Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 74

Gyisɛse Rayɛle Mɛzaya Ne

Gyisɛse Rayɛle Mɛzaya Ne

Dwɔn bɔle nolo kɛ: ‘Awie mɔɔ lɛ tumi tɛla me la ɛlɛba.’ Mɔɔ Gyisɛse lile ɛvolɛ 30 la, ɔvi Galeli ɔhɔle Azule Dwɔdan ne anloa, ɛleka mɔɔ ɛnee Dwɔn ɛlɛsɔne menli la. Ɛnee Gyisɛse kulo kɛ Dwɔn sɔne ye, noko Dwɔn hanle kɛ: ‘Tɛ medame a ɔwɔ kɛ mesɔne wɔ a. Ɛdawɔ a ɔwɔ kɛ ɛsɔne me a.’ Gyisɛse hanle hilele Dwɔn kɛ: ‘Gyihova kulo kɛ ɛsɔne me.’ Yemɔti bɛhɔle Azule Dwɔdan ne anloa na Dwɔn vale Gyisɛse wulale azule ne anu.

Mɔɔ Gyisɛse vi azule ne anu vindele la, ɔyɛle asɔne. Ɛkɛ ne ala, anwuma bukele, na Nyamenle sunsum nwuanzanwuanza ne rale ɔ nwo zo kɛ mɔlɔnoma. Akee Gyihova dendɛle vi anwuma kɛ: “Ɛle me Ra mɔɔ mekulo wɔ; melie wɔ medo nu.”

Mɔɔ Gyihova sunsum ne rale Gyisɛse anwo zo la, ɔrayɛle Kelaese anzɛɛ Mɛzaya ne. Akee ɔbabɔ gyima mɔɔ Gyihova zoanle ye kɛ ɔrayɛ ye wɔ azɛlɛ ye azo la abo.

Mɔɔ bɛzɔnenle Gyisɛse bɛwiele ala la, ɔhɔle fienemgbole ne anu na ɔlile kenle 40 wɔ ɛkɛ. Mɔɔ ɔziale ɔrale la, ɔhɔle Dwɔn ɛkɛ. Mɔɔ Gyisɛse ɛlɛkɔ Dwɔn anwo ɛkɛ la, Dwɔn hanle kɛ: “Nyamenle Boaneralɛ ne mɔɔ ɔbaye ɛtane yeavi ewiade la ɛne!” Dwɔn hanle ɛhye ɔmaanle menli ne nwunle kɛ Gyisɛse a le Mɛzaya ne a. Ɛze mɔɔ dole Gyisɛse wɔ mekɛ mɔɔ ɛnee ɔwɔ fienemgbole ne anu la ɔ? Maa yɛnlea.

“Na ɛnelɛ bie vi anwuma hanle kɛ: “Ɛle me Ra mɔɔ mekulo wɔ; melie wɔ medo nu.””​—Maake 1:11