Wulu kɔ nuhua edwɛkɛ ne azo

Wulu kɔ nuninyɛne ne azo

 TILE BULU NEE MƆTWƐ

Asoo Ɔwɔ Kɛ Meyila Me Nwo Zo Na Bɛsɔne Me?

Asoo Ɔwɔ Kɛ Meyila Me Nwo Zo Na Bɛsɔne Me?

1. Duzu a bie a buluku ɛhye mɔɔ wɔzukoa la bamaa wɔabiza ɛ nwo a?

BULUKU ɛhye mɔɔ ɛlɛsukoa la ɛmaa wɔnwu Baebolo nu nɔhalɛ dɔɔnwo mɔɔ bie a le dahuu ngoane nwo ɛwɔkɛ mɔɔ Nyamenle ɛbɔ, tɛnlabelɛ mɔɔ mowuamra wɔ nu yɛɛ ewudwazo nwo anyelazo ne. (Nolobɔvo 9:5; Luku 23:43; Dwɔn 5:28, 29; Yekile 21:3, 4) Bie a wɔbɔ ɔ bo ɛlɛkɔ Gyihova Alasevolɛ debiezukoalɛ ne bie na ɛdie ɛdi kɛ bɛ ɛzonlenlɛ ne le nɔhalɛ. (Dwɔn 13:35) Bie a ɛ nee Gyihova ɛlɛnyia agɔnwolɛvalɛ kpalɛ na wɔzi kpɔkɛ kɛ ɛbazonle ye. Yemɔti bie a ɛbabiza ɛ nwo  kɛ, ‘Duzu a ɔwɔ kɛ meyɛ ye kɛkala amaa meazonle Nyamenle ɛ?’

2. Duzu ati a ɛnee Yiteyopeanli ne kpondɛ kɛ bɛsɔne ye a?

2 Zɔhane ala a Yiteyopea nrenyia bie mɔɔ dɛnlanle aze wɔ Gyisɛse mekɛ zo la yɛle a. Bɛdwazole Gyisɛse la anzi mekɛ ekyi, Gyisɛse ɛdoavolɛ Felepe hanle edwɛkpa ne hilele Yiteyopeanli ne. Felepe maanle ɔnwunle kɛ Gyisɛse a le Mɛzaya ne a. Mɔɔ Yiteyopeanli ne zukoale la hanle ye ahonle na ndɛndɛ ne ala ɔhanle kɛ: “Nea! Nzule ɛne; duzu a si me ɛzɔnenlɛ nwo adenle a?”​—Gyima ne 8:26-36.

3. (a) Mɛla boni a Gyisɛse vale maanle ye ɛdoavolɛma a? (b) Kɛzi ɔwɔ kɛ bɛsɔne awie ɛ?

3 Baebolo ne maa ɔda ali wienyi kɛ, saa ɛkpondɛ kɛ ɛsonle Gyihova a, ɔwɔ kɛ bɛsɔne wɔ. Gyisɛse zele ye ɛdoavolɛma kɛ: “Bɛyɛ maanle maanle kɔsɔɔti anu menli me ɛdoavolɛma, bɛzɔne bɛ.” (Mateyu 28:19) Gyisɛse mumua ne maanle bɛzɔnenle ye ɔvale ɔyɛle nwolɛ neazo. Bɛnlomanle ye nzule nu, bɛanva nzule bɛamkponde ɔ ti zo ala. (Mateyu 3:16) Ɛnɛ saa bɛbazɔne Kilisienenli bie a, ɔwɔ kɛ bɛnoma anzɛɛ bɛwula ye wɔ nzule nu.

4. Saa bɛsɔne wɔ a, duzu a ɔmaa awie mɔ nwu ye a?

4 Saa bɛsɔne wɔ a, ɔmaa awie mɔ nwu kɛ amgba ɛkpondɛ kɛ ɛyɛ Nyamenle agɔnwo na ɛsonle ye. (Edwɛne 40:7, 8) Yemɔti bie a ɛbabiza ɛ nwo kɛ, ‘Duzu a ɔwɔ kɛ meyɛ na bɛazɔne me a?’

NYAMENLE ANWO NDELEBƐBO NEE DIEDI

5. (a) Duzu a ɔwɔ kɛ ɛdimoa ɛyɛ na bɛazɔne wɔ a? (b) Duzu ati a debiezukoalɛ ne mɔ anwo hyia ɛ?

5 Kolaa na bɛazɔne wɔ la, ɔwɔ kɛ ɛnwu Gyihova nee Gyisɛse. Wɔbɔ ɛhye abo dɛba ɔlua Baebolo ne mɔɔ ɛlɛsukoa  la azo. (Kenga Dwɔn 17:3.) Noko ɔtɛwiele. Baebolo ne ka kɛ ɔwɔ kɛ ɛnyia Gyihova ɛhulolɛdeɛ ne anwo “nɔhalɛ ndelebɛbo” kpole. (Kɔlɔsaema 1:9) Gyihova Alasevolɛ debiezukoalɛ ne mɔ bamaa ɛ nee Gyihova anyia agɔnwolɛvalɛ kpalɛ. Ɛhye a le debie titili ko mɔɔ ɔti ɔwɔ kɛ ɛkɔ debiezukoalɛ dahuu la.​—Hibuluma 10:24, 25.

Kolaa na bɛazɔne wɔ la, ɔwɔ kɛ ɛsukoa Baebolo ne

6. Baebolo ne anu ninyɛne boni a ɔwɔ kɛ ɛnwu ye kolaa na bɛazɔne wɔ a?

6 Nɔhalɛ nu, Gyihova anye ɛnla kɛ ɛbanwu debie biala mɔɔ wɔ Baebolo ne anu la kolaa na bɛazɔne wɔ. Ɛnee ɔ nye ɛnla kɛ Yiteyopeanli ne banwu debie biala kolaa na bɛazɔne ye. (Gyima ne 8:30, 31) Yɛbahɔ zo yɛazukoa Nyamenle anwo debie dahuu. (Nolobɔvo 3:11) Noko kolaa na bɛazɔne wɔ la, ɔwɔ kɛ ɛnwu mɔlebɛbo Baebolo ngilehilelɛ ne mɔ na ɛdie ɛto nu.​—Hibuluma 5:12.

7. Kɛzi Baebolo ne mɔɔ ɛlɛsukoa la ɛboa wɔ ɛ?

7 Baebolo ne ka kɛ: “Awie ɛnlɛ diedi a ɔngola ɔnzɔ Nyamenle anye.” (Hibuluma 11:6) Ɔti ɔwɔ kɛ ɛnyia diedi kolaa na bɛazɔne wɔ. Baebolo ne ka kile yɛ kɛ mɔɔ tete suakpole Kɔlente azo amra bie mɔ dele Gyisɛse ɛdoavolɛma ne ngilehilelɛ ne la, ‘bɛliele bɛlile na bɛzɔnenle bɛ.’ (Gyima ne 18:8) Zɔhane ala a Baebolo ne mɔɔ ɛlɛsukoa la ɛmaa wɔnyia Nyamenle ɛwɔkɛ ne mɔ nee Gyisɛse afɔlebɔlɛ ne mɔɔ kola die yɛ fi ɛtane nee ewule nu la anu diedi a.​—Dwɔhyua 23:14; Gyima ne 4:12; 2 Timote 3:16, 17.

KA BAEBOLO NU NƆHALƐ NE KILE AWIE MƆ

8. Duzu a bamaa wɔanyia ɛhulolɛ kɛ ɛha mɔɔ ɛlɛsukoa la anwo edwɛkɛ ɛhile awie mɔ a?

8 Mekɛ mɔɔ ɛbanwu kɛzi ninyɛne dɔɔnwo mɔɔ  ɛlɛsukoa wɔavi Baebolo ne anu la ɛlɛboa wɔ la, wɔ diedi nu bamia. Akee ɛbanyia ɛhulolɛ kɛ ɛka mɔɔ ɛlɛsukoa la anwo edwɛkɛ wɔahile awie mɔ. (Gyɛlɛmaya 20:9; 2 Kɔlentema 4:13) Noko nwane mɔ a ɔwɔ kɛ ɛka ɛkile bɛ a?

Ɔwɔ kɛ diedi maa ɛka mɔɔ ɛdie ɛdi la anwo edwɛkɛ ɛkile awie mɔ

9, 10. (a) Nwane mɔ a ɛbahola wɔabɔ ɔ bo wɔaha mɔɔ wɔzukoa la bie wɔahile bɛ a? (b) Saa ɛkpondɛ kɛ ɛ nee asafo ne bɔ nu ka edwɛkɛ ne a, duzu a ɔwɔ kɛ ɛyɛ a?

9 Ɛbahola wɔaha mɔɔ ɛlɛsukoa la anwo edwɛkɛ wɔahile wɔ mbusuafoɔ, ɛ gɔnwo mɔ, wɔ kpalɛzoamra anzɛɛ ɛ gɔnwo mɔ gyimayɛvoma. Ɛyɛ zɔ a ɔle kpalɛ, noko anrɛɛ yɛ ye wɔ atiakunlukɛnlɛma nee ɛlɔlɛ nu. Nzinlii, akee ɛbahola ɛ nee asafo ne abɔ nu aha edwɛkɛ ne. Saa ɛkulo kɛ ɛyɛ zɔ a, ka kile Dasevolɛ ne mɔɔ nee wɔ sukoa Baebolo ne la kɛ ɛkpondɛ kɛ ɛ nee asafo ne anu amra bɔ nu yɛ daselɛlilɛ gyima ne. Saa Dasevolɛ ne nwu kɛ ɛbahola wɔali daselɛ yɛɛ saa ɛlɛfa Baebolo ngyinlazo wɔabɔ wɔ ɛbɛla a, asafo nu mgbanyima nwiɔ nee bɛ mu nwiɔ bayia.

10 Saa bɛyia bɛ a, duzu a bɛbaha nwolɛ edwɛkɛ a? Mgbanyima ne mɔ nee wɔ badendɛ anlea kɛ ɛte mɔlebɛbo Baebolo ngilehilelɛ ne mɔ abo, ɛdie ɛdi, ɛfa ɛbɔ wɔ ɛbɛla, yɛɛ saa amgba ɛkpondɛ kɛ ɛyɛ Gyihova Dasevolɛ a. Kakye kɛ mgbanyima ne mɔ a nea asafo ne anu amra nee ɛdawɔ noko ɛ nwo zo a, yemɔti mmasulo kɛ ɛ nee bɛ badendɛ. (Gyima ne 20:28; 1 Pita 5:2, 3) Wɔ ayia ɛhye anzi, mgbanyima ne mɔ bamaa wɔanwu kɛ saa ɛbahola ɛ nee asafo ne abɔ nu aha edwɛkɛ ne a.

11. Duzu ati a ɔwɔ kɛ ɛyɛ nzenzaleɛ kolaa na wɔahola ɛ nee asafo ne abɔ nu aha edwɛkɛ ne a?

11 Bie a mgbanyima ne mɔ baha ahile wɔ kɛ ɔwɔ kɛ  ɛyɛ nzenzaleɛ bie mɔ kolaa na wɔahola ɛ nee asafo ne abɔ nu aha edwɛkɛ ne. Duzu ati a ɔwɔ kɛ ɛyɛ nzenzaleɛ ɛhye mɔ a? Ɔluakɛ yɛgyi Gyihova agyakɛ anu wɔ mekɛ mɔɔ yɛlɛka Nyamenle edwɛkɛ ne la, yemɔti ɔwɔ kɛ yɛ ɛbɛlabɔlɛ di ye eni.​—1 Kɔlentema 6:9, 10; Galeehyeama 5:19-21.

NU Ɛ NWO NA KAKYI

12. Duzu ati a ɔwɔ kɛ awie biala nu ɔ nwo a?

12 Debie bieko wɔ ɛkɛ mɔɔ ɔwɔ kɛ ɛyɛ kolaa na bɛazɔne wɔ a. Ɛzoanvolɛ Pita hanle kɛ: “Yemɔti bɛnlu bɛ nwo na bɛhakyi bɛ ɛbɛlabɔlɛ amaa bɛakyikyi bɛ ɛtane.” (Gyima ne 3:19) Bɛka kɛ yɛnlu yɛ nwo a, ɔkile duzu? Ɔkile kɛ ɔwɔ kɛ yɛdi nyane kpole wɔ ɛtane mɔɔ yɛyɛ la anwo. Kɛ neazo la, saa ɛnee ɛbɔ adwɔmane a, ɔwɔ kɛ ɛnu ɛ nwo. Saa bɔbɔ wɔbɔ mɔdenle kɛ ɛyɛ mɔɔ tenrɛ la dahuu a, ɔwɔ kɛ ɛnu ɛ nwo, ɔluakɛ yɛ muala yɛfo na ɔwɔ kɛ yɛsɛlɛ Nyamenle ɛkɛ ne ɛtanefakyɛ.​—Wulomuma 3:23; 5:12.

13. Saa bɛka kɛ ‘ɛhakyi’ a, ɔkile duzu?

13 Saa ɛdi nyane wɔ ɛtane mɔɔ wɔyɛ la anwo ala a, ɛnee wɔwie ɔ? Kyɛkyɛ. Pita hanle kɛ ɔwɔ kɛ ‘ɛkakyi wɔ ɛbɛlabɔlɛ.’ Ɛhye kile kɛ ɔwɔ kɛ ɛgyakyi wɔ subane dɛba biala mɔɔ ɛnle kpalɛ la na ɛyɛ mɔɔ tenrɛ la. Kɛ neazo la, fa ye kɛ ɛlɛtu adenle wɔahɔ ɛleka bie mɔɔ ɛtɛkɔle ɛkɛ ne ɛlɛ la. Mekɛ mɔɔ wɔpɛ adenle ne ekyii la, akee ɛnwu kɛ ɛleka mɔɔ ɛlua la ɛkpondɛ wɔaminli. Duzu a ɛbayɛ a? Nɔhalɛ nu, ɛbado wɔ ɛdialɛ ne anu, wɔagyinla, na akee wɔahakyi ɛ nwo wɔava adenle fɔɔnwo ne azo. Zɔhane ala a mekɛ mɔɔ ɛlɛsukoa Baebolo ne la, ɛbanwu kɛ ɔwɔ kɛ ɛkakyi subane bie mɔ nee  kɛzi ɛyɛ ninyɛne bie mɔ la. Nyia ɛhulolɛ kɛ ‘ɛbahakyi’​—kile kɛ, ɛbayɛ nzenzaleɛ mɔɔ fɛta la​—na bɔ ɔ bo yɛ mɔɔ tenrɛ la.

YILA Ɛ NWO ZO

Wɔbɔ Gyihova ɛwɔkɛ kɛ ɛbazonle ye ɔ?

14. Kɛzi ɛbayila ɛ nwo zo wɔamaa Nyamenle ɛ?

14 Debie bieko mɔɔ ɔhyia kɛ ɛyɛ kolaa na bɛazɔne wɔ la a le kɛ ɛbayila ɛ nwo zo wɔamaa Gyihova. Saa ɛlɛyila ɛ nwo zo wɔamaa Gyihova a, ɛbɔ ye ɛwɔkɛ wɔ asɔneyɛlɛ nu kɛ ɛbazonle ɔ ngomekye na wɔamaa ye ɛhulolɛdeɛ ɛyɛlɛ alimoa wɔ wɔ ɛbɛlabɔlɛ nu.​—Ditilɔnomi 6:15.

15, 16. Duzu a ka awie maa ɔyila ɔ nwo zo ɔmaa Nyamenle a?

15 Gyihova mɔɔ ɛbɔ ye ɛwɔkɛ kɛ ɛbazonle ɔ ngomekye la le kɛ ɛbɔ awie mɔɔ ɛkulo ye la ɛwɔkɛ kɛ ɛ nee ye badɛnla wɔ wɔ ngoane mekɛ kɔsɔɔti anu la. Fa ye kɛ nrenyia bie nee raalɛ bie ɛlɛtu kɛ bɛgya. Mekɛ mɔɔ nrenyia ne ɛlɛnwu raalɛ ne kpalɛ la, ɔ nye die ɔ nwo na ɔnyia ɛhulolɛ kɛ ɔbagya ye. Ɔnva nwo kɛ ɛhye le kpɔkɛzilɛ mɔɔ hyia kpalɛ la, nrenyia ne die to nu ɔluakɛ ɔkulo ye.

16 Mekɛ mɔɔ ɛlɛsukoa Gyihova anwo debie la, ɛbahulo ye na wɔanyia ɛhulolɛ kɛ ɛbɔ mɔdenle wɔazonle ye. Ɛhye bamaa wɔabɔ ye ɛwɔkɛ wɔ asɔneyɛlɛ nu kɛ ɛbazonle ye. Baebolo ne ka kɛ ɔwɔ kɛ awie biala mɔɔ kpondɛ kɛ ɔtoa Gyisɛse la ‘kpo ɔ nwo.’ (Maake 8:34) Duzu a ɛhye kile a? Ɔkile kɛ ɛbamaa tieyɛ mɔɔ ɛyɛ wɔamaa Gyihova la alimoa wɔ ɛbɛlabɔlɛ nu. Gyihova ɛhulolɛdeɛ hyia tɛla mɔɔ ɛkulo nee bodane mɔɔ gyi ɛ nye zo la.​—Kenga 1 Pita 4:2.

 MMASULO KƐ ƐNRƐHOLA WƆ ƐWƆKƐ ZO DI

17. Duzu ati a bie mɔ ɛnyila bɛ nwo zo ɛmmaa Gyihova ɛ?

17 Menli dɔɔnwo ɛnyila bɛ nwo zo ɛmmaa Gyihova ɔluakɛ bɛsulo kɛ bie a ɛnee bɛangola ɛwɔkɛ mɔɔ bɛkɛbɔ kɛ bɛsonle ye la azo di. Bɛmkpondɛ kɛ bɛbɔ Gyihova arɛle, anzɛɛ bie a bɛnyia adwenle kɛ saa bɛanyila bɛ nwo zo bɛammaa Gyihova a, ɔnrɛdea bɛ wɔ mɔɔ bɛbayɛ la anwo.

18. Duzu a baboa wɔ na wɔali ɛzulolɛ mɔɔ ɛlɛ kɛ bie a ɛbamaa Gyihova arɛle abɔ la azo a?

18 Ɛlɔlɛ mɔɔ ɛlɛ ɛmaa Gyihova la bamaa wɔali ɛzulolɛ mɔɔ ɛlɛ kɛ bie a ɛbamaa ɔ rɛle abɔ la azo. Kɛmɔ ɛkulo ye la ati, ɛbabɔ mɔdenle kɛ ɛbali wɔ ɛwɔkɛ zo. (Nolobɔvo 5:4; Kɔlɔsaema 1:10) Ɛnrɛnyia adwenle kɛ Gyihova ɛhulolɛdeɛ ɛyɛlɛ yɛ se. Ɛzoanvolɛ Dwɔn hɛlɛle kɛ: “Ɛhye a Nyamenle anwo ɛlɔlɛ kile a, kɛ yɛkɛli ye mɛla ne mɔ azo; yɛɛ ye mɛla ne mɔ ɛnle adesoa.”​—1 Dwɔn 5:3.

19. Duzu ati a ɔnle kɛ ɛsulo kɛ ɛkɛyila ɛ nwo zo ɛkɛmaa Gyihova ɛ?

19 Ɔngyia kɛ ɛdi munli bɔkɔɔ na wɔayila ɛ nwo zo wɔamaa Gyihova. Ɔ nye ɛnla kɛ yɛbayɛ ninyɛne mɔɔ yɛnrɛhola ye yɛ la. (Edwɛne 103:14) Ɔbaboa wɔ yeamaa wɔayɛ mɔɔ tenrɛ la. (Ayezaya 41:10) Fa ɛ rɛle wula Gyihova anu, na “ɔbamaa wɔ ndenle adenrɛ fɔɔnwo.”​—Mrɛlɛbulɛ 3:5, 6.

KA YE BAGUA NU NA NYIA NGOANE

20. Saa ɛyila ɛ nwo zo ɛmaa Nyamenle ɛwie a, boni a doa zo a?

20 Asoo ɛnea a mekɛ ɛdwu kɛ ɛyila ɛ nwo zo ɛmaa Gyihova ɔ? Saa ɛyila ɛ nwo zo ɛmaa Gyihova ɛwie a, ɛnee mekɛ ɛdwu kɛ ɛyɛ mɔɔ doa zo la. Ɔwɔ kɛ bɛsɔne wɔ.

21, 22. Kɛzi ɛbahola ‘wɔaha wɔ diedi ne bagua nu’ ɛ?

 21 Bɔ wɔ asafo ne anu mgbanyima avinli ngitanwodivolɛ ne amaneɛ kɛ wɔyila ɛ nwo zo wɔmaa Gyihova na ɛkpondɛ kɛ bɛsɔne wɔ. Ɔbamaa mgbanyima bie mɔ nee wɔ azuzu mɔlebɛbo Baebolo ngilehilelɛ bie mɔ anwo. Saa bɛnwu kɛ ɛfɛta a, bɛbaha bɛahile wɔ kɛ bɛbahola bɛazɔne wɔ wɔ Gyihova Alasevolɛ nyianu bieko abo. Wɔ nyianu ne abo, bɛbamaa ɛdendɛlɛ mɔɔ bahilehile  bodane mɔɔ ɛzɔnenlɛ ne gyi zo la anu. Akee ahenle mɔɔ bamaa ɛdendɛlɛ ne la babiza menli mɔɔ bɛkpondɛ kɛ bɛsɔne bɛ la kpuya nwiɔ. Saa ɛbua kpuya ɛhye mɔ a, ɛnee ‘wɔha wɔ diedi ne ɛ nloa wɔ bagua nu.’​—Wulomuma 10:10.

22 Akee bɛbazɔne wɔ. Bɛbava wɔ sonlabaka ne amuala bɛawula nzule nu. Ɛzɔnenlɛ ne bamaa awie  biala anwu kɛ wɔyila ɛ nwo zo wɔmaa Gyihova na kɛkala ɛle Gyihova Dasevolɛ.

MƆƆ WƆ ƐZƆNENLƐ NE GYI ƐKƐ NE MAA LA

23. Saa bɛsɔne awie wɔ “Selɛ ne, Ralɛ ne nee sunsum nwuanzanwuanza ne duma nu” a, ɔkile duzu?

23 Gyisɛse hanle kɛ bɛbazɔne ye ɛdoavolɛma wɔ “Selɛ ne, Ralɛ ne nee sunsum nwuanzanwuanza ne duma nu.” (Kenga Mateyu 28:19.) Duzu a ɛhye kile a? Ɛhye kile kɛ ɛbalie tumi mɔɔ Gyihova lɛ nee gyima mɔɔ Gyisɛse di wɔ Nyamenle bodane nu yɛɛ kɛzi Nyamenle fa ye sunsum nwuanzanwuanza ne di ye bodane nwo gyima la wɔado nu.​—Edwɛne 83:18; Mateyu 28:18; Galeehyeama 5:22, 23; 2 Pita 1:21.

Saa bɛsɔne wɔ a, ɛnee ɛlɛmaa bɛanwu kɛ ɛkpondɛ kɛ ɛyɛ Nyamenle ɛhulolɛdeɛ

24, 25. (a) Ɛzɔnenlɛ gyi ɛkɛ ne maa duzu? (b) Duzu a yɛbazuzu nwo wɔ tile mɔɔ li awieleɛ la anu a?

24 Ɛzɔnenlɛ gyi ɛkɛ ne maa debie mɔɔ anwo hyia kpalɛ la. Saa bɛwula wɔ nzule ne abo a, ɔkile kɛ wɔhu anzɛɛ wɔgyakyi wɔ ɛbɛlabɔlɛ dɛba ne. Saa bɛye wɔ bɛfi nzule ne anu a, ɔkile kɛ ɛbabɔ ɛbɛlabɔlɛ fofolɛ bo kɛ ɛyɛ Nyamenle ɛhulolɛdeɛ. Ɔkile kɛ ɔvi mekɛ zɔhane mɔɔ kɔ la, Gyihova ala a ɛbazonle ye a. Kakye kɛ tɛ awie, ahyehyɛdeɛ anzɛɛ gyima bie yɛɛ wɔyila ɛ nwo zo wɔmaa ye a. Gyihova a wɔyila ɛ nwo zo wɔmaa ye a.

25 Ɛ nwo zo ɛyilalɛ ne bamaa ɛ nee Nyamenle anyia agɔnwolɛvalɛ kpalɛ. (Edwɛne 25:14) Ɛhye ɛngile kɛ saa bɛsɔne awie a ɔbanyia ngoane. Ɛzoanvolɛ Pɔɔlo hɛlɛle kɛ: “Bɛhɔ zo bɛva ɛzulolɛ nee anwowosolɛ bɛyɛ bɛ ngoanelielɛ nwo gyima.” (Felepaema 2:12) Ɛzɔnenlɛ le ye mɔlebɛbo ala. Noko kɛ ɔkɛyɛ na wɔahɔ zo wɔabeta Gyihova anwo ɛ? Buluku ɛhye tile mɔɔ li awieleɛ la babua zɔhane kpuya ne.