Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 65

Ɛseta Liele Ye Menli Ne

Ɛseta Liele Ye Menli Ne

Ɛnee Ɛseta le Dwuunli bɛlɛra mɔɔ de Pɛhyea suakpole Susa azo a. Wɔ ɛvolɛ dɔɔnwo mɔɔ ɛze ɛhɔ la anu, Nɛbukadenɛza maanle ye abusua ne vile Gyɛlusalɛm hɔle ɛkɛ. Ɛseta papa awozoa Mɔdekae mɔɔ ɛnee ɔle Pɛhyea Belemgbunli Ahazelɔse sonvolɛ la a tetele ye a.

Ɛnee Belemgbunli Ahazelɔse ɛlɛkpondɛ belemgbunli raalɛ fofolɛ. Ye azonvolɛ ne mɔ vale mbɛlɛra mɔɔ bɛ nwo yɛ fɛ kpalɛ wɔ maanle nu anu la rɛlɛle ye, na ɛnee Ɛseta boka nwolɛ. Mbɛlɛra ne mɔ zonle ɛdeɛ, noko Ɛseta a belemgbunli ne kpale ye kɛ belemgbunli raalɛ a. Mɔdekae hanle hilele Ɛseta kɛ ɔmmamaa bɛnwu kɛ ɔle Dwuunli.

Ɛnee Heeman mɔɔ memaa ɔ nwo zo la a nea mgbanyima ne kɔsɔɔti anwo zo a. Ɛnee ɔkulo kɛ awie biala bɔ ɔ ti aze maa ye. Mɔdekae anyɛ zɔ, yemɔti Heeman vale ɔ nwo ɛya kpole na ɔyɛle kɛ ɔku ye. Mɔɔ Heeman nwunle kɛ Mɔdekae le Dwuunli la, ɔbɔle adwenle kɛ ɔku Dwuuma mɔɔ bɛwɔ maanle ne anu la amuala. Ɔhanle ɔhilele belemgbunli ne kɛ: ‘Dwuuma anwo yɛ ɛzulolɛ; ɔwɔ kɛ ɛye bɛ ɛfi maanle ye anu.’ Ahazelɔse hanle kɛ: ‘Debie biala mɔɔ ɛkulo la, fa yɛ bɛ,’ na ɔmaanle ye tumi kɛ ɔli mɛla. Heeman lile mɛla kɛ ɔwɔ kɛ bɛku Dwuuma kɔsɔɔti wɔ Eda siane ne kenle mɔɔ tɔ zo 13 la. Ɛnee Gyihova ɛlɛnea.

Ɛseta ande mɛla ne anwo ɛhwee. Yemɔti Mɔdekae maanle bɛvale bie bɛhɔmaanle ye na ɔhanle ɔhilele ye kɛ: ‘Kɔ na ɛ nee belemgbunli ne ɛhɔdendɛ.’ Ɛseta hanle kɛ: ‘Awie biala mɔɔ belemgbunli anvɛlɛ ye mɔɔ ɔbahɔ ye ɛkɛ ne la, bɛbahu ye. Kenle 30 ɛne, belemgbunli ne ɛtɛfɛlɛle me! Noko mebahɔ. Saa ɔkpogya ye tumi nvutuke kpɔma ne zo ɔkile me a bɛnrɛhu me. Saa yeanyɛ a, bɛbahu me.’

Ɛseta hɔle belemgbunli ne suakunlu ɛkɛ. Mɔɔ belemgbunli ne nwunle ye la, ɔmaanle ye kpɔma ne zo ɔhilele ye. Ɔhɔle  belemgbunli ne anwo ɛkɛ na ɔbizale ye kɛ: ‘Ɛseta, duzu a ɛkulo kɛ meyɛ memaa wɔ a?’ Ɛseta hanle kɛ: ‘Mekpondɛ kɛ meto aleɛ memaa wɔ yɛɛ Heeman.’ Wɔ aleɛlilɛ ne abo, Ɛseta hanle kɛ aleɛ kye a ɔbado aleɛ bieko yeamaa bɛ. Aleɛ hyenle mɔɔ bɛhɔle la, eza belemgbunli ne bizale ye kɛ: ‘Duzu a ɛkulo kɛ meyɛ memaa wɔ a?’ Ɛseta hanle kɛ: ‘Awie kpondɛ kɛ ɔku me nee me menli ne. Mesɛlɛ wɔ die yɛ.’ Belemgbunli ne bizale ye kɛ: ‘Nwane a kulo kɛ ɔku bɛ a?’ Ɔhanle kɛ: ‘Heeman, amumuyɛ ɛhye ɔ.’ Ahazelɔse vale ɛya na ɔmaanle bɛhunle Heeman ɛkɛ ne ala.

Noko ɛnee awie biala ɛnrɛhola ɛnrɛpɛ Heeman mɛla ne anu, belemgbunli ne bɔbɔ ɛnrɛhola. Yemɔti belemgbunli ne maanle Mɔdekae nleanle mgbanyima ne anwo zo na ɔmaanle ye tumi kɛ ɔli mɛla fofolɛ. Mɔdekae lile mɛla mɔɔ saa bɛfa konle bɛtoa Dwuuma a, bɛbahola bɛ nee bɛ aho la. Wɔ Eda kenle 13 ne azo, Dwuuma lile bɛ agbɔvolɛ anwo zo konim. Ɔvi zɔhane mekɛ ne, bɛdi konimlilɛ ɛhye anwo ɛvoyia ɛvolɛ biala.

“Ɔlua me ti, bɛbava bɛ bɛahɔ amɛnladoma nee arelemgbunli nyunlu, na yeayɛ daselɛlilɛ yeamaa bɛ nee maanle maanle ne mɔ.”​​—Mateyu 10:18