Wulu kɔ nuhua edwɛkɛ ne azo

Wulu kɔ nuninyɛne ne azo

 TILE NWIƆ

Baebolo Ne Le Buluku Mɔɔ Vi Nyamenle Ɛkɛ

Baebolo Ne Le Buluku Mɔɔ Vi Nyamenle Ɛkɛ

1, 2. Duzu ati a Baebolo ne le ahyɛlɛdeɛ kɛnlɛma mɔɔ vi Nyamenle ɛkɛ a?

SAA ɛ gɔnwo bie kyɛ wɔ debie wɔ mekɛ mɔɔ ɛ nye ɛnla la a, kɛzi ɛte nganeɛ ɛ? Ɛ nwo pele wɔ kɛ ɛbuke nuhua wɔanlea, na ɛ nye die kɛ ɛ gɔnwo ne dwenlenle ɛ nwo la. Na ɛda ye ase.

2 Baebolo ne le ahyɛlɛdeɛ mɔɔ vi Nyamenle ɛkɛ a. Ɔka edwɛkɛ mɔɔ yɛnrɛnwu ye wɔ ɛleka gyɛne biala la ɔkile yɛ. Kɛ neazo la, ɔka ɔkile yɛ kɛ Nyamenle bɔle anwuma, azɛlɛ ye yɛɛ nrenyia nee raalɛ mɔɔ limoa la. Ɔfa ngyinlazo mɔɔ bahola aboa yɛ wɔ yɛ ngyegyelɛ nu la ɔmaa yɛ. Yɛnwu kɛzi Nyamenle bali ye bodane nwo gyima na yeamaa azɛlɛ ye azo ayɛ ɛleka kpalɛ la wɔ Baebolo ne anu. Baebolo ne le ahyɛlɛdeɛ kɛnlɛma!

3. Saa ɛlɛsukoa Baebolo ne a, duzu a ɛbanwu ye a?

3 Mekɛ mɔɔ ɛlɛsukoa Baebolo ne la, ɛbanwu kɛ Nyamenle kpondɛ kɛ ɛyɛ ɔ gɔnwo. Mekɛ mɔɔ ɛlɛsukoa ɔ nwo ninyɛne dɔɔnwo la, ɛ nee ye agɔnwolɛvalɛ ne anu bamia.

4. Duzu a ɛ nye die nwo wɔ Baebolo ne anwo a?

4 Bɛhile Baebolo ne amuala anzɛɛ ye foa bie abo bɛhɔ aneɛ mɔɔ bo 3,000 la anu yɛɛ bɛpelente ye mgbe mgbe dɔɔnwo. Saa ɛkyɛ menli mɔɔ wɔ ewiade la anu 100 a, bɛ nuhua mɔɔ bo 90 la lɛ Baebolo wɔ bɛ aneɛ nu. Eza dapɛne biala, menli mɔɔ bo mgbe ko la asa ka Baebolo ne bie! Nɔhalɛ nu, buluku gyɛne biala nee Baebolo ne ɛnzɛ.

5. Duzu ati a yɛkola yɛka kɛ Baebolo ne “vi Nyamenle sunsum nu” a?

 5 Baebolo ne “vi Nyamenle sunsum nu.” (Kenga 2 Timote 3:16.) Wɔannea a bie mɔ baha kɛ, ‘Menli a hɛlɛle Baebolo ne a, ɔti kɛmɔti a bɛse ɔvi Nyamenle ɛkɛ ɛ?’ Baebolo ne bua kɛ: “Sunsum nwuanzanwuanza ne a hanle menli [anzɛɛ, hilele bɛ adenle] maanle bɛhanle mɔɔ vi Nyamenle ɛkɛ ne la a.” (2 Pita 1:21) Ɔle kɛ gyimamenle bie mɔɔ ɔse ye kɛlɛhɛlɛvolɛ ne ɛhɛlɛ ye kɛlata ɛmaa ye la. Ɔti kɛlata ne le nwane ɛdeɛ? Gyimamenle ne kɛlata ɔ, tɛ kɛlɛhɛlɛvolɛ ne ɛdeɛ ɔ. Zɔhane ala a Baebolo ne le Nyamenle ɛdeɛ a, na tɛ menli mɔɔ ɔmaanle bɛhɛlɛle la ɔ. Nyamenle hilele bɛ adenle maanle bɛhɛlɛle ye nzuzulɛ. Amgba Baebolo ne le “Nyamenle edwɛkɛ.”​—1 Tɛsalonaekama 2:13; nea Awieleɛdwɛkɛ 2.

 BAEBOLO NE ANU EDWƐKƐ LE PƐPƐƐPƐ

6, 7. Duzu ati a yɛbahola yɛaha kɛ Baebolo ne anu edwɛkɛ ne le ko ɛ?

6 Bɛvale ɛvolɛ mɔɔ bo 1,600 la a bɛhɛlɛle Baebolo ne a. Asolo mekɛ mɔɔ menli mɔɔ hɛlɛle la anu biala dɛnlanle aze a. Ɛnee bie mɔ ze nwoma kpalɛ yɛɛ bie mɔ noko ɛnle zɔ. Kɛ neazo la, ɛnee ko le dɔketa. Ɛnee bie mɔ noko le ɛyazovoma, fɛlɛkyevoma, mboaneneavolɛma, ngapezoma, ndɛnebuavolɛma yɛɛ arelemgbunli. Ɔwɔ nuhua kɛ menli ngakyile a hɛlɛle Baebolo ne a, noko nuhua edwɛkɛ ne amuala le ko. Bɛnga edwɛkɛ ko wɔ tile ko anu na bɛaha ye ngakyile wɔ tile fofolɛ nu. *

7 Baebolo ne anu buluku mɔɔ limoa la maa yɛnwu kɛzi ewiade ye anu ngyegyelɛ bɔle ɔ bo la, yɛɛ buluku mɔɔ li awieleɛ la ka kɛzi Nyamenle bali zɔhane ngyegyelɛ ne mɔ anwo gyima na yeamaa azɛlɛ ye ayɛ paladaese la anwo edwɛkɛ. Baebolo ne ka ninyɛne mɔɔ sisile alesama ɛbɛlabɔlɛ nu ɛvolɛ apenle dɔɔnwo la anwo edwɛkɛ, na ɔmaa yɛnwu kɛ Nyamenle di ye bodane nwo gyima dahuu.

8. Maa neazo mɔɔ kile kɛ abɔdeɛ nwo nrɛlɛbɛ nwo edwɛkɛ mɔɔ wɔ Baebolo ne anu la le nɔhalɛ la.

8 Baebolo ne ɛnle abɔdeɛ nwo nrɛlɛbɛ buluku anzɛɛ buluku mɔɔ bɛsukoa ye wɔ sukulu a, noko abɔdeɛ nwo nrɛlɛbɛ nwo edwɛkɛ mɔɔ ɔka la le nɔhalɛ. Zɔhane ala a yɛ nye la kɛ buluku mɔɔ vi Nyamenle ɛkɛ la bayɛ a. Kɛ neazo la, Nyamenle adehilelɛ mɔɔ fale kɛzi Yizilayɛma bahola azi ewule bie adenle na yeansalo la anwo edwɛkɛ wɔ Lɛvitikɔso buluku ne anu. Bɛhɛlɛle edwɛkɛ ɛhye la, ɔhyɛle kpalɛ na menli anwu kɛ ngɛkɛba bie mɔ  wɔ ɛkɛ mɔɔ bɛmaa yɛ ewule a. Eza Baebolo ne kilehile nu wienyi kɛ azɛlɛ ne henda mɔɔ debie biala ɛnlɛ nu a. (Dwobu 26:7) Na mekɛ mɔɔ ɛnee menli dɔɔnwo die di kɛ azɛlɛ ne le ɛdɛbaa la, Baebolo ne hanle kɛ ɔle kutukpunli.​—Ayezaya 40:22.

9. Duzu a nɔhalɛ mɔɔ Baebolo kɛlɛvoma hanle la maa yɛnwu ye wɔ Baebolo ne anwo a?

9 Saa Baebolo ne ka tetedwɛkɛ nwo edwɛkɛ a, ɔka ye nɔhalɛ fɔɔnwo. Noko tetedwɛkɛ mbuluku dɔɔnwo anu edwɛkɛ ɛnle nɔhalɛ ɔluakɛ menli mɔɔ kɛlɛ la ɛnga nɔhalɛ. Kɛ neazo la, saa bɛ maanle ne kɔ konle na bɛanli konim a, bɛnga nwolɛ edwɛkɛ. Noko Baebolo kɛlɛvoma ne hanle nɔhalɛ wɔ mekɛ mɔɔ Yizilayɛma anli konim bɔbɔ la. Eza bɛhɛlɛle nvonleɛ mɔɔ bɛdabɛ mumua ne bɛyɛle la. Kɛ neazo la, Mosisi hɛlɛle ye wɔ Nɔmbɛse buluku ne anu kɛ ɔyɛle nvonleɛ kpole bie na Nyamenle deanle ye wɔ nwolɛ. (Nɔmbɛse 20:2-12) Nɔhalɛ mɔɔ Baebolo kɛlɛvoma hanle la kile kɛ Baebolo ne vi Nyamenle ɛkɛ. Ɛhye kile kɛ yɛbahola yɛalie Baebolo ne yeali.

BULUKU MƆƆ FOLƐDULƐ KPALƐ WƆ NU

10. Duzu ati a Baebolo ne anu folɛdulɛ boa yɛ ɛnɛ a?

10 Baebolo ne “vi Nyamenle sunsum nu, na ɔle kpalɛ ɔmaa ngilehilelɛ, bɛ nyunlu ɛhwilɛ, ninyɛne ɛdenrɛdenrɛlɛ.” (2 Timote 3:16) Nɔhalɛ nu, Baebolo ne anu folɛdulɛ boa yɛ ɛnɛ. Gyihova ze kɛzi ɔbɔle yɛ a, ɔti ɔte kɛzi yɛdwenle yɛɛ kɛzi yɛte nganeɛ la abo. Ɔze yɛ ɔtɛla kɛzi yɛdayɛ mumua ne yɛze yɛ nwo la yɛɛ ɔkpondɛ kɛ yɛ nye die. Ɔze mɔɔ le kpalɛ maa yɛ nee mɔɔ ɛnle kpalɛ ɛmmaa yɛ la.

11, 12. (a) Folɛ kpalɛ boni a Gyisɛse dule wɔ Mateyu tile 5 kɔdwu 7 a? (b) Duzu bieko a yɛbahola yɛazukoa yɛavi Baebolo ne anu a?

11 Yɛkenga folɛ kpalɛ mɔɔ Gyisɛse dule mɔɔ fale kɛ  ɔkɛyɛ na yɛ nye alie, kɛzi ɔwɔ kɛ yɛ nee awie mɔ tɛnla, kɛzi ɔwɔ kɛ yɛyɛ asɔne nee kɛzi ɔwɔ kɛ yɛbu ezukoa la anwo edwɛkɛ wɔ Mateyu tile 5 kɔdwu 7. Ɔnva nwo kɛ ɔvale folɛdulɛ ɛhye ɔmaanle la ɛvolɛ kɛyɛ 2,000 ɛpɛ nu la, tumi tɛbɔ nu yɛɛ ɔboa yɛ ɛnɛ.

12 Eza Gyihova kilehile yɛ ngyinlazo mɔɔ boa yɛ maa yɛ abusua asetɛnla yɛ kpalɛ, yɛyɛ gyimayɛvoma kpalɛ na yɛ nee awie mɔ tɛnla anzodwolɛ nu la wɔ Baebolo ne anu. Baebolo ngyinlazo boa yɛ dahuu ɔnva nwo menli holɛ ko mɔɔ yɛde, ɛleka mɔɔ yɛwɔ anzɛɛ ngyegyelɛ mɔɔ yɛlɛyia la.​—Kenga Ayezaya 48:17; nea Awieleɛdwɛkɛ 3.

ƐBAHOLA WƆALIE BAEBOLO NGAPEZO WƆALI

Baebolo kɛlɛvolɛ Ayezaya hanle dole ɛkɛ ne kɛ bɛbazɛkye Babelɔn

13. Edwɛkɛ boni a Ayezaya hanle kɛ ɔbado suakpole Babelɔn a?

13 Baebolo ne anu ngapezo dɔɔnwo ɛra nu dɛba. Kɛ neazo la, Ayezaya hanle dole ɛkɛ ne kɛ bɛbazɛkye Babelɔn. (Ayezaya 13:19) Ɔhilele adenle fɔɔnwo mɔɔ bɛbalua zo bɛazɛkye suakpole ne la. Ɛnee suakpole ne lɛ nlenkɛ mgbole yɛɛ azule la nwolɛ mɔɔ bɔ nwolɛ bane a. Noko Ayezaya hanle kɛ azule ne basesa yɛɛ bɛbabuke ye nlenkɛ ne mɔ bɛagua nwolɛ. Menli mɔɔ bava sua ne la bahɔ sua ne azo mɔɔ bɛnrɛho a. Ayezaya hanle dole ɛkɛ ne bɔbɔ kɛ nrenyia bie mɔɔ bɛfɛlɛ ye Saelɛse la a bazɛkye Babelɔn a.​—Kenga Ayezaya 44:27–45:2; nea Awieleɛdwɛkɛ 4.

14, 15. Kɛzi Ayezaya ngapezo ne rale nu ɛ?

14 Bɛhɛlɛle ngapezo ne la, ye ɛvolɛ ɛya nwiɔ anzi, sogyama bie rale Babelɔn anwo zo. Nwane a ɛnee li bɛ nyunlu a? Kɛ mɔɔ ngapezo ne hanle ala la, ɛnee Saelɛse, Pɛhyea belemgbunli ne, a li bɛ nyunlu a. Ɛnee debie biala kile kɛ mekɛ ɛdwu kɛ ngapezo ne mɔɔ ɛha la ba nu.

15 Nɔe ne mɔɔ Saelɛse rale bɛ nwo zo la, ɛnee  Babelɔnoma ɛlɛto ɛkponle. Ɛnee bɛsuzu kɛ bɛlɛ banebɔlɛ ɔlua bɛ bane ndendenle ne nee azule ne ati. Saelɛse nee ye sogyama ne noko yele gota kpole wɔ bane ne anzi maanle azule ne zenle vale nu. Azule ne sesanle mɔɔ ɛnee Pɛhyea sogyama kola wudwu pɛ a. Noko kɛ ɔkɛyɛ na sogyama ne avo Babelɔn bane ne ɛ? Kɛ mɔɔ ngapezo  ne hanle la, bɛgyakyile suakpole ne nlenkɛ ne mɔ bɛguale nwolɛ, yemɔti sogyama ne vale sua ne mɔɔ bɛango a.

16. (a) Duzu edwɛkɛ a Ayezaya hanle ye wɔ Babelɔn anwo a? (b) Kɛzi yɛkola yɛnwu kɛ Ayezaya ngapezo ne rale nu ɛ?

16 Ayezaya hanle dole ɛkɛ ne kɛ awie ɛnrɛdɛnla Babelɔn azo bieko. Ɔhɛlɛle kɛ: “Awie ɛnrɛdɛnla zolɛ bieko, yɛɛ ɔnrɛyɛ ɛleka mɔɔ bɛbadɛnla wɔ awolɛndoazo kɔsɔɔti anu.” (Ayezaya 13:20) Asoo ɔrale nu zɔ? Saa ɛkɔ Iraq suakpole Baghdad nyiakɛ a, ɛbanwu ɛleka mɔɔ ɛnee Babelɔn wɔ mɔɔ yeyɛ suadu la, ɔvi Baghdad mɔɔ kɔ ɛkɛ la bayɛ mayɛlɛ 50. Ɛnɛ bɔbɔ, awie biala ɛnde ɛkɛ. Gyihova vale “ɛzɛkyelɛ sane” kpoanle Babelɔn hɔguale.​—Ayezaya 14:22, 23. *

Babelɔn mɔɔ ɛyɛ suadu la

17. Duzu ati a yɛbahola yɛalie Nyamenle ɛwɔkɛ kɔsɔɔti yɛali a?

17 Kɛmɔ Baebolo ngapezo dɔɔnwo ɛra nu la ati, yɛbahola yɛalie mɔɔ Baebolo ne ka fale kenle bie anwo la yɛali. Yɛbahola yɛanyia anwodozo bɔkɔɔ kɛ Gyihova  bali ɛwɔkɛ mɔɔ yebɔ kɛ ɔbayɛ azɛlɛ ye paladaese la azo. (Kenga Nɔmbɛse 23:19.) Nɔhalɛ nu, yɛlɛ anyelazo kɛ yɛbanyia “dahuu ngoane ne mɔɔ Nyamenle mɔɔ ɔngola ɔmbɔ adalɛ la vale bɔle ɛwɔkɛ mekɛ tendenle la.”​—Taetɛse 1:2. *

BAEBOLO NE BAHOLA AHAKYI WƆ ƐBƐLABƆLƐ

18. Duzu a Pɔɔlo hanle ye wɔ “Nyamenle Edwɛkɛ” ne anwo a?

18 Yɛnwu kɛ buluku gyɛne biala nee Baebolo ne ɛnzɛ. Nuhua edwɛkɛ ne le ko yɛɛ saa ɔka abɔdeɛ nwo nrɛlɛbɛ anzɛɛ tetedwɛkɛ nwo edwɛkɛ a, ɔle nɔhalɛ. Ɔtu yɛ folɛ kpalɛ yɛɛ nuhua ngapezo dɔɔnwo ɛra nu dɛbadɛba. Noko Baebolo ne yɛ mɔɔ tɛla zɔ a. Ɛzoanvolɛ Pɔɔlo hɛlɛle kɛ: “Nyamenle edwɛkɛ ne de ngoane nu yɛɛ tumi wɔ nu.” Duzu a ɛhye kile a?​—Kenga Hibuluma 4:12.

19, 20. (a) Kɛzi Baebolo ne bahola aboa wɔ yeamaa wɔanwu kɛzi ɛde la ɛ? (b) Kɛ ɔkɛyɛ na wɔahile Baebolo ne mɔɔ bɛva bɛhyɛ yɛ la anwo anyezɔlɛ ɛ?

19 Baebolo ne bahola ahakyi wɔ ɛbɛlabɔlɛ. Ɔbahola yeaboa wɔ yeamaa wɔanwu kɛzi ɛdawɔ mumua ne ɛde la. Ɔbahola yeaboa wɔ yeamaa wɔade kɛzi ɛdwenle nee kɛzi ɛte nganeɛ la abo kpalɛ. Kɛ neazo la, bie a yɛdwenle kɛ yɛkulo Nyamenle. Noko amaa yɛahile kɛ yɛkulo ye la, ɔwɔ kɛ yɛdi mɔɔ Baebolo ne ka la azo.

20 Baebolo ne vi Nyamenle ɛkɛ amgba. Ɔkulo kɛ ɛkenga, ɛsukoa na ɛ nye die nwo. Kile ahyɛlɛdeɛ ɛhye anwo anyezɔlɛ na sukoa ye dahuu. Na ɔbamaa wɔade bodane mɔɔ Nyamenle lɛ maa alesama la abo. Yɛbazukoa bodane ɛhye anwo ninyɛne dɔɔnwo wɔ tile bieko anu.

^ ɛden. 6 Bie mɔ se Baebolo ne anu edwɛkɛ ɛnle ko, noko ɔnle nɔhalɛ. Nea The Bible​—God’s Word or Man’s? buluku ne mɔɔ Gyihova Alasevolɛ ɛyɛ la tile 7.

^ ɛden. 16 Saa ɛkulo kɛ ɛsukoa Baebolo ngapezo nwo edwɛkɛ dɔɔnwo a, ɛbahola wɔagenga A Book for All People brohyua ne mɔɔ Gyihova Alasevolɛ ɛyɛ la mukelɛ 27-29.

^ ɛden. 17 Babelɔn ɛzɛkyelɛ ne le Baebolo ngapezo mɔɔ ɛra nu la anu kokye ala. Ɛbahola wɔanwu ngapezo mɔɔ fale Gyisɛse Kelaese anwo la wɔ Awieleɛdwɛkɛ 5 anu.