Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 80

Gyisɛse Kpale Ɛzoanvolɛma Bulu Nee Nwiɔ

Gyisɛse Kpale Ɛzoanvolɛma Bulu Nee Nwiɔ

Mɔɔ Gyisɛse bɔle edwɛkpa ne nolo kɛyɛ ɛvolɛ ko siane nsia wiele la, ɛnee ɔwɔ kɛ ɔsi kpɔkɛ titili bie. Nwane mɔ a ɔbakpa bɛ na ɔ nee bɛ ayɛ gyima a? Nwane mɔ a ɔbatete bɛ yeamaa bɛali Kilisiene asafo ne anyunlu a? Amaa Gyisɛse ahola azi kpɔkɛ ɛhye la, ɛnee ɔwɔ kɛ ɔkpondɛ adehilelɛ ɔfi Gyihova ɛkɛ. Yemɔti ɔ ngomekye ɔhɔle boka bie azo, na ɔyɛle asɔne nɔe ne amuala. Aleɛ hyenle la, Gyisɛse vɛlɛle ye ɛdoavolɛma ne bie mɔ na ɔkpale bɛ nuhua 12. Asoo ɛkakye bie mɔ aluma? Bɛ aluma ɛne: Pita, Andelu, Gyemise, Dwɔn, Felepe, Baatɔlomiyu, Tɔmase, Mateyu, Afeɛse ara Gyemise, Tadease, Saemɔn yɛɛ Dwudase Yesekaleɔto.

Andelu, Pita, Felepe, Gyemise

Menli Bulu Nee Nwiɔ ne nee Gyisɛse balua. Mɔɔ ɔtetele bɛ ɔwiele la, ɔzoanle bɛ kɛ bɛhɔha edwɛkɛ ne. Gyihova maanle bɛ tumi kɛ bɛdu sunsum ɛtane na bɛyɛ wuliravolɛma ayile.

Dwɔn, Mateyu, Baatɔlomiyu, Tɔmase

Gyisɛse vɛlɛle menli Bulu Nee Nwiɔ ne ɔ gɔnwo mɔ, na ɔliele bɛ ɔlile. Ɛnee Falasiima adwenle yɛ bɛ kɛ ɛzoanvolɛ ne mɔ angɔ  sukulu yɛɛ bɛnze ɛhwee. Noko Gyisɛse hilele bɛ gyima ne anye zo. Ɛnee bɛ nee Gyisɛse balua wɔ mekɛ mɔɔ hyia kpalɛ wɔ ye ɛbɛlabɔlɛ nu la anu kolaa na bɛahu ye yɛɛ ye ewudwazo ne anzi. Ɛnee Gyisɛse vi Galeli yɛɛ menli Bulu Nee Nwiɔ ne anu dɔɔnwo noko vi ɛkɛ. Ɛnee bɛ bie mɔ gya mraalɛ.

Afeɛse ara Gyemise, Dwudase Yesekaleɔto, Tadease, Saemɔn

Ɛnee ɛzoanvolɛma ne ɛnli munli yemɔti bɛfo. Ɛnee ɔyɛ a bɛtendɛ mɔɔ bɛndwenle nwolɛ yɛɛ bɛsi kpɔkɛ ɛtane. Ɔyɛ a bɛnnyia abotane. Bɛzule awie mɔɔ le kpole wɔ bɛ nu la anwo kpolera bɔbɔ. Noko ɛnee bɛlɛ subane kpalɛ yɛɛ bɛkulo Gyihova. Ɛnee saa Gyisɛse kɔ a, bɛdabɛ a bɛbayɛ Kilisiene asafo ne adiabo a.

“Mevɛlɛ bɛ agɔnwolɛma ɔluakɛ debie biala mɔɔ mendele menvile me Ze ɛkɛ la, memaa bɛnwu ye.”​—Dwɔn 15:15