Wulu kɔ nuhua edwɛkɛ ne azo

Wulu kɔ nuninyɛne ne azo

 TILE BULU NEE NSUU

Asɔneyɛlɛ Nwo Adenle Mɔɔ Yɛlɛ

Asɔneyɛlɛ Nwo Adenle Mɔɔ Yɛlɛ

“Anwuma nee aze Yɛvolɛ ne” kulo kɛ ɔtie yɛ asɔneyɛlɛ.​—Edwɛne 115:15

1, 2. Duzu ati a ɛsuzu kɛ asɔneyɛlɛ le ahyɛlɛdeɛ titili a, na kɛmɔti a ɔwɔ kɛ yɛnwu mɔɔ Baebolo ne ka ye wɔ asɔneyɛlɛ nwo la ɛ?

SAA ɛfa azɛlɛ ne ɛtoto aleɛabo amuala anwo a, azɛlɛ ne le ekyi kpalɛ. Saa Gyihova nea azɛlɛ ye a, ɔnwu menli mɔɔ wɔ maanle maanle ne kɔsɔɔti anu la kɛ nzule kpɔnwo ko mɔɔ vi bokiti nu ɛpe la. (Edwɛne 115:15; Ayezaya 40:15) Ɔnva nwo kɛ ɛfa yɛ ɛtoto aleɛabo amuala anwo a yɛndwu bie la, Edwɛne 145:18, 19 ka kɛ: “Gyihova bikye bɛdabɛ mɔɔ bɛfɛlɛ ye la kɔsɔɔti, bɛdabɛ mɔɔ bɛfɛlɛ ye nɔhalɛ nu la kɔsɔɔti. Ɔmaa bɛdabɛ mɔɔ bɛsulo ye la nyia mɔɔ bɛkulo la; ɔtie bɛ ɛzunlɛ, na ɔdie bɛ.” Nea nwolɛ adenle kɛnlɛma mɔɔ yɛlɛ a! Gyihova, ninyɛne kɔsɔɔti Bɔvolɛ ne, kpondɛ kɛ ɔbikye yɛ yɛɛ ɔkulo kɛ ɔtie yɛ asɔneyɛlɛ. Nɔhalɛ nu, asɔneyɛlɛ le nwolɛ adenle kpole, ahyɛlɛdeɛ titili mɔɔ Gyihova ɛva ɛmaa yɛ nuhua ko biala a.

2 Noko saa yɛyɛ asɔne wɔ adenle mɔɔ Gyihova die to nu la azo a, yɛɛ ɔbadie yɛ a. Kɛ ɔkɛyɛ na yɛayɛ zɔ ɛ? Maa yɛnlea mɔɔ Baebolo ne ka ye wɔ asɔneyɛlɛ nwo la.

DUZU ATI A ƆWƆ KƐ YƐSƐLƐ GYIHOVA A?

3. Duzu ati a ɔwɔ kɛ ɛsɛlɛ Gyihova a?

3 Gyihova kpondɛ kɛ ɛyɛ asɔne anzɛɛ ɛ nee ye tendɛ. Kɛzi yɛkola yɛnwu ye zɔ ɛ? Yɛsɛlɛ wɔ kenga Felepaema 4:6, 7. Dwenle nwolɛ nea. Aleɛabo amuala Belemgbunli ne kulo wɔ edwɛkɛ na ɔkpondɛ kɛ ɛka kɛzi ɛte nganeɛ la nee wɔ ngyegyelɛ nwo edwɛkɛ ɛkile ye.

4. Saa ɛyɛ asɔne dahuu a, kɛzi ɔmaa ɛ nee Gyihova agɔnwolɛvalɛ ne anu mia ɛ?

 4 Asɔneyɛlɛ boa maa yɛ nee Gyihova nyia agɔnwolɛvalɛ kyengye. Saa agɔnwolɛma ka bɛ nzuzulɛ, bɛ ngyegyelɛ nee bɛ nganeɛdelɛ nwo edwɛkɛ kile bɛ nwo dahuu a, ɔmaa bɛ agɔnwolɛvalɛ ne anu mia. Zɔhane ala a Gyihova mɔɔ yɛsɛlɛ ye la de a. Gyihova ɛha ye nzuzulɛ, kɛzi ɔte nganeɛ wɔ ninyɛne nwo, nee ninyɛne mɔɔ ɔbayɛ ye kenle bie la anwo edwɛkɛ ɛhile wɔ wɔ Baebolo ne anu. Ɛbahola wɔaha wɔ ahonle nu edwɛkɛ amuala wɔahile ye dahuu wɔ asɔneyɛlɛ nu. Saa ɛyɛ zɔ a, agɔnwolɛvalɛ mɔɔ ɛ nee Gyihova lɛ la anu bamia.​—Gyemise 4:8.

DUZU A ƆWƆ KƐ YƐYƐ NA NYAMENLE ADIE YƐ A?

5. Duzu a kile kɛ Gyihova ɛndie asɔneyɛlɛ kɔsɔɔti a?

5 Asoo Gyihova tie asɔneyɛlɛ kɔsɔɔti? Kyɛkyɛ. Wɔ ngapezonli Ayezaya mekɛ zo, Gyihova hanle hilele Yizilayɛma kɛ: “Bɛyɛ asɔne dɔɔnwo ɛdeɛ, noko mendie; mogya ɛyi bɛ sa nu tetɛkɛɛ.” (Ayezaya 1:15) Ɛhye ati saa  yɛannea boɛ a, bie a yɛbayɛ ninyɛne mɔɔ Gyihova kyi la, na ɛhye ɛnrɛmaa ɔnrɛdie yɛ asɔneyɛlɛ.

6. Duzu ati a diedi nwo hyia a? Kɛ ɔkɛyɛ na wɔahile kɛ ɛlɛ diedi ɛ?

6 Saa yɛkpondɛ kɛ Gyihova tie yɛ asɔneyɛlɛ a, ɔwɔ kɛ yɛnyia ye nu diedi. (Maake 11:24) Ɛzoanvolɛ Pɔɔlo hilehilele nu kɛ: “Awie ɛnlɛ diedi a ɔngola ɔnzɔ Nyamenle anye, ɔluakɛ ɔwɔ kɛ awie mɔɔ ba Nyamenle ɛkɛ ne la die di kɛ ɔwɔ ɛkɛ na ɔmaa bɛdabɛ mɔɔ bɛ nye ɛbolo bɛlɛkpondɛ ye la ahatualɛ.” (Hibuluma 11:6) Noko saa yɛka kɛ yɛlɛ diedi a, ɛnee ɔtɛwiele. Ɔwɔ kɛ yɛtie Gyihova dahuu yɛfa yɛkile kɛ yɛlɛ diedi.​—Kenga Gyemise 2:26.

7. (a) Duzu ati a yɛlɛsɛlɛ Gyihova a ɔwɔ kɛ yɛda mɛlɛbɛnwoaze nee ɛbulɛ ali ɛ? (b) Saa yɛlɛyɛ asɔne a, kɛ ɔkɛyɛ na yɛahile kɛ edwɛkɛ ne vi yɛ ahonle nu ɛ?

7 Ɔwɔ kɛ yɛbɛlɛ yɛ nwo aze na yɛda ɛbulɛ ali wɔ mekɛ mɔɔ yɛlɛsɛlɛ Gyihova la. Duzu ati ɔ? Saa yɛ nee belemgbunli bie anzɛɛ maanle kpanyinli bie a ɛlɛtendɛ a, anrɛɛ yɛbadendɛ ɛbulɛ nu. Gyihova le Nyamenle Tumivolɛ Bedevinli, yemɔti ɔwɔ kɛ yɛda ɛbulɛ nee mɛlɛbɛnwoaze kpole ali wɔ mekɛ mɔɔ yɛlɛtendɛ yɛahile ye la. (Gyɛnɛsese 17:1; Edwɛne 138:6) Eza ɔwɔ kɛ yɛfi yɛ ahonle nu yɛtendɛ yɛkile Gyihova, na ɔnle kɛ yɛti edwɛkɛ ko ne ala anu fane dɔɔnwo.​—Mateyu 6:7, 8.

8. Saa yɛyɛ debie bie anwo asɔne a, duzu bieko a ɔwɔ kɛ yɛyɛ a?

8 Akee ɔwɔ kɛ yɛyɛ biala mɔɔ yɛbahola la kɛ yɛbali debie mɔɔ yɛlɛyɛ nwolɛ asɔne la anwo gyima. Kɛ neazo la, saa yɛsɛlɛ Gyihova kɛ ɔmaa yɛ sa ɛha mɔɔ yɛhyia nwo alehyenlɛ biala la a, yɛnrɛhola yɛnrɛdo yɛ sa yɛnrɛbɛka nu na yɛnrɛnlea kɛ Gyihova bava debie biala amaa yɛ mɔɔ yɛnyɛ nwolɛ gyima biala a. Ɔwɔ kɛ yɛbɔ mɔdenle yɛyɛ gyima biala mɔɔ yɛbahola yɛayɛ la. (Mateyu 6: 11; 2 Tɛsalonaekama 3:10) Anzɛɛ saa yɛsɛlɛ Gyihova kɛ ɔboa yɛ ɔmaa yɛgyakyi subane ɛtane bie a, ɔwɔ kɛ yɛkoati tɛnlabelɛ biala mɔɔ bamaa yɛala subane zɔhane ali la. (Kɔlɔsaema 3:5) Akee maa yɛzuzu asɔneyɛlɛ nwo kpuya bie mɔ anwo.

ASƆNEYƐLƐ NWO KPUYA BIE MƆ

9. Nwane a ɔwɔ kɛ yɛfa yɛ asɔneyɛlɛ yɛto ɔ nyunlu a? Duzu a Dwɔn 14:6 kilehile yɛ wɔ asɔneyɛlɛ nwo a?

9 Nwane a ɔwɔ kɛ yɛfa yɛ asɔneyɛlɛ yɛto ɔ nyunlu a? Gyisɛse hilehilele ye ɛdoavolɛma kɛ bɛva bɛ asɔneyɛlɛ bɛdo “yɛ Ze mɔɔ wɔ anwuma” la anyunlu. (Mateyu 6:9) Eza ɔhanle kɛ: “Mame a mele adenle ne nee nɔhalɛ ne nee ngoane ne a. Awie biala ɛmba Selɛ ne ɛkɛ kyesɛ ɔdua me nwo zo.” (Dwɔn 14:6) Yemɔti ɔwɔ kɛ yɛdua Gyisɛse anwo zo yɛsɛlɛ Gyihova angomekye. Duzu a Gyisɛse mɔɔ yɛdua ɔ nwo zo yɛayɛ asɔne la kile a? Amaa Gyihova adie yɛ asɔneyɛlɛ la, ɔwɔ kɛ yɛbu gyimalilɛ titili mɔɔ Gyihova ɛva ɛmaa Gyisɛse la. Kɛ mɔɔ yɛzukoale la, Gyisɛse rale azɛlɛ ye kɛ ɔbalie yɛ yeavi ɛtane nee ewule nu. (Dwɔn 3:16; Wulomuma 5:12) Eza Gyihova ɛkpa Gyisɛse kɛ Ɛsɔfo Kpanyinli nee Ndɛnebuavolɛ.​—Dwɔn 5:22; Hibuluma 6:20.

Ɛbahola wɔayɛ asɔne mekɛ biala

10. Asoo ɔhyia kɛ dahuu yɛkoto na yɛayɛ asɔne? Kilehile nu.

10 Asoo ɔhyia kɛ dahuu yɛkoto na yɛayɛ asɔne? Kyɛkyɛ, Gyihova ɛtɛkanle kɛ yɛyɛ zɔ. Baebolo ne kilehile yɛ kɛ yɛkola yɛfi ɛbulɛ nu yɛyɛ asɔne wɔ mekɛ mɔɔ yɛde aze, yɛhoto, anzɛɛ yɛgyi ɛkɛ la. (1 Edwɛkɛsisilɛ 17:16; Nihɛmaya 8:6; Daneɛle 6:10; Maake 11:25) Mɔɔ hyia Gyihova la a le kɛ yɛbavi ɛbulɛ nu yɛayɛ asɔne. Yɛbahola yɛabuke yɛ nloa anzɛɛ yɛaha ye wɔ yɛ ti anu wɔ ɛleka biala mɔɔ yɛwɔ la nee mekɛ biala. Saa yɛyɛ asɔne a, yɛlɛ  anwodozo kɛ Gyihova badie ɔnva nwo kɛ bie a awie gyɛne ɛnrɛde la.​—Nihɛmaya 2:1-6.

11. Duzu ninyɛne a yɛbahola yɛayɛ nwolɛ asɔne a?

11 Duzu a yɛbahola yɛayɛ nwolɛ asɔne a? Yɛbahola yɛayɛ debie biala mɔɔ sɔ Gyihova anye la anwo asɔne. Baebolo ne ka kɛ: “Debie biala mɔɔ yɛkɛbiza ye wɔ ye ɛhulolɛ zo la, ɔtie yɛ.” (1 Dwɔn 5:14) Asoo yɛbahola yɛayɛ ninyɛne mɔɔ ɔhyia yɛ la anwo asɔne? Ɛhɛe. Asɔneyɛlɛ le kɛ ɛ nee ɛ gɔnwo kpalɛ bie ɛlɛtendɛ la. Yɛbahola yɛaha debie biala mɔɔ wɔ yɛ adwenle nee yɛ ahonle nu la yɛahile Gyihova. (Edwɛne 62:8) Yɛbahola yɛazɛlɛ ye kɛ ɔva ye sunsum nwuanzanwuanza ne ɔboa yɛ ɔmaa yɛyɛ mɔɔ tenrɛ la. (Luku 11:13) Eza yɛbahola yɛazɛlɛ Gyihova kɛ ɔmaa yɛ nrɛlɛbɛ ɔmaa yɛzi kpɔkɛ kpalɛ na ɔmaa yɛnyia akɛnrasesebɛ yɛva yɛgyinla ngyegyelɛ nloa. (Gyemise 1:5) Ɔwɔ kɛ yɛsɛlɛ Gyihova kɛ ɔva yɛ ɛtane ɔhyɛ yɛ. (Ɛfɛsɛsema 1:3, 7) Eza ɔwɔ kɛ yɛyɛ asɔne yɛmaa awie mɔ, yɛ mbusuafoɔ nee yɛ asafo ne anu amra.​—Gyima ne 12:5; Kɔlɔsaema 4:12.

12. Duzu a ɔwɔ kɛ ɔkyia yɛ kpalɛ wɔ yɛ asɔneyɛlɛ nu a?

12 Duzu a ɔwɔ kɛ nwolɛ kyia yɛ wɔ yɛ asɔneyɛlɛ nu a? Gyihova nee ye ɛhulolɛdeɛ ɛyɛlɛ. Ɔwɔ kɛ yɛfi yɛ ahonle nu yɛyɛ Gyihova mo wɔ mɔɔ yeyɛ yemaa yɛ la anwo. (1 Edwɛkɛsisilɛ 29:10-13) Yɛkola yɛka ye zɔ ɔluakɛ mɔɔ Gyisɛse wɔ azɛlɛ ye azo la, ɔhilele ye ɛdoavolɛma kɛzi ɔwɔ kɛ bɛyɛ asɔne la. (Kenga Mateyu 6:9-13.) Ɔhanle kɛ ɔwɔ kɛ bɛdimoa bɛsɛlɛ kɛ Nyamenle duma nwo ɛde, kile kɛ, bɛbu ye kɛ ɔle nwuanzanwuanza. Akee Gyisɛse hanle kɛ yɛzɛlɛ yɛmaa Nyamenle Belemgbunlililɛ ne ɛrɛla na Gyihova ɛhulolɛdeɛ ɛyɛ ɛkɛ wɔ azɛlɛ ye amuala azo. Gyisɛse hanle kɛ yɛyɛ ninyɛne titili ɛhye mɔ anwo asɔne wiele kolaa na yeaha kɛ yɛyɛ mɔɔ yɛhyia  nwo la anwo asɔne. Saa yɛfa Gyihova nee ye ɛhulolɛdeɛ yɛdimoa wɔ yɛ asɔneyɛlɛ nu a, ɛnee yɛlɛmaa mɔɔ anwo hyia yɛ kpalɛ la ala ali.

13. Kɛzi ɔwɔ kɛ yɛ asɔneyɛlɛ tendenle yɛ ɛ?

13 Kɛzi ɔwɔ kɛ yɛ asɔneyɛlɛ tendenle yɛ ɛ? Baebolo ne ɛnga. Tɛnlabelɛ ne a bahile kɛ ɔwɔ kɛ yɛ asɔneyɛlɛ yɛ tendenle anzɛɛ ezinra a. Kɛ neazo la, bie a yɛbayɛ asɔne sikalɛ kolaa na yɛali aleɛ, noko saa yɛlɛyɛ Gyihova  mo anzɛɛ yɛlɛka yɛ ngyegyelɛ nwo edwɛkɛ yɛahile ye a, bie a yɛ asɔneyɛlɛ ne bayɛ tendenle. (1 Samoɛle 1:12, 15) Yɛmkpondɛ kɛ yɛyɛ asɔne tendenle kɛ yɛmaa menli anye alie yɛ nwo, kɛ mɔɔ menli bie mɔ yɛle wɔ Gyisɛse mekɛ zo la. (Luku 20:46, 47) Gyihova anye ɛnlie asɔneyɛlɛ zɛhae mɔ anwo. Mɔɔ hyia Gyihova la a le kɛ yɛbavi yɛ ahonle nu yɛayɛ asɔne.

14. Fane nyɛ a ɔwɔ kɛ yɛyɛ asɔne a, na duzu a ɛhye maa yɛnwu ye wɔ Gyihova anwo a?

14 Fane nyɛ a ɔwɔ kɛ yɛyɛ asɔne a? Gyihova se yɛ nee ye ɛdendɛ dahuu. Baebolo ne se ɔwɔ kɛ ‘yɛyɛ asɔne dahuu’ anzɛɛ ‘yɛkɔ zo yɛyɛ asɔne.’ (Mateyu 26:41; Wulomuma 12:12; 1 Tɛsalonaekama 5:17) Gyihova ɛziezie ɔ nwo kɛ ɔbadie yɛ dahuu. Yɛbahola yɛayɛ ye mo alehyenlɛ biala wɔ ye ɛlɔlɛ nee ye kpalɛyɛlɛ ne anwo. Eza yɛbahola  yɛazɛlɛ adehilelɛ, anwosesebɛ nee arɛlekyekyelɛ yɛavi ye ɛkɛ. Saa yɛ nye sɔ asɔneyɛlɛ nwo adenle mɔɔ yɛlɛ la a, ɛnee ɔwɔ kɛ yɛfa nwolɛ adenle biala mɔɔ yɛbanyia la yɛ nee Gyihova tendɛ.

15. Saa yɛyɛ asɔne yɛwie a, duzu ati a ɔwɔ kɛ yɛka “amen” a?

15 Saa yɛyɛ asɔne yɛwie a, duzu ati a ɔwɔ kɛ yɛka “amen” a? Edwɛkɛkpɔkɛ “amen” kile kɛ “ɔyɛ zɔ” anzɛɛ “ɔyɛ ɛkɛ.” Ɔle adenle mɔɔ yɛdua zo yɛkile kɛ yɛ asɔneyɛlɛ ne anwo hyia yɛ, kile kɛ, ɔvi yɛ ahonle nu. (Edwɛne 41:13) Baebolo ne kilehile yɛ kɛ, saa awie yɛ asɔne wɔ bagua nu wie a, ɔle kpalɛ kɛ yɛbaha “amen,” bie a yɛbaha ye kpole anzɛɛ yɛ ti anu, yeava yeahile kɛ yɛdie mɔɔ ahenle hanle la yɛto nu.​—1 Edwɛkɛsisilɛ 16:36; 1 Kɔlentema 14:16.

KƐZI NYAMENLE BUA YƐ ASƆNEYƐLƐ LA

16. Asoo amgba Gyihova bua yɛ asɔneyɛlɛ? Kilehile nu.

16 Asoo amgba Gyihova bua yɛ asɔneyɛlɛ? Ɛhɛe. Baebolo ne fɛlɛ ye “asɔneyɛlɛ Tievolɛ.” (Edwɛne 65:2) Gyihova tie alesama mgbe dɔɔnwo mɔɔ fi ahonle nu yɛ asɔne la, na ɔdua ndenle ngakyile zo ɔbua bɛ asɔneyɛlɛ.

17. Kɛzi Gyihova dua anwumabɔvolɛma nee ye azonvolɛ mɔɔ bɛwɔ azɛlɛ ye azo la anwo zo bua yɛ asɔneyɛlɛ ɛ?

17 Gyihova dua anwumabɔvolɛma nee ye azonvolɛ mɔɔ wɔ azɛlɛ ye azo la anwo zo bua yɛ asɔneyɛlɛ. (Hibuluma 1:13, 14) Yɛlɛ awie mɔ mɔɔ bɛyɛle asɔne kɛ Nyamenle ɛboa bɛ ɔmaa bɛde Baebolo ne abo na yeangyɛ Gyihova Alasevolɛ hɔle bɛ ɛkɛ la anwo neazo dɔɔnwo. Baebolo ne maa yɛnwu kɛ anwumabɔvolɛma noko boka nwo a yɛlɛbɔ “edwɛkpa” ne nolo wɔ azɛlɛ ye azo amuala a. (Kenga Yekile 14:6.) Eza yɛ nuhua dɔɔnwo ɛyɛ yɛ ngyegyelɛ anzɛɛ yɛ ngyianlɛ titili bie anwo  asɔne, na yɛ diema Kilisienenli bie ɛboa yɛ.​—Mrɛlɛbulɛ 12:25; Gyemise 2:16.

Gyihova kola dua moalɛ mɔɔ yɛnyia yɛfi yɛ mediema Kilisienema ɛkɛ la azo bua yɛ asɔneyɛlɛ

18. Kɛzi Gyihova dua ye sunsum nwuanzanwuanza ne nee Baebolo ne azo bua yɛ asɔneyɛlɛ ɛ?

18 Gyihova dua ye sunsum nwuanzanwuanza ne azo bua yɛ asɔneyɛlɛ. Saa yɛyɛ asɔne kɛ ɔboa yɛ ɔmaa yɛgyinla ngyegyelɛ bie anloa a, ɔbahola yealua ye sunsum nwuanzanwuanza ne azo yeamaa yɛ adehilelɛ nee anwosesebɛ. (2 Kɔlentema 4:7) Eza Gyihova dua Baebolo ne azo bua yɛ asɔneyɛlɛ na ɔboa yɛ ɔmaa yɛsi kpɔkɛ kpalɛ. Saa yɛkenga Baebolo ne a, bie a yɛbanwu ngɛlɛlera mɔɔ baboa yɛ la. Eza Gyihova kola ka awie maa ɔmaa mualɛ bie mɔɔ ɔwɔ kɛ yɛte anzɛɛ ɔkola ɔmaa asafo nu kpanyinli bie nee yɛ suzu ngɛlɛlera bie anwo wɔ debiezukoalɛ bo.​—Galeehyeama 6:1.

19. Duzu ati a bie a ɔbazɔho kɛ Gyihova ɛmbua yɛ asɔneyɛlɛ ɛ?

19 Noko ɔdwu mekɛ ne bie a, bie a yɛbabiza yɛ nwo kɛ, ‘Duzu ati a Gyihova ɛtɛbuale me asɔneyɛlɛ ne a?’ Kakye kɛ ɔze mekɛ nee adenle mɔɔ ɔwɔ kɛ ɔdua zo ɔbua yɛ asɔneyɛlɛ a. Ɔze mɔɔ yɛhyia nwo la. Bie a ɔwɔ kɛ yɛkɔ zo yɛyɛ asɔne amaa yeala ali kɛ deɛ ne mɔɔ yɛlɛyɛ nwolɛ asɔne la hyia yɛ yɛɛ yɛlɛ Gyihova anu diedi. (Luku 11:5-10) Ɔdwu mekɛ ne bie a Gyihova bua yɛ asɔneyɛlɛ wɔ adenle mɔɔ yɛ nye ɛnla la azo. Kɛ neazo la, bie a yɛbayɛ tɛnlabelɛ ɛsesebɛ bie anwo asɔne, noko kɛ anrɛɛ ɔbaye ngyegyelɛ ne yeavi ɛkɛ la, bie a ɔbamaa yɛ anwosesebɛ yeamaa yɛagyinla ɔ nloa.​—Kenga Felepaema 4:13.

20. Duzu ati a ɔwɔ kɛ yɛkɔ zo yɛyɛ asɔne a?

20 Nea nwolɛ adenle kɛnlɛma mɔɔ yɛlɛ kɛ yɛbayɛ asɔne a! Yɛbahola yɛanyia anwodozo kɛ Gyihova badie yɛ. (Edwɛne 145:18) Yɛɛ saa yɛkɔ zo yɛfi yɛ ahonle nu yɛyɛ asɔne a, agɔnwolɛvalɛ mɔɔ yɛ nee Gyihova lɛ la anu bamia kpalɛ.