Pɔɔlo nee Baanabase hanle edwɛkɛ ne hilele Saepelɛse amɛnlado Sɛgyeɛse Pɔɔlɛse la, nrenyia bie mɔɔ ye ngonyia la bɔle mɔdenle kɛ ɔsi bɛ adenle. Pɔɔlo zele nrenyia ne kɛ: “Gyihova babua wɔ ndɛne.” Ɛkɛ ne ala, ngonyianli ne anye zinle. Mɔɔ Amɛnlado Pɔɔlɛse nwunle ɛhye la, ɔliele bɛ ɔlile.

Pɔɔlo nee Baanabase hanle edwɛkɛ ne wɔ ɛleka biala, azua nu, gua nu, adenle zo, nee nyianu azua nu. Mɔɔ bɛyɛle abubura bie ayile wɔ Lesetela la, menli mɔɔ nwunle ɛhye la dwenlenle kɛ bɛle awozonle na bɛbɔle mɔdenle kɛ bɛsonle bɛ. Noko Pɔɔlo nee Baanabase hanle kɛ: ‘Bɛzonle Nyamenle angomekye! Yɛle menli ala.’ Dwuuma bie rale na bɛmaanle menli ne dwazole tiale Pɔɔlo. Bɛzile ye awolɛ, bɛhwenle ye bɛhɔle sua ne anzi na bɛgyakyile ye ɛkɛ amaa yeawu. Noko Pɔɔlo anwu! Ɛkɛ ne ala mediema ne mɔ nwunle ye na bɛvale ye bɛhɔle sua ne azo. Nzinlii, Pɔɔlo ziale hɔle Anteɔko.

Wɔ ɛvolɛ 49 Y.M. anu, eza Pɔɔlo hɔhanle edwɛkɛ ne wɔ ɛleka ngakyile. Ɔziale ɔhɔle Ehyea Ekyi na ɔnwunle mediema ne mɔ la, akee ɔhɔhanle edwɛkpa ne wɔ Europe mɔɔ wɔ moa bɔbɔ la. Ɔhɔle  Atɛnse, Ɛfɛsɛse, Felepae, Tɛsalonaeka, nee ɛleka gyɛne. Saelase, Luku, nee kpavolɛ Timote nee Pɔɔlo hɔle. Bɛbɔle nu bɛyɛle gyima bɛdele asafo ngakyile na bɛboale mediema ne mɔ bɛmaanle bɛ nwo yɛle se. Pɔɔlo dɛnlanle Kɔlente ɛvolɛ ko nee foa na ɔmaanle mediema mɔɔ wɔ ɛkɛ la anwosesebɛ. Ɔhanle edwɛkɛ ne, ɔhilehilele, na ɔhɛlɛle ngɛlata ɔhɔmaanle asafo dɔɔnwo. Ɛnee ɔnwo ɛdanlɛsua. Nzinlii, Pɔɔlo ziale hɔle Anteɔko.

Wɔ ɛvolɛ 52 Y.M. anu, Pɔɔlo hɔhanle edwɛkɛ ne bieko wɔ ɛleka dɔɔnwo, ɔbɔle ɔ bo wɔ Ehyea Ekyi. Ɔdule adenle ɔhɔle sɔlɔ na ɔhɔdwule Felepae, akee ɔtolole ɔrale Kɔlente. Pɔɔlo lile ɛvolɛ dɔɔnwo wɔ Ɛfesɛse, ɔhilehilele, ɔyɛle ayile na ɔboale asafo ne. Eza ɔmaanle bagua nu ɛdendɛlɛ dahuu wɔ sukulu sua bie anu. Menli dɔɔnwo diele ye na bɛhakyile bɛ subane. Mɔɔ Pɔɔlo hanle edwɛkɛ ne wɔ ɛleka ngakyile wiele la, ɔhɔle Gyɛlusalɛm.

“Yemɔti, bɛhɔ, bɛyɛ maanle maanle kɔsɔɔti anu menli me ɛdoavolɛma.”​—Mateyu 28:19