Wulu kɔ nuhua edwɛkɛ ne azo

Wulu kɔ nuninyɛne ne azo

 TILE BULU NEE NNA

Wɔ Abusua Ne Bahola Anyia Anyelielɛ

Wɔ Abusua Ne Bahola Anyia Anyelielɛ

1, 2. Duzu a Gyihova kpondɛ kɛ mbusua nyia a?

GYIHOVA NYAMENLE a hanle menli nwiɔ mɔɔ limoa la bɔle nu wɔ agyalɛ nu a. Baebolo ne ka kile yɛ kɛ Nyamenle yɛle raalɛ mɔɔ limoa la na “ɔvale ye ɔrɛlɛle nrenyia ne.” Adam anye liele kpalɛ ɔti ɔhanle kɛ: “Me mbowule nu bowule, yɛɛ me nwonane nu nwonane ɛne.” (Gyɛnɛsese 2:22, 23) Ɛhye maa yɛnwu kɛ Gyihova kpondɛ kɛ agyalɛma anye die.

2 Ɔyɛ alɔbɔlɛ kɛ, menli dɔɔnwo ɛtɛnyianle anyelielɛ wɔ bɛ abusua nu ɛlɛ. Noko ngyinlazo dɔɔnwo wɔ Baebolo ne anu mɔɔ bahola aboa awie biala mɔɔ wɔ abusua ne anu amaa bɛ nye alie na bɛadɛnla anzodwolɛ nu la.​—Luku 11:28.

MƆƆ NYAMENLE KPONDƐ KƐ KUNLIMA YƐ LA

3, 4. (a) Kɛzi ɔwɔ kɛ kunli nee ɔ ye di ɛ? (b) Duzu ati a ɔwɔ kɛ kunli nee yelɛ fa bɛ nvonleɛ kyɛ bɛ nwo ɛ?

3 Baebolo ne se ɔwɔ kɛ kunli kpalɛ kulo ɔ ye na ɔdi ye eni. Yɛsɛlɛ wɔ kenga Ɛfɛsɛsema 5:25-29. Kunli nee ɔ ye bali ye wɔ ɛlɔlɛ nu dahuu. Eza ɔbabɔ ɔ nwo bane, yeanlea ye yɛɛ ɔnrɛyɛ debie mɔɔ bagyegye ye a.

4 Noko saa kunli aye yɛ nvonleɛ a, duzu a ɔwɔ kɛ ɔyɛ a? Bɛha bɛhile kunlima kɛ: “Bɛhɔ zo bɛhulo bɛ ye mɔ, na bɛmmafa bɛ nwo ɛya kpole.” (Kɔlɔsaema 3:19) Kunlima, bɛhakye kɛ bɛdabɛ noko bɛyɛ nvonleɛ. Yemɔti saa bɛkpondɛ kɛ Nyamenle fa bɛ nvonleɛ kyɛ  bɛ a, ɔwɔ kɛ bɛfa bɛ ye mɔ noko nvonleɛ bɛkyɛ bɛ. (Mateyu 6:12, 14, 15) Saa kunli nee yelɛ lɛ ɛhulolɛ kɛ bɛbava nvonleɛ bɛahyɛ a, ɔbamaa anyelielɛ ara bɛ agyalɛ ne anu.

5. Duzu ati a ɔwɔ kɛ kunli di ɔ ye eni a?

5 Gyihova kpondɛ kɛ kunli di ɔ ye eni. Ɔwɔ kɛ kunli dwenle ɔ ye ngyianlɛ nwo kpalɛ. Ɛhye le anyebolo edwɛkɛ. Saa kunli nee ɔ ye anli ye boɛ a, bie a Gyihova ɛnrɛdie ye asɔneyɛlɛ. (1 Pita 3:7) Mɔɔ maa menli sonle bolɛ wɔ Gyihova anye zo la a le ɛlɔlɛ mɔɔ bɛlɛ bɛmaa ye la. Ɔmbu mrenyia kɛ bɛ nwo hyia tɛla mraalɛ.

6. Saa bɛka kɛ kunli nee yelɛ le “nwonane ko” a, ɔkile duzu?

6 Gyisɛse hilehilele nuhua kɛ kunli nee yelɛ ɛnle “nwiɔ bieko, emomu nwonane ko.” (Mateyu 19:6) Bɛdi nɔhalɛ bɛmaa bɛ nwo yɛɛ biala ɛnrɛva raalɛ anzɛɛ nrenyia fofolɛ ɛlɛ. (Mrɛlɛbulɛ 5:15-21; Hibuluma 13:4) Ɔwɔ kɛ kunli nee yelɛ fi bɛ ɛhulolɛ nu di bɛ nuhua biala nla nu ngyianlɛ nwo gyima. (1 Kɔlentema 7:3-5) Ɔwɔ kɛ kunli kakye kɛ “awie biala ɛmkpɔ ye sonlabaka ne, emomu ɔdi ye adane na ɔnea ye boɛ.” Yemɔti ɔwɔ kɛ ɔkulo ɔ ye na ɔnea ye boɛ. Mɔɔ tɛla biala la, yelɛ kpondɛ kɛ ɔ hu da atiakunlukɛnlɛma nee ɛlɔlɛ ali kile ye.​—Ɛfɛsɛsema 5:29.

MƆƆ NYAMENLE KPONDƐ KƐ YELƐMA YƐ LA

7. Duzu ati a abusua biala hyia abusua tile ɛ?

7 Abusua biala hyia abusua tile mɔɔ bahile bɛ adenle amaa bɛahola bɛabɔ nu bɛayɛ gyima kpalɛ la. Baebolo ne ka ye wɔ 1 Kɔlentema 11:3 kɛ: “Nrenyia biala ati a le Kelaese; raalɛ noko ati a le nrenyia; Kelaese noko ati a le Nyamenle.”

8. Kɛ ɔkɛyɛ na yelɛ abu ɔ hu kpole ɛ?

 8 Kunli biala yɛ nvonleɛ. Noko saa yelɛ fi ye ɛhulolɛ nu die ɔ hu kpɔkɛzilɛ to nu na ɔboa ye a, ɔbaboa abusua ne amuala. (1 Pita 3:1-6) Baebolo ne ka kɛ: ‘Ɔwɔ kɛ yelɛ noko nyia ɛbulɛ kpole maa ɔ hu.’ (Ɛfɛsɛsema 5:33) Na saa kunli ne nee ɔ ye diedi ɛnle ko ɛ? Ɔwɔ kɛ ɔkɔ zo ɔnyia ɛbulɛ kpole ɔmaa ɔ hu. Baebolo ne ka kɛ: “Bɛmɛ yelɛma, bɛbɛlɛ bɛ nwo aze bɛmaa bɛ hu mɔ . . . amaa saa bie mɔ andie edwɛkɛ ne a, bɛalua bɛ ye mɔ nyɛleɛ zo bɛanyia bɛ mɔɔ bɛnga edwɛkɛ kpɔkɛ ko bɔbɔ a, ɔluakɛ bɛbali bɛ nyɛleɛ kpalɛ nee bɛ ɛbulɛ kpole ne anwo daselɛ.” (1 Pita 3:1, 2) Neazo kpalɛ mɔɔ yelɛ bayɛ la bahola aboa ɔ hu yeamaa yeade ye diedi ne abo.

9. (a) Saa yelɛ nee ɔ hu ɛnyɛ adwenle wɔ debie bie anwo a, duzu a ɔwɔ kɛ ɔyɛ a? (b) Folɛ boni a Taetɛse 2:4, 5 tu yelɛma a?

9 Saa yelɛ nee ɔ hu ɛnyɛ adwenle wɔ debie bie anwo a, duzu a ɔwɔ kɛ ɔyɛ a? Ɔwɔ kɛ ɔfi ɛbulɛ nu ɔkile ye adwenle. Kɛ neazo la, Sɛla hanle edwɛkɛ bie mɔɔ  ɛnee Ebileham anye ɛnlie nwo la, noko Gyihova zele ye kɛ: “Tie ye.” (Gyɛnɛsese 21:9-12) Ɔnda ɔnzi kɛ Kilisiene kunli bazi kpɔkɛ mɔɔ tia Baebolo ne la, yemɔti ɔwɔ kɛ ɔ ye boa ye. (Gyima ne 5:29; Ɛfɛsɛsema 5:24) Yelɛ kpalɛ banlea ye abusua ne. (Kenga Taetɛse 2:4, 5.) Saa ɔ hu nee ɔ mra nwu kɛzi ɔlɛbɔ mɔdenle yeaboa bɛ la a, bɛbahulo ye na bɛabu ye kpalɛ.​—Mrɛlɛbulɛ 31:10, 28.

Kɛzi Sɛla yɛle neazo kpalɛ maanle yelɛma ɛ?

10. Duzu a Baebolo ne ka ye wɔ agyalɛ nu ɛtetelɛ nee ewolebɔlɛ nwo a?

10 Ɔyɛ a agyalɛma si kpɔkɛ ndɛndɛ kɛ bɛtete nu anzɛɛ bɛbɔ ewole. Noko Baebolo ne ka kɛ “yelɛ nee ɔ hu mmatete nu,” yɛɛ “ɔnle kɛ kunli fi ɔ ye anwo.” (1 Kɔlentema 7:10, 11) Tɛnlabelɛ bie mɔ wɔ ɛkɛ mɔɔ ɔbahola yeamaa agyalɛma atete nu a, noko ɔwɔ kɛ bɛsuzu kpɔkɛzilɛ ɛhye anwo kpalɛ. Na ewolebɔlɛ noko ɛ? Baebolo ne kile kɛ saa kunli anzɛɛ yelɛ fa awie mɔɔ ɔnle ɔ ye anzɛɛ ɔ hu la a, yɛɛ bɛkola bɛgyinla zo bɛbɔ ewole a.​—Mateyu 19:9.

MƆƆ NYAMENLE KPONDƐ KƐ AWOVOLƐ YƐ LA

Gyisɛse yɛle neazo kpalɛ maanle awie biala mɔɔ wɔ abusua ne anu la

11. Duzu a ngakula hyia nwo kpole kpalɛ a?

11 Awovolɛ, bɛbɔ mɔdenle bɛnyia mekɛ dɔɔnwo bɛmaa bɛ mra. Bɛ mra hyia bɛ nwo, na mɔɔ tɛla biala la, bɛkpondɛ kɛ bɛkilehile bɛ Gyihova anwo debie.​—Ditilɔnomi 6:4-9.

12. Duzu a ɔwɔ kɛ awovolɛ yɛ fa bɔ bɛ mra nwo bane a?

12 Seetan ewiade ne ɛlɛsɛkye kpalɛ, na menli bie mɔ kpondɛ kɛ bɛboda yɛ mra ne mɔ, bɔbɔ bɛkye bɛ mialera nu bɛ nee bɛ da. Ɔyɛ se ɔmaa awovolɛ bie mɔ kɛ bɛbaha nla nwo edwɛkɛ bɛahile bɛ mra. Noko ɔwɔ  kɛ awovolɛ bɔ bɛ mra kɔkɔ wɔ menli ɛhye mɔ anwo na bɛkile bɛ kɛzi bɛbahola bɛahwe bɛ nwo bɛavi bɛ nwo la. Awovolɛ, ɔwɔ kɛ bɛbɔ bɛ mra nwo bane. *​—1 Pita 5:8.

13. Kɛzi ɔwɔ kɛ awovolɛ kilehile bɛ mra ɛ?

13 Ɔle awovolɛ gyima kɛ bɛbahilehile bɛ mra kɛzi ɔwɔ kɛ bɛbɔ bɛ ɛbɛla la. Kɛ ɔkɛyɛ na wɔahilehile ɛ mra ɛ? Ɛ mra ne mɔ hyia ndetelɛ, noko ɔnle kɛ ɛtenrɛ bɛ wɔ atisesebɛ nu. (Gyɛlɛmaya 30:11) Yemɔti mmatwe  bɛ nzo wɔ mekɛ mɔɔ wɔva ɛya la. Mmamaa ɛ nloa edwɛkɛ yɛ kɛ “konle dadeɛ mɔɔ wowɔ la” na ɔboda bɛ. (Mrɛlɛbulɛ 12:18) Kilehile ɛ mra maa bɛnwu deɛmɔti ɔwɔ kɛ bɛyɛ tieyɛ la.​—Ɛfɛsɛsema 6:4; Hibuluma 12:9-11; nea Awieleɛdwɛkɛ 30.

MƆƆ NYAMENLE KPONDƐ KƐ NGAKULA YƐ LA

14, 15. Duzu ati a ɔwɔ kɛ ngakula tie bɛ awovolɛ a?

14 Gyisɛse diele ɔ Ze dahuu, wɔ mekɛ bɔbɔ mɔɔ ɛnee ɔnla aze la anu. (Luku 22:42; Dwɔn 8:28, 29) Gyihova kpondɛ kɛ ngakula tie bɛ awovolɛ.​—Ɛfɛsɛsema 6:1-3.

15 Ngakula, saa ɔyɛ a bɛte nganeɛ kɛ ɔyɛ se kɛ bɛkɛdie bɛ awovolɛ bɔbɔ a, bɛhakye kɛ saa bɛtie bɛ a, ɔmaa Gyihova nee bɛ awovolɛ anye die bɛ nwo. *​—Mrɛlɛbulɛ 1:8; 6:20; 23:22-25.

Saa ngakula yia sɔnea mɔɔ bamaa bɛayɛ ɛtane a, duzu a baboa bɛ yeamaa bɛali nɔhalɛ bɛamaa Nyamenle a?

16. (a) Kɛzi Seetan bɔ mɔdenle kɛ ɔsɔ ngakula yeanlea yeamaa bɛayɛ ɛtane ɛ? (b) Duzu ati a ɔhyia kɛ ɛfa menli mɔɔ kulo Gyihova la agɔnwolɛ a?

16 Abɔnsam bahola amaa ɛ gɔnwo mɔ nee ngakula gyɛne azɔ wɔ anlea kɛ ɛyɛ debie mɔɔ ɛnle kpalɛ la. Ɔze kɛ ɔbahola yeayɛ se kɛ ɛbagyinla atipɛnema ngyegyelɛ nloa. Kɛ neazo la, ɛnee Gyekɔbo ara raalɛ Daena lɛ agɔnwolɛma mɔɔ bɛngulo Gyihova la. Ɛhye maanle ɔ nee ye abusua ne yiale ngyegyelɛ dɔɔnwo. (Gyɛnɛsese 34:1, 2) Saa ɛ gɔnwo mɔ ɛngulo Gyihova a, bɛbahola bɛamaa wɔayɛ debie mɔɔ Gyihova kyi la, na ɔbamaa ɛdawɔ, wɔ abusua ne yɛɛ Nyamenle ali nyane kpole. (Mrɛlɛbulɛ 17:21, 25) Ɛhye ati a nwolɛ hyia kɛ  ɛfa menli mɔɔ kulo Gyihova la agɔnwolɛ la.​—1 Kɔlentema 15:33.

WƆ ABUSUA NE BAHOLA ANYIA ANYELIELƐ

17. Duzu a ɔwɔ kɛ awie biala mɔɔ wɔ abusua ne anu la yɛ a?

17 Saa awie biala mɔɔ wɔ abusua ne anu la di Nyamenle adehilelɛ zo a, ɔmmaa bɛnnyia ngyegyelɛ dɔɔnwo. Yemɔti saa ɛle kunli a, kulo ɛ ye na ɛ nee ye ɛli wɔ ɛlɔlɛ nu. Saa ɛle yelɛ a, bu ɛ hu na bɛlɛ ɛ nwo aze maa ye na sukoa yelɛ ne mɔɔ bɛha ɔ nwo edwɛkɛ wɔ Mrɛlɛbulɛ 31:10-31 la neazo ne. Saa ɛle awovolɛ a, kilehile ɛ mra maa bɛhulo Nyamenle. (Mrɛlɛbulɛ 22:6) Saa ɛle selɛ a, nea wɔ abusua ne “kpalɛ.” (1 Timote 3:4, 5; 5:8) Ngakula, bɛdie bɛ awovolɛ. (Kɔlɔsaema 3:20) Kakye kɛ awie biala mɔɔ wɔ abusua ne anu la kola yɛ nvonleɛ, yemɔti bɛlɛ ɛ nwo aze na sɛlɛ ɛtanefakyɛ. Nɔhalɛ nu, Gyihova ɛmaa awie biala mɔɔ wɔ abusua ne anu la adehilelɛ wɔ Baebolo ne anu.

^ ɛden. 12 Ɛbahola wɔanyia edwɛkɛ dɔɔnwo mɔɔ baboa wɔ yeamaa wɔabɔ ɛ mra nwo bane la wɔ Bayɛ Gyihova Agɔnwo vidio ne mɔɔ Gyihova Alasevolɛ a ɛyɛ la ɛzukoalɛdeɛ 17 ne anu.

^ ɛden. 15 Saa kakula bie awovolɛ kpondɛ kɛ ɔyɛ debie mɔɔ tia Nyamenle mɛla a, ɔnle kɛ ɔtie bɛ.​—Gyima ne 5:29.