Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 93

Gyisɛse Ziale Hɔle Anwuma

Gyisɛse Ziale Hɔle Anwuma

Gyisɛse nee ye ɛdoavolɛma ne yiale wɔ Galeli. Ɔmaanle bɛ mɛla bie mɔɔ hyia kpalɛ la: ‘Bɛhɔyɛ maanle maanle kɔsɔɔti anu menli me ɛdoavolɛma, bɛva ninyɛne mɔɔ mehilehile bɛ la bɛhilehile bɛ na bɛzɔne bɛ.’ Akee ɔbɔle bɛ ɛwɔkɛ kɛ: ‘Bɛhakye kɛ me nee bɛ balua dahuu.’

Mɔɔ Gyisɛse dwazole la, ɔyele ɔ nwo ɔhilele ye ɛdoavolɛma dɔɔnwo wɔ Galeli nee Gyɛlusalɛm wɔ kenle 40 anu. Ɔhilehilele bɛ ɛzukoalɛdeɛ titili na ɔyɛle nwanwane ninyɛne dɔɔnwo. Akee Gyisɛse nee bɛ yiale wɔ mekɛ mɔɔ li awieleɛ kolaa la wɔ Ɔlivi Boka ne azo. Ɔzele bɛ kɛ: ‘Bɛmmafi Gyɛlusalɛm, bɛhɔ zo bɛhendɛ mɔɔ Selɛ ne ɛva ɛbɔ bɛ ɛwɔkɛ la.’

Ye ɛzoanvolɛ ne mɔ ande mɔɔ ɔhanle la abo. Bɛbizale ye kɛ: ‘Mekɛ ɛhye anu a ɛbayɛ Yizilayɛ Belemgbunli ɔ?’ Gyisɛse hanle kɛ: ‘Mekɛ mɔɔ Gyihova bamaa meayɛ Belemgbunli la ɛtɛdwule. Ɔnrɛhyɛ, sunsum nwuanzanwuanza ne bara bɛ nwo zo na bɛayɛ me alasevolɛ. Bɛhɔha edwɛkɛ ne wɔ Gyɛlusalɛm, Dwudiya, Samɛlea yɛɛ azɛlɛ ye azo ɛleka biala.’

Bɛmaanle Gyisɛse zo bɛhɔle anwuma na amungu ne hedale ɔ nwo zo. Ɛdoavolɛma ne anye hale anwuma, noko ɛnee yehɔ.

Ɛdoavolɛma ne vile Ɔlivi Boka ne azo na bɛhɔle Gyɛlusalɛm. Ɛnee dahuu bɛyia wɔ ɛbolɔnsam bie azo bɛyɛ asɔne. Ɛnee bɛlɛkendɛ kɛ Gyisɛse bamaa bɛ adehilelɛ bieko.

“Bɛbabɔ Belemgbunlililɛ ne anwo edwɛkpa ɛhye nolo wɔ azɛlɛ ye azo amuala bɛava bɛali maanle maanle ne amuala daselɛ, kolaa na awieleɛ ne ara.”​—Mateyu 24:14