Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 88

Bɛhye Gyisɛse

Bɛhye Gyisɛse

Gyisɛse nee ye ɛzoanvolɛma ne luale Kedelɔn Bɔnza ne anu hɔle Ɔlivi Boka ne azo. Ɛnee aleɛ ɛdwo kpalɛ yɛɛ siane ne ɛyɛ mumua. Mɔɔ bɛdwule Gɛtesɛmani tola ne anu la, Gyisɛse zele bɛ kɛ: ‘Bɛdɛnla ɛke na bɛhɔ zo bɛzinza.’ Akee Gyisɛse hɔle tola ne akunlu lɔ ekyii na ɔhotole. Ɔvale nyane kpole ɔzɛlɛle Gyihova kɛ: “Maa wɔ ɛhulolɛdeɛ ɛyɛ ɛkɛ.” Akee Gyihova zoanle anwumabɔvolɛ maanle ɔramaanle Gyisɛse anwosesebɛ. Mɔɔ Gyisɛse ziale hɔle ɛzoanvolɛma ne anwo ɛkɛ la, ɔnwunle kɛ bɛ nuhua nsa ɛlafe. Ɔhanle kɛ: ‘Bɛdwazo! Mekɛ zɛhae anu bɛlɛda! Mekɛ ne ɛbikye kɛ bɛye me bɛwula ɛtanevolɛma asa nu.’

Yeangyɛ, Dwudase nee menli bie mɔɔ dedɛ dadeɛ nee ahoholombaka la rale. Ɛnee ɔze kɛ tola ne anu a bɛbanwu Gyisɛse a ɔluakɛ ɛnee bɛta bɛba ɛkɛ. Dwudase hanle hilele sogyama ne kɛ ɔbayɛ debie yeamaa bɛanwu Gyisɛse. Ɔhɔle Gyisɛse anwo ɛkɛ na ɔhanle kɛ: ‘Anzodwolɛ ɛha wɔ, Kilehilevolɛ’ na ɔvole ɔ nloa anwo. Gyisɛse bizale ye kɛ: ‘Ɛfo me nloa anwo wɔaye me wɔamaa ɔ?’

Gyisɛse rale ɔ nyunlu na ɔbizale menli ne kɛ: “Nwane a bɛkpondɛ ye a?” Bɛhanle kɛ: “Gyisɛse mɔɔ vi Nazalɛte la.” Akee ɔbuale bɛ kɛ: “Medame ɛne,” menli ne hɔle bɛ nzi na bɛdule bɛguale aze. Gyisɛse bizale menli ne bieko kɛ: “Nwane a bɛkpondɛ ye a?” Bɛhanle ye bieko kɛ: “Gyisɛse mɔɔ vi Nazalɛte la.” Gyisɛse hanle kɛ: ‘Meha mehile bɛ kɛ medame ɛne. Ɔti bɛmaa ɛhye mɔ ɛhɔ.’

Mɔɔ Pita nwunle mɔɔ ɛlɛkɔ zo la, ɔhwenle dadeɛ na ɔpɛle ɛsɔfo kpanyinli ne akɛlɛ Malekɛse anzo. Noko Gyisɛse vale ɔ sa hanle nrenyia ne anzo na ɔyɛle ye ayile. Akee ɔzele Pita kɛ: ‘Fa wɔ dadeɛ ne wula ye boa ne anu. Saa ɛfa dadeɛ ɛko a, ɛbawu dadeɛ nloa.’ Sogyama ne hyele Gyisɛse, bɛkyekyele ɔ sa na ye ɛzoanvolɛma ne nriandile.  Menli ne vale Gyisɛse hɔle ɛsɔfo kpanyinli Anase ɛkɛ. Anase bizebizale ye edwɛkɛ na ɔmaanle bɛvale ye bɛhɔle Ɛsɔfo Kpanyinli Kayafase ɛkɛ. Noko duzu a dole ɛzoanvolɛma ne a?

“Bɛbanwu amaneɛ dɔɔnwo wɔ ewiade ye anu, noko bɛnyia akɛnrasesebɛ! Meli ewiade ne anwo zo konim.”​​—Dwɔn 16:33