Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 67

Gyɛlusalɛm Bane Ne

Gyɛlusalɛm Bane Ne

Maa yɛzia yɛ nzi ekyii. Ɛnee Nihɛmaya mɔɔ le Belemgbunli Zɛzɛse sonvolɛ la le Yizilayɛnli mɔɔ de Pɛhyea suakpole Susa azo a. Nihɛmaya adiema bie vale nrɛlaleɛ ɛtane vi Dwuda rale kɛ: ‘Menli mɔɔ ziale hɔle Gyɛlusalɛm la ɛnlɛ banebɔlɛ. Suakpole ne bane ne nee ye nlenkɛ mgbole ne mɔ mɔɔ Babelɔnma zɛkyele ye la, bɛtɛyɛle ye boɛ.’ Nihɛmaya vale ɛya. Ɛnee ɔkpondɛ kɛ ɔkɔ Gyɛlusalɛm na ɔkɔboa, ɔti ɔyɛle asɔne kɛ belemgbunli ne ɛmaa ɛhɔ.

Nzinlii, belemgbunli ne nwunle kɛ Nihɛmaya ɛlɛdi alɔbɔlɛ. Ɔhanle kɛ: ‘Metɛnwunle kɛ ɛlɛdi alɔbɔlɛ ɛlɛ. Duzu a ɛlɛgyegye wɔ a?’ Nihɛmaya hanle kɛ: ‘Kɛmɔti a ɔnle kɛ me nwo yɛ alɔbɔlɛ wɔ mekɛ mɔɔ suakpole Gyɛlusalɛm ɛzɛkye la ɛ?’ Belemgbunli ne bizale ye kɛ: “Duzu a menyɛ memaa wɔ a?” Ɛkɛ ne ala, Nihɛmaya yɛle asɔne wɔ ɔ ti anu. Akee ɔhanle kɛ: ‘Maa mengɔ Gyɛlusalɛm na mengɔnyɛ bane ne mɔ boɛ.’ Belemgbunli Zɛzɛse hanle hilele Nihɛmaya kɛ ɔbahola yeahɔ, na belemgbunli ne maanle bɛbɔle ɔ nwo bane wɔ adenle tendenle ne mɔɔ ɔlɛtu la anu. Eza ɔyɛle Nihɛmaya amɛnlado wɔ Dwuda na ɔmaanle ye ndaboa mɔɔ ɔbava yeayɛ suakpole ne nlenkɛ mgbole ne mɔ la.

Mɔɔ Nihɛmaya dwule Gyɛlusalɛma la, ɔnleɛnleanle suakpole ne bane ne mɔ. Akee ɔboɔboale ɛsɔfoma nee mgbanyima ne mɔ anloa na ɔhanle ɔhilele bɛ kɛ: ‘Ɛhye ɛnle kpalɛ. Ɔwɔ kɛ yɛbɔ gyima bo.’ Menli ne liele dole nu, na bɛbɔle ɔ bo kɛ bɛyɛ bane ne boɛ.

Noko Yizilayɛma agbɔvolɛ bie mɔ golole bɛ nwo na bɛhanle kɛ: ‘Ɛzonlɛ bɔbɔ anwo ka bane ne mɔɔ bɛlɛto la a ɔbabubu yeagua.’ Gyimayɛvoma ne andɛne bɛ nwo zo na bɛhɔle zo bɛyɛle bane ne boɛ. Bane ne hɔle anwuma na ɔnyianle anwosesebɛ.

Agbɔvolɛ ne mɔ bɔle kpɔkɛ kɛ bɛbalua ɛleka gyɛne bɛara Gyɛlusalɛm anwo zo arɛlevilɛ nu. Mɔɔ Dwuuma dele bɛ ngyehyɛleɛ ne anwo edwɛkɛ la, bɛ ahonle dule. Noko Nihɛmaya hanle kɛ: ‘Bɛmmasulo. Gyihova nee yɛ lua.’ Ɔmaanle menli hɔzinzale gyimayɛvoma ne na agbɔvolɛ ne mɔ angola ba.

 Wɔ kenle 52 ala anu, bɛyɛle bane ne nee nlenkɛ mgbole ne mɔ boɛ bɛwiele. Nihɛmaya vale Livaema kɔsɔɔti rale Gyɛlusalɛm na bɛyilale zolɛ. Ɔyɛle bɛ edwɛndolɛma ekpunli nwiɔ. Bɛluale kpolike ne mɔɔ wɔ Nzufeanvea Anlenkɛ Kpole ne anwo la azo bɛhɔle bane ne ati zo, ko ɛlɛkɔ bɛne zo la ɛnee ko noko ɛlɛkɔ fema zo. Bɛyɛle ye zɔhane bɛvale bɛbɔle sua ne anwo mgbɔlɔka bɛyiale. Bɛbɔle aweɛne ndendenle, getaa nee sanwule na bɛdole edwɛne bɛmaanle Gyihova. Ɛzela nee ekpunli ko hɔle yɛɛ Nihɛmaya noko nee ko ne hɔle too bɛyiale ɛzonlenlɛ sua ne anu. Menli ne amuala​—mrenyia, mraalɛ nee ngakula​—bɔle afɔle maanle Gyihova na bɛliele bɛ nye. Bɛdele bɛ ne wɔ moamoa kɛ bɛ nye ɛlie.

“Akodeɛ biala mɔɔ bɛyɛ bɛatia wɔ la ɛnrɛyɛ kpalɛ ɛlɛ.”​​—Ayezaya 54:17