Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 59

Mgbavolɛ Nna Bie Diele Gyihova

Mgbavolɛ Nna Bie Diele Gyihova

Mɔɔ Nɛbukadenɛza vale Dwuda mgbanyima hɔle Babelɔn la, ɔmaanle ye sonvolɛ kpanyinli Ahyepinaze nleanle bɛ nwo zo. Nɛbukadenɛza hanle hilele Ahyepinaze kɛ ɔye ngakula mrenyia mɔɔ bɛ nwo yɛ se na bɛze nrɛlɛbɛ wɔ bɛ nu la. Bɛbava ɛvolɛ nsa bɛatete ngakula mrenyia ɛhye mɔ. Ndetelɛ ne bamaa bɛayɛ mgbanyima titili wɔ Babelɔn. Ɛnee ɔwɔ kɛ mgbavolɛ ɛhye mɔ sukoa kɛzi bɛkenga, bɛkɛlɛ na bɛka Akadea, Babelɔn aneɛ ne la. Eza ɔwɔ kɛ bɛdi aleɛ mɔɔ belemgbunli ne nee ye mgbanyima di la bie. Mgbavolɛ ne mɔ anu nna a le Daneɛle, Hananaya, Maehyeeyɛle, yɛɛ Azalaya. Ahyepinaze totonle bɛ aluma fofolɛ: Bɛletihyazaa, Hyeedelake; Mihyake, yɛɛ Abɛdenɛgo. Asoo ndetelɛ ɛhye bamaa bɛagyakyi Gyihova ɛzonlenlɛ ɔ?

Mgbavolɛ nna ɛhye mɔ bɔle kpɔkɛ kɛ bɛbadie Gyihova. Ɛnee bɛze  kɛ ɔnle kɛ bɛdi belemgbunli ne aleɛ ne ɔluakɛ Gyihova Mɛla ne se nwolɛ ɛnde. Yemɔti bɛhanle bɛhilele Ahyepinaze kɛ: ‘Yɛsɛlɛ wɔ mmamaa yɛ belemgbunli aleɛ ne bie.’ Ahyepinaze zele bɛ kɛ: ‘Saa bɛanli na belemgbunli ne nwu kɛ bɛnwa a, ɔbahu me!’

Daneɛle nyianle adwenle bie. Ɔhanle ɔhilele sonvolɛ ne kɛ: ‘Yɛsɛlɛ wɔ maa bɛmaa yɛ nya nya yɛli na bɛmaa yɛ nzule yɛnlo kenle bulu. Na fa yɛ toto menli mɔɔ ɛlɛdi suakunlu aleɛ ne la anwo.’ Sonvolɛ ne liele dole nu.

Kenle bulu ne dwule la, ɛnee bɛyɛ mbelane ngɛnlɛma bɛdɛla mgbavolɛ mɔɔ ɛha la amuala. Gyihova anye liele kɛ bɛdiele ye la. Ɔmaanle Daneɛle nyianle nrɛlɛbɛ nee ndelebɛbo mɔɔ ɔkola ɔkile yekile nee ɛlalɛ bo a.

Mɔɔ bɛtetele mgbavolɛ ne mɔ bɛwiele la, Ahyepinaze vale mgbavolɛ ne mɔ hɔle Nɛbukadenɛza anyunlu. Belemgbunli ne nee bɛ dendɛle, na ɔnwunle kɛ Daneɛle, Hananaya, Maehyeeyɛle, yɛɛ Azalaya ze nrɛlɛbɛ yɛɛ bɛ nye la ɛkɛ tɛla mgbavolɛ mɔɔ ɛha la amuala. Ɔkpale menli nna ɛhye kɛ bɛyɛ gyima wɔ belemgbunli sua nu ɛkɛ. Ɛnee belemgbunli ne maa bɛtu ye folɛ wɔ edwɛkɛ mɔɔ anwo hyia la anwo. Gyihova maanle bɛnwunle nrɛlɛbɛ bɛdɛlale belemgbunli ne nrɛlɛbɛvolɛma nee ye ngonyiama ne amuala.

Daneɛle, Hananaya, Maehyeeyɛle, yɛɛ Azalaya arɛle anvi kɛ bɛle Gyihova azonvolɛ ɔnva nwo kɛ ɛnee bɛwɔ maanle gyɛne zo la. Ɛdawɔ noko, saa ɛ nee wɔ awovolɛ ɛnde a, ɛbahakye Gyihova dahuu ɔ?

“Mmamaa awie biala bu wɔ kakula. Emomu yɛ neazo maa nɔhavoma ne wɔ ɛdendɛlɛ nu, ɛbɛlabɔlɛ nu, ɛlɔlɛ nu, diedi nu, nee anwodelɛ nu.”​—1 Timote 4:12