Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 82

Gyisɛse Hilele Ye Ɛdoavolɛma Kɛzi Bɛyɛ Asɔne La

Gyisɛse Hilele Ye Ɛdoavolɛma Kɛzi Bɛyɛ Asɔne La

Ɛnee Falasiima yɛ debie biala maa menli nye die bɛ nwo. Saa bɛyɛ debie kpalɛ a bɛkulo kɛ menli nwu ye. Bɛgyinla gua zo bɛyɛ asɔne amaa menli anwu bɛ. Ɛnee Falasiima kye asɔneyɛlɛ ndendenle gua bɛ ti anu na bɛka ye wɔ nyianu azua nu nee gua zo amaa menli ade. Yemɔti ɔzinle menli ne anwo kɛ Gyisɛse hanle kɛ: ‘Bɛmmayɛ asɔne kɛ Falasiima ne la. Bɛdwenle kɛ saa bɛka edwɛkɛ dɔɔnwo a yɛɛ Nyamenle anye balie nwo a, noko ɔnle zɔ. Asɔneyɛlɛ le ɛdawɔ nee Gyihova avinli edwɛkɛ. Mmaka edwɛkɛ ko ne ala fane dɔɔnwo. Gyihova kpondɛ kɛ ɛka mɔɔ wɔ wɔ ahonle nu la ɛkile ye.

‘Bɛyɛ asɔne a, bɛyɛ ye zɛhae: “Yɛ Ze mɔɔ wɔ anwuma, wɔ duma nwo ɛde. Wɔ Belemgbunlililɛ ɛrɛla. Wɔ ɛhulolɛdeɛ ɛyɛ ɛkɛ wɔ azɛlɛ ye azo kɛ  anwuma la.”’ Eza Gyisɛse hanle hilele bɛ kɛ bɛyɛ aleɛ, ɛtanefakyɛ nee ninyɛne gyɛne nwo asɔne.

Gyisɛse hanle kɛ: ‘Bɛmmagyakyi asɔneyɛlɛ. Bɛhɔ zo bɛzɛlɛ Gyihova, bɛ Ze ne kɛ ɔmaa bɛ ninyɛne mgbalɛ. Awovolɛ biala kpondɛ kɛ ɔfa ninyɛne mgbalɛ ɔmaa ɔ ra. Saa ɛ ra sɛlɛ wɔ paano a, asoo ɛbamaa ye bolɛ? Saa ɔsɛlɛ fɛlɛ a, asoo ɛbamaa ye ɛwɔlɛ?’

Akee Gyisɛse hilehilele nu kɛ: ‘Saa bɛdabɛ bɔbɔ bɛze kɛzi bɛfa ninyɛne mgbalɛ bɛmaa bɛ mra a, ɛnee fane nyɛ a Gyihova, bɛ Ze ne ɛnrɛva sunsum nwuanzanwuanza ne ɛnrɛmaa bɛ ɛ? Mɔɔ hyia la a le kɛ bɛbabiza ye.’ Ɛtie Gyisɛse folɛdulɛ ne ɔ? Duzu ninyɛne a ɛyɛ nwolɛ asɔne a?

“Bɛhɔ zo bɛbiza, na bɛ sa baha ye; bɛhɔ zo bɛkpondɛ, na bɛbanwu ye; bɛhɔ zo bɛbɔ nu, na bɛbabuke bɛ.”​​—Mateyu 7:7