Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 66

Ɛzela Hilehilele Nyamenle Mɛla Ne

Ɛzela Hilehilele Nyamenle Mɛla Ne

Yizilayɛma dɔɔnwo ziale hɔle Gyɛlusalɛm la, asɛɛ ɛvolɛ 70 ɛne, noko ɛnee bie mɔ tɛte Pɛhyea Maanle ne ɛleka ngakyile. Bɛ nuhua ko a le ɛsɔfo Ɛzela mɔɔ hilehilele Gyihova Mɛla ne la. Ɛzela dele kɛ menli mɔɔ wɔ Gyɛlusalɛm la ɛnli Mɛla ne azo na ɛnee ɔkulo kɛ ɔkɔboa bɛ. Pɛhyea Belemgbunli Zɛzɛse zele ye kɛ: ‘Nyamenle ɛmaa wɔnwu nrɛlɛbɛ amaa wɔahola wɔahilehile ye Mɛla ne. Ɛ nee awie biala mɔɔ kulo kɛ ɔkɔ bie la ɛhɔ.’ Ɛzela yiale menli mɔɔ kulo kɛ bɛsia bɛkɔ Gyɛlusalɛm la kɔsɔɔti. Bɛzɛlɛle Gyihova kɛ ɔbɔ bɛ nwo bane wɔ adenle tendenle ne mɔɔ bɛlɛtu la anu, na akee bɛdule bɛ bo.

Siane nna anzi, bɛdwule Gyɛlusalɛm. Mgbanyima mɔɔ wɔ ɛkɛ la zele Ɛzela kɛ: ‘Yizilayɛma andie Gyihova yɛɛ bɛgya mraalɛ mɔɔ bɛsonle awozonle la.’ Duzu a Ɛzela yɛle a? Ɔhotole menli ne anyunlu ɛkɛ na ɔyɛle asɔne kɛ: ‘Gyihova, wɔyɛ ninyɛne dɔɔnwo wɔmaa yɛ, noko yɛyɛ ɛtane yɛtia wɔ.’ Menli ne nlunle bɛ nwo, noko ɛnee bɛtɛyɛ ninyɛne mɔɔ ɛnle kpalɛ la. Ɛzela kpale mgbanyima nee ndɛnebuavolɛma kɛ bɛnleɛnlea edwɛkɛ ɛhye mɔ anu. Wɔ siane nsa anzi, bɛvoanle menli mɔɔ bɛnzonle Gyihova la.

Ɛvolɛ bulu nee nwiɔ pɛle nu. Wɔ zɔhane mekɛ ne anu, ɛnee bɛdo Gyɛlusalɛm bane ne bɛwie. Yemɔti Ɛzela maanle menli ne yiale wɔ gua ne azo na ɔgengale Nyamenle Mɛla ne ɔhilele bɛ. Mɔɔ Ɛzela bukele buluku ne anu la, menli ne dwazole gyinlanle. Ɔyele Gyihova ayɛlɛ, na menli ne maanle bɛ sa zo liele zolɛ. Akee Ɛzela gengale Mɛla ne na ɔhilehilele nuhua, na menli ne diele ye kpalɛ. Bɛliele bɛdole nu kɛ bɛhwe bɛ nwo bɛvi Gyihova anwo bieko, na bɛzunle. Aleɛ hyenle la, Ɛzela gengale Mɛla ne dɔɔnwo hilele bɛ. Bɛnwunle kɛ ɔnrɛhyɛ, bɛbali Kpɔda Bo Ɛdɛnlanlɛ Ɛvoyia ne. Ɛkɛ ne ala bɛbɔle ɔ bo kɛ bɛsiezie bɛ nwo bɛamaa ɛvoyialilɛ ne.

 Bɛlile ɛvoyia ne kenle nsuu, menli ne anye liele na bɛyɛle Gyihova mo kɛ yemaa bɛnyia aleɛ dɔɔnwo la. Ɔvi Dwɔhyua mekɛ zo, bɛtɛdile Kpɔda Bo Ɛdɛnlanlɛ Ɛvoyia zɛhae ɛlɛ. Bɛwiele ɛvoyialilɛ ne la, menli ne yiale na bɛyɛle asɔne kɛ: ‘Gyihova, ɛliele yɛ ɛvile akɛlɛzonlenlɛ nu, ɛmaanle yɛ aleɛ wɔ ɛsɛlɛ ne azo na ɛvale azɛlɛ kɛnlɛma ɛhye ɛmaanle yɛ. Noko yɛyɛle anzosesebɛ yɛtiale wɔ fane dɔɔnwo. Ɛmaanle wɔ ngapezoma bɔle yɛ kɔkɔ, noko yɛandie. Noko ɛnyianle yɛ nwo abotane. Ɛlile ɛwɔkɛ mɔɔ ɛbɔle Ebileham la azo. Akee yɛbɔ ɛwɔkɛ kɛ yɛbadie wɔ.’ Bɛhɛlɛle bɛ ɛwɔkɛ ne, na mgbanyima, Livaema nee ɛsɔfo ne mɔ vale bɛ sa wulale ɔ bo.

“Anyelielɛ a le bɛdabɛ mɔɔ bɛtie Nyamenle edwɛkɛ ne na bɛdi zo la!”​​—Luku 11:28