Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 89

Pita Kpole Gyisɛse

Pita Kpole Gyisɛse

Mɔɔ Gyisɛse nee ye ɛzoanvolɛma ne wɔ ɛbolɔnsam ne azo la, ɔhanle ɔhilele bɛ kɛ: ‘Ɛnɛ nɔe, bɛ muala bɛbakpo me.’ Pita hanle kɛ: ‘Tɛ me ɔ! Saa bɛ muala bɛkpo wɔ bɔbɔ a, mame menrɛkpo wɔ ɛlɛ.’ Noko Gyisɛse zele Pita kɛ: “Ɛnɛ nɔe too mɔɔ akɔlɛ kabɔ la, ɛnee wɔkpo me fane nsa.”

Mɔɔ sogyama ne vale Gyisɛse hɔle Kayafase sua nu la, ɛzoanvolɛma ne anu dɔɔnwo nriandile. Noko bɛ nuhua nwiɔ doale menli ne. Ko a le Pita. Ɔhɔle Kayafase sua nu ɛkɛ na ɔhɔdele senle. Ɔgyi senle ne anwo la bɛlɛra bie nwunle ye na ɔhanle kɛ: ‘Meze wɔ! Ɛ nee Gyisɛse a lua a!’

Pita hanle kɛ: ‘Kyɛkyɛ, ɔnle zɔ! Menze mɔɔ ɛlɛka la anwo ɛhwee!’ Ɔhɔle anlenkɛ ne anloa. Noko yeangyɛ sonvolɛ bɛlɛra fofolɛ nwunle ye na ɔhanle kɛ: ‘Nrenyia ɛhye nee Gyisɛse a lua a!’ Pita hanle kɛ: ‘Menze Gyisɛse bɔbɔ!’ Nrenyia bie hanle kɛ: ‘Ɛboka bɛ! Wɔ ɛdendɛlɛ kile kɛ ɛ nee Gyisɛse bɛvi Galeli.’ Noko Pita hanle ndane kɛ: ‘Menze ye!’

Ɛkɛ ne ala akɔlɛ bɔle. Pita nwunle kɛ Gyisɛse ɛhakyi ɔ nwo ɛlɛnea ye. Ɔhakyele Gyisɛse edwɛkɛ ne na ɔvindele alienwo ɔhɔzunle alɔbɔlɛ ɛzunlɛ.

Ɛnee Sanhedelin ne ɛyia kɛ bɛdi Gyisɛse edwɛkɛ wɔ Kayafase sua nu ɛkɛ. Ɛnee bɛbɔ kpɔkɛ kɛ bɛku Gyisɛse yemɔti ɛnee bɛlɛkpondɛ debie bɛagyinla zo bɛayɛ zɔ. Noko bɛannyia ɔ nwo edwɛkɛ biala. Akee Kayafase bizale Gyisɛse kɛ: ‘Wɔmɔ a ɛle Nyamenle Ara ne ɔ?’ Gyisɛse hanle kɛ: ‘Medame ɔ.’ Kayafase hanle kɛ: ‘Yɛngyia daselɛ bieko. Yeha munzule edwɛkɛ!’ Sanhedelin ne hanle kɛ: ‘Ɔwɔ kɛ bɛku ye.’ Akee bɛpepɛle ɔ nye zo, bɛtotole nyɛlɛ ɔ nyunlu, bɛbole ye, bɛhedale ɔ nyunlu na bɛhanle kɛ: “Ɛle ngapezonli a, ɛnee kile yɛ ahenle mɔɔ bɔle wɔ la.”

 Aleɛ hyenle la, bɛvale Gyisɛse bɛhɔmaanle Sanhedelin ne na bɛbizale ye bieko kɛ: ‘Wɔmɔ a ɛle Nyamenle Ara ne ɔ?’ Gyisɛse buale kɛ: ‘Bɛdabɛ mumua ne bɛha.’ Bɛhanle kɛ yeha munzule edwɛkɛ na bɛvale ye bɛhɔle Wulomu amɛnlado Pɔnteɛse Paelɛte sua nu ɛkɛ. Duzu a zile wɔ ɛkɛ a? Maa yɛnlea.

‘Mekɛ ɛdwu mɔɔ bɛ nuhua ko biala banriandi ahɔ ye sua nu na yeaha me ngomekye a. Noko ɔnrɛha me ngome ɔluakɛ Selɛ ne boka me nwo.’​​—Dwɔn 16:32