Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 57

Gyihova Zoanle Gyɛlɛmaya Kɛ Ɔhɔha Edwɛkɛ Ne

Gyihova Zoanle Gyɛlɛmaya Kɛ Ɔhɔha Edwɛkɛ Ne

Gyihova kpale Gyɛlɛmaya kɛ ɔyɛ ngapezonli ɔmaa Dwudama. Ɔhanle ɔhilele ye kɛ ɔha edwɛkɛ ne ɔhile menli ne na ɔbɔ bɛ kɔkɔ kɛ bɛgyakyi ɛtaneyɛlɛ. Gyɛlɛmaya hanle kɛ: ‘Gyihova, mele kakula, menrɛhola tendɛ kile menli ne.’ Gyihova hanle hilele ye kɛ: ‘Mmasulo. Mebaha mɔɔ ɔwɔ kɛ ɛka la meahile wɔ. Mebaboa wɔ.’

Gyihova hanle hilele Gyɛlɛmaya kɛ ɔyia mgbanyima ne mɔ na ɔbɔ buakɛ wɔ bɛ nyunlu ɛkɛ na ɔha kɛ: ‘Kɛ bɛbazɛkye Gyɛlusalɛm la ɛne.’ Mɔɔ Gyɛlɛmaya yɛle mɔɔ Gyihova hanle la, mgbanyima ne mɔ vale ɛya kpalɛ. Ɛsɔfo bie mɔɔ bɛfɛlɛ ye Pahyɛ la bɔle Gyɛlɛmaya na ɔbɔle ye kpanwu. Na Gyɛlɛmaya angola andu ɔ bo nɔe ne amuala. Aleɛ hyenle la Pahyɛ yele ye. Gyɛlɛmaya hanle kɛ: ‘Menrɛhola ɛhye anloa gyinla bieko. Mebagyakyi edwɛkɛ ne ɛhanlɛ.’ Noko asoo ɔgyakyile? Kyɛkyɛ. Mɔɔ Gyɛlɛmaya dwenlenle nwolɛ bieko la, ɔhanle kɛ: ‘Gyihova edwɛkɛ ne sɔ kɛ senle yela me ahonle nu na mengola mengyakyi ye ɛhanlɛ.’ Gyɛlɛmaya hɔle zo bɔle menli ne kɔkɔ.

Ɛvolɛ dɔɔnwo pɛle nu la Dwudama nyianle belemgbunli fofolɛ. Ɛsɔfoma nee adalɛ ngapezoma ne anye anlie Gyɛlɛmaya edwɛkɛ ne anwo. Bɛhanle bɛhilele mgbanyima ne mɔ kɛ: “Ɔwɔ kɛ bɛku nrenyia ɛhye.” Na Gyɛlɛmaya hanle kɛ: ‘Saa bɛku me a, ɛnee bɛha sonla mɔɔ ɛnze nwolɛ bie la mogya bɛgua. Edwɛkɛ biala mɔɔ meha la vi Gyihova ɛkɛ, tɛ me edwɛkɛ ɔ.’ Mɔɔ mgbanyima ne mɔ dele ɛhye la, bɛhanle kɛ: “Ɔnle kɛ bɛku nrenyia ɛhye.”

Gyɛlɛmaya hɔle zo hanle edwɛkɛ  ne, na mgbanyima ne mɔ vale ɛya kpole. Bɛhanle bɛhilele belemgbunli ne kɛ ɔhu Gyɛlɛmaya. Belemgbunli ne hanle kɛ bɛyɛ Gyɛlɛmaya kɛ mɔɔ bɛdabɛ bɛkulo la. Yemɔti bɛhyele Gyɛlɛmaya, na bɛdwulale ye wɔ bula mɔɔ anu wale na ndɛtɛlɛ wɔ nu la anu amaa yeawu. Na ɔbɔle ɔ bo kɛ ɔmi ndɛtɛlɛ ne anu.

Belemgbunli sua nu ɛkɛ ne sonvolɛ kpanyinli bie mɔɔ bɛfɛlɛ ye Yibɛdemɛlɛke la hɔhanle hilele belemgbunli ne kɛ: ‘Mgbanyima ne mɔ ɛdwula Gyɛlɛmaya bula ne anu! Saa yɛanye ye a, ɔbawu.’ Belemgbunli ne hanle hilele Yibɛdemɛlɛke kɛ ɔva mrenyia 30 ɔboka ɔ nwo na bɛhɔye Gyɛlɛmaya bɛvi bula ne anu. Asoo ɔnle kɛ yɛyɛ kɛ Gyɛlɛmaya mɔɔ yeammaa debie biala anzi ye adenle kɛ ɔbaha edwɛkɛ ne la ɔ?

“Na me duma ne ati menli kɔsɔɔti bakpɔ bɛ, noko mɔɔ kɛgyinla nu kɛhɔ awieleɛ la bɛbalie ye ngoane.”​—Mateyu 10:22