Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 58

Bɛzɛkye Gyɛlusalɛm

Bɛzɛkye Gyɛlusalɛm

Menli mɔɔ wɔ Dwuda la kpole Gyihova fane dɔɔnwo na bɛzonlenle awozonle. Gyihova bɔle mɔdenle kɛ ɔboa bɛ wɔ ɛvolɛ dɔɔnwo anu. Ɔzoanle ngapezoma dɔɔnwo kɛ bɛbɔ bɛ kɔkɔ noko bɛandie. Emomu, bɛzelele ngapezoma ne. Kɛzi Gyihova maanle bɛ awozonle ɛzonlenlɛ ne rale awieleɛ ɛ?

Ɛnee Babelɔn belemgbunli Nɛbukadenɛza ɛlɛko ava maanle ngakyile. Mekɛ mɔɔ limoa mɔɔ ɔhonle ɔvale Gyɛlusalɛm la, ɔhyele Belemgbunli Gyɛhɔyakem, ye mgbanyima, sogyama yɛɛ menli mɔɔ ze adwinli di kpalɛ la, na ɔ nee bɛ hɔle Babelɔn. Eza ɔsesale Gyihova ɛzonlenlɛ sua ne anu agudeɛ kɔsɔɔti ɔhɔle. Akee Nɛbukadenɛza ziele Zɛdikaya belemgbunli wɔ Dwuda.

Mɔlebɛbo ne, Zɛdikaya diele Nɛbukadenɛza. Noko maanle ngakyile mɔɔ bikye Gyɛlusalɛm nee adalɛ ngapezoma dule Zɛdikaya folɛ kɛ ɔde atua ɔtia Babelɔn. Gyɛlɛmaya bɔle ye kɔkɔ kɛ: ‘Saa ɛte atua a, menli ɛhunlɛ, ɛhɔne, yɛɛ ewulenzane bara Dwuda.’

Mɔɔ Zɛdikaya lile belemgbunli ɛvolɛ mɔtwɛ la, ɔdele atua ɔtiale Babelɔn. Ɔhanle ɔhilele Yigyibiti sogyama kɛ bɛraboa ye. Akee Nɛbukadenɛza zoanle ye sogyama kɛ bɛhɔteta Gyɛlusalɛm, na bɛhɔbɔle bɛyiale suakpole ne. Gyɛlɛmaya zele Zɛdikaya kɛ: ‘Gyihova se, saa ɛfa ɛ nwo ɛmaa Babelɔnma a, bɛnrɛhu wɔ, yɛɛ bɛnrɛzɛkye suakpole ye. Na saa wɔanyɛ a, bɛbado senle zolɛ bɛayela ye na bɛahye wɔ bɛahɔ.’ Zɛdikaya hanle kɛ: ‘Menrɛyɛ!’

 Ɛvolɛ ko nee foa anzi, Babelɔn sogyama bule Gyɛlusalɛm bane ne rale nu na bɛdole senle suakpole ne azo. Bɛyelale ɛzonlenlɛ sua ne, bɛhunle menli dɔɔnwo, na bɛhyele menli apenle dɔɔnwo bɛhɔle.

Zɛdikaya nriandile vile Gyɛlusalɛm, noko Babelɔnma doale ye. Mɔɔ ɔka ekyii ɔdwu Gyɛleko la, bɛhyele ye, na bɛvale ye bɛhɔmaanle Nɛbukadenɛza. Babelɔn belemgbunli ne hunle Zɛdikaya amra wɔ ɔ nye zo. Akee Nɛbukadenɛza dudule Zɛdikaya anye, ɔdole ye efiade, na ɛkɛ ne a ɔwule a. Noko Gyihova bɔle Dwudama ɛwɔkɛ kɛ: ‘Saa bɛdi ɛvolɛ abulasuu wɔ Babelɔn a, mebava bɛ meazia meara Gyɛlusalɛm.’

Duzu a dole mgbavolɛ nee mbɛlɛra mɔɔ bɛhyele bɛ bɛhɔle Babelɔn la ɛ? Asoo bɛbali nɔhalɛ bɛamaa Gyihova?

“Gyihova Nyamenle, Tumivolɛ Bedevinli, wɔ ndɛnebualɛ le nɔhalɛ nee fɔɔnwo.”​—Yekile 16:7