Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 81

Boka Zo Edwɛkɛ Ne

Boka Zo Edwɛkɛ Ne

Mɔɔ Gyisɛse kpale ye ɛzoanvolɛma 12 ne wiele la, ɔvi boka ne azo ɔdwule ɔhɔle ɛleka bie mɔɔ menli dɔɔnwo ɛyia la. Ɛnee menli ne vi Galeli, Dwudiya, Taya, Saedɛn, Selea, nee azua mɔɔ wɔ Dwɔdan ne anzi lɔ la azo. Bɛvale wuliravolɛma nee menli mɔɔ sunsum ɛtane ɛlɛgyegye bɛ la bɛrɛlɛle ye. Gyisɛse yɛle bɛ muala ayile. Akee ɔdɛnlanle aze wɔ boka ne anwo na ɔbɔle ɔ bo kɛ ɔkilehile. Ɔhilehilele ninyɛne mɔɔ ɔwɔ kɛ yɛyɛ na yɛahola yɛayɛ Nyamenle agɔnwo la anu. Ɔwɔ kɛ yɛnwu kɛ yɛhyia Gyihova anwo na yɛsukoa kɛ yɛbahulo ye. Noko saa yɛngulo awie mɔ a, yɛnrɛhola yɛnrɛhulo Nyamenle. Ɔwɔ kɛ yɛyɛ ahunlunyele na yɛkulo awie biala, bɔbɔ yɛ agbɔvolɛ.

Gyisɛse hanle kɛ: ‘Ɔnle kɛ bɛkulo bɛ gɔnwo mɔ ala. Ɔwɔ kɛ bɛkulo bɛ agbɔvolɛ na bɛfi bɛ ahonle nu bɛfa awie mɔ ɛtane bɛkyɛ bɛ. Saa awie fa ɛ nwo ɛya a, kɔ ye ɛkɛ kɔkpa ye kyɛlɛ. Mɔɔ ɛkulo kɛ awie mɔ yɛ maa wɔ la yɛ maa bɛ.’

 Gyisɛse eza dule menli ne folɛ wɔ anwonyia nwo. Ɔhanle kɛ: ‘Ɔle kpalɛ kɛ yɛbayɛ Gyihova agɔnwo tɛla kɛ yɛbanyia ezukoa dɔɔnwo. Awule bahola awua wɔ ezukoa, noko awie biala ɛnrɛhola ɛnrɛwua ɛ nee Gyihova agɔnwolɛvalɛ ne. Bɛmmadwenle mɔɔ bɛbali, bɛbanlo anzɛɛ mɔɔ bɛbaheda la anwo. Bɛnlea nloma. Dahuu Nyamenle maa bɛnyia aleɛ bɛdi. Bɛdwenledwenle a, bɛnrɛhola bɛnrɛva kenle ko bɛnrɛboka bɛ ngoane mekɛ nwo. Bɛhakye kɛ Gyihova ze mɔɔ bɛhyia nwolɛ la.’

Ɛnee menli ne ɛtɛnwunle awie mɔɔ tendɛ kɛ Gyisɛse la ɛlɛ. Bɛ ɛzonlenlɛ nu adekilevolɛma ne ɛtɛkilehilele bɛ ninyɛne zɛhae mɔ bie ɛlɛ. Duzu ati a ɛnee Gyisɛse le kilehilevolɛ kpole a? Ɔluakɛ mɔɔ ɔhilehilele la vi Gyihova ɛkɛ.

“Bɛva me gyɛnvayile ne bɛdo bɛ kɔme zo na bɛzukoa me, ɔluakɛ mele bɛtɛɛ yɛɛ mebɛlɛ me nwo aze wɔ ahonle nu, na bɛ nwo kɛdɔ bɛ.”​​—Mateyu 11:29