Wulu kɔ nuhua edwɛkɛ ne azo

Wulu kɔ nuninyɛne ne azo

 TILE NSA

Bodane Boni A Nyamenle Lɛ Maa Alesama A?

Bodane Boni A Nyamenle Lɛ Maa Alesama A?

1. Bodane boni a Nyamenle lɛ maa alesama a?

NYAMENLE lɛ bodane kpalɛ maa alesama. Ɔbɔle nrenyia nee raalɛ mɔɔ limoa, Adam nee Yive ɔguale tola kɛnlɛma bie anu. Ɛnee ye bodane a le kɛ bɛbawo mralɛ, bɛamaa azɛlɛ ye amuala ayɛ paladaese na bɛanlea nane ne mɔ anwo zo.​—Gyɛnɛsese 1:28; 2:8, 9, 15 nea Awieleɛdwɛkɛ 6.

2. (a) Kɛzi yɛkola yɛnwu kɛ Nyamenle bayɛ mɔɔ yebɔ nwolɛ kpɔkɛ la ɛ? (b) Nwane mɔ a Baebolo ne ka kɛ bɛbadɛnla aze dahuu a?

2 Asoo wɔdwenle nwo ɛlɛ kɛ yɛbadɛnla paladaese dahuu ɔ? Gyihova se “Mebɔ nwolɛ kpɔkɛ, yɛɛ mebayɛ noko.” (Ayezaya 46:9-11; 55:11) Ɛhɛe, ɔbayɛ mɔɔ yebɔ nwolɛ kpɔkɛ la, na debie biala ɛnrɛzi ye adenle. Gyihova se bodane bie ati a ɔbɔle azɛlɛ ye a. “Yeambɔ ye mgbane.” (Ayezaya 45:18) Ɔkpondɛ kɛ menli tɛnla azɛlɛ ye azo ɛleka biala. Menli boni a Nyamenle kpondɛ kɛ bɛtɛnla azɛlɛ ye azo a, na mekɛ tendenle nyɛ a ɔkulo kɛ bɛtɛnla zolɛ a? Baebolo ne ka kɛ: “Tenlenema [anzɛɛ, menli mɔɔ yɛ tieyɛ la] banyia azɛlɛ ne, na bɛadɛnla zolɛ dahuu.”​Edwɛne 37:29; Yekile 21:3, 4.

3. Kɛmɔ menli nwo to bɛ na bɛwu la ati, duzu edwɛkɛ a ɛbahola wɔabiza a?

3 Noko ɛnɛ, menli nwo to bɛ na bɛwu. Bɛko na bɛkuhu bɛ nwo wɔ ɛleka ngakyile. Nɔhalɛ nu, tɛ mɔɔ Nyamenle kpondɛ la ɛne. Ɔti duzu a zile a, na kɛmɔti ɛ? Baebolo ne ala a kola kilehile nu a.

 NYAMENLE KPƆVOLƐ BIE

4, 5. (a) Nwane a luale ɛwɔlɛ nwo zo dendɛle hilele Yive wɔ Yidɛn tola ne anu a? (b) Kɛzi awie mɔɔ di nɔhalɛ la kola yɛ awule ɛ?

4 Baebolo ne maa yɛnwu kɛ Nyamenle lɛ kpɔvolɛ bie mɔɔ “bɛfɛlɛ ye Abɔnsam anzɛɛ Seetan” la. Seetan luale ɛwɔlɛ nwo zo dendɛle hilele Yive wɔ Yidɛn tola ne anu. (Yekile 12:9; Gyɛnɛsese 3:1) Ɔmaanle ɔyɛle kɛ asɛɛ ɛwɔlɛ ne a ɛlɛtendɛ a.​—Nea Awieleɛdwɛkɛ 7.

5 Ɔti asoo Nyamenle a bɔle Seetan Abɔnsam a? Kyɛkyɛ! Anwumabɔvolɛ bie mɔɔ ɛnee wɔ anwuma wɔ mekɛ mɔɔ Nyamenle ɛlɛsiezie azɛlɛ ne amaa Adam nee Yive la a hakyile na ɔyɛle ɔ nwo Abɔnsam a. (Dwobu 38:4, 7) Kɛzi ɔholale ɔrale ye zɔ ɛ? Kɛzi awie mɔɔ di nɔhalɛ la kola kakyi na ɔyɛ awule ɛ? Bɛanwo ye awule. Noko ɔkola ɔkpondɛ anzɛɛ ɔkulo debie mɔɔ ɛnle ye ɛdeɛ la. Saa ɔkɔ zo ɔdwenledwenle nwo a, ye atiakunluwɔzo ɛtane ne bayɛ kpole. Akee saa ɔnyia adenle a, ɔwua deɛ ne. Yeyɛ awule ala ɛne.​—Kenga Gyemise 1:13-15; nea Awieleɛdwɛkɛ 8.

6. Kɛzi anwumabɔvolɛ bie rayɛle Nyamenle kpɔvolɛ ɛ?

6 Ɛhye bie a dole anwumabɔvolɛ zɔhane a. Mɔɔ Gyihova bɔle Adam nee Yive la, ɔhanle ɔhilele bɛ kɛ bɛwo mralɛ na “bɛyi azɛlɛ ne.” (Gyɛnɛsese 1:27, 28) Bie a anwumabɔvolɛ zɔhane nyianle adwenle kɛ, ‘Ɔwɔ kɛ menli ɛhye mɔ amuala sonle me, na tɛ Gyihova ɔ!’ Mekɛ mɔɔ ɔhɔle zo ɔdwenledwenlenle ɛhye anwo la, ɔ nye bolole debie mɔɔ le Gyihova ɛdeɛ la kpole. Ɛnee anwumabɔvolɛ zɔhane kulo kɛ menli sonle ye. Yemɔti ɔbɔle adalɛ ɔhilele Yive na ɔbɛlɛbɛlale ye. (Kenga Gyɛnɛsese 3:1-5.) Zɔhane mɔɔ ɔyɛle la maanle ɔrayɛle Seetan Abɔnsam, na ɔyɛle Nyamenle kpɔvolɛ.

7. (a) Duzu ati a Adam nee Yive wule a? (b) Duzu ati a yɛyɛ mgbanyinli na yɛwu a?

 7 Adam nee Yive andie Nyamenle na bɛlile bakama ne. (Gyɛnɛsese 2:17; 3:6) Bɛyɛle ɛtane bɛtiale Gyihova na nzinlii bɛwule, kɛ mɔɔ Gyihova hanle la. (Gyɛnɛsese 3:17-19) Adam nee Yive amra ne mɔ noko yɛle ɛtanevolɛma, yemɔti bɛwule. (Kenga Wulomuma 5:12.) Amaa yɛade deɛmɔti Adam nee Yive amra ne mɔ noko yɛle ɛtanevolɛma abo la, suzu neazo ɛhye anwo. Fa ye kɛ ɛlɛto paano wɔ kyɛnze mɔɔ ɛbondo la anu. Saa ɛto paano ne ɛwie a, nwolɛ babondo kɛ kyɛnze ne ala la. Mɔɔ Adam andie Nyamenle la, ɔrayɛle ɛtanevolɛ. Kɛmɔ yɛle Adam amra la ati, yɛ muala yɛle ɛtanevolɛma anzɛɛ “yɛbondo” kɛ ɔdaye la. Na kɛmɔ yɛ muala yɛle ɛtanevolɛma la ati, yɛyɛ mgbanyinli na yɛwu.​—Wulomuma 3:23; nea Awieleɛdwɛkɛ 9.

8, 9. (a) Duzu a ɛnee Seetan kpondɛ kɛ Adam nee Yive die di a? (b) Kɛmɔti a Gyihova angu atuadelɛma ne ɛkɛ ne ala ɛ?

8 Mɔɔ Seetan maanle Adam nee Yive yɛle Nyamenle anwo anzosesebɛ la, ɛnee ɔlɛmaa bɛabɔ ɔ bo bɛade Gyihova anwo atua. Ɛnee ɔkpondɛ kɛ Adam nee Yive die di kɛ Gyihova le adalɛ, ɔle tumivolɛ ɛtane mɔɔ ɔmkpondɛ bɛ boɛ a. Ɛnee Seetan ɛlɛka kɛ ɔngyia kɛ Nyamenle baha mɔɔ ɔwɔ kɛ alesama yɛ la kile bɛ, na ɔwɔ kɛ Adam nee Yive si bɛ ti anwo kpɔkɛ wɔ mɔɔ le kpalɛ nee ɛtane la anwo. Ɔti ɛnee duzu a Gyihova bayɛ a? Anrɛɛ ɔbahola yeahu atuadelɛma ne na yeapɛ atuadelɛ ne azo. Noko asoo anrɛɛ yemɔ bamaa yɛanwu kɛ Seetan le adalɛ ɔ? Kyɛkyɛ.

9 Ɛhye ati, Gyihova angu atuadelɛma ne ɛkɛ ne ala. Emomu, ɔmaanle alesama mekɛ kɛ bɛnlea bɛ nwo zo. Ɛhye bamaa yeala ali wienyi kɛ Seetan le adalɛ na Gyihova a ze mɔɔ le kpalɛ maa alesama a. Yɛbazukoa ɛhye  anwo edwɛkɛ dɔɔnwo wɔ Tile 11 ne anu. Noko kɛzi ɛnwu Adam nee Yive kpɔkɛzilɛ ne ɛ? Asoo ɛnee ɔle kpalɛ kɛ bɛbalie Seetan bɛali na bɛayɛ Nyamenle anwo anzosesebɛ ɔ? Gyihova a vale debie biala mɔɔ Adam nee Yive lɛ la maanle bɛ a. Ɔmaanle bɛ ngoane mɔɔ di munli, awuke kɛnlɛma, nee gyima mɔɔ yɛ ahunlundwolɛ la. Noko ɛnee Seetan ɛtɛyɛle debie kpalɛ biala ɛtɛmaanle bɛ. Saa ɛwɔ ɛkɛ ne bie a, anrɛɛ duzu a ɛbayɛ a?

10. Kpɔkɛ mɔɔ hyia la boni a ɔwɔ kɛ yɛ nuhua ko biala si a?

 10 Ɔwɔ kɛ yɛ nuhua ko biala si kpɔkɛ ɛnɛ, na yɛ ngoane gyi kpɔkɛzilɛ zɔhane azo. Yɛbahola yɛazi kpɔkɛ kɛ yɛbadie Gyihova kɛ yɛ Belemgbunli na yɛahile kɛ Seetan le adalɛ. Anzɛɛ yɛbahola yɛakpa Seetan kɛ yɛ belemgbunli. (Edwɛne 73:28; kenga Mrɛlɛbulɛ 27:11.) Ewiade ye anu menli ekyi bie ala a tie Nyamenle a. Nɔhalɛ nu, tɛ Nyamenle a nea ewiade ne azo a. Noko saa tɛ ɔdaye a, ɛnee nwane ɔ?

NWANE A NEA EWIADE NE AZO A?

Saa ewiade arelemgbunlililɛ kɔsɔɔti ɛnle Seetan ɛdeɛ a, asoo anrɛɛ ɔbava yeabɔ Gyisɛse ɛwɔkɛ?

11, 12. (a) Duzu a ninyɛne mɔɔ Seetan hanle kɛ ɔbava yeamaa Gyisɛse la maa yɛnwu ye a? (b) Ngɛlɛlera boni mɔ a maa ɔda ali kɛ Seetan a nea ewiade ne azo a?

11 Ɛnee Gyisɛse ze ahenle mɔɔ amgba nea ewiade ne azo la. Mekɛ bie, Seetan vale ‘ewiade arelemgbunlililɛ kɔsɔɔti nee nuhua anyunlunyia hilele ye.’ Akee ɔbɔle Gyisɛse ɛwɔkɛ kɛ: “Saa ɛkoto [anzɛɛ, ɛbɔ ɛ ti aze] ɛsonle me kokye ala a, mebava ninyɛne ɛhye mɔ amuala meamaa wɔ.” (Mateyu 4:8, 9; Luku 4:5, 6) Biza ɛ nwo kɛ, ‘Saa arelemgbunlililɛ ɛhye mɔ ɛnle Seetan ɛdeɛ a, anrɛɛ ɔbahola yeava yeabɔ Gyisɛse ɛwɔkɛ ɔ?’ Kyɛkyɛ. Arane ne mɔ kɔsɔɔti le Seetan ɛdeɛ.

12 Bie a ɛbabiza kɛ: ‘Kɛ ɔyɛle mɔɔ Seetan a nea ewiade ne azo a? Asoo Tɛ Gyihova a le Nyamenle Tumivolɛ Bedevinli ne mɔɔ bɔle aleɛabo amuala la ɔ?’ (Yekile 4:11) Ɛhɛe, ɔdaye ɔ, noko Gyisɛse hanle kɛ Seetan a “nea ewiade ɛhye azo” a. (Dwɔn 12:31; 14:30; 16:11) Ɛzoanvolɛ Pɔɔlo vɛlɛle Seetan Abɔnsam “ewiade ɛhye nyamenle ne.” (2 Kɔlentema 4:3, 4) Eza ɛzoanvolɛ Dwɔn hɛlɛle kɛ “ewiade ye amuala wɔ amumuyɛnli ne tumi bo.”​—1 Dwɔn 5:19.

 KƐZI BƐBAZƐKYE SEETAN EWIADE NE Ɛ?

13. Duzu ati a yɛhyia ewiade fofolɛ a?

13 Ewiade ɛhye anu ɛlɛyɛ ɛzulolɛ kpalɛ. Yɛte kɛ konle, nzisi, adalɛbɔlɛ nee basabasayɛlɛ ɛlɛkɔ zo wɔ ɛleka biala. Ɔnva nwo mɔdenle biala mɔɔ alesama babɔ la, bɛnrɛhola bɛnrɛye ngyegyelɛ ɛhye mɔ bɛnrɛvi ɛkɛ. Noko ɔnrɛhyɛ Nyamenle bazɛkye ɛtane ewiade ɛhye wɔ ye Amagɛdɔn konle ne anu na yeava tenlene ewiade fofolɛ yeazie ɔ gyakɛ anu.​—Yekile 16:14-16; nea Awieleɛdwɛkɛ 10.

14. Nwane a Nyamenle ɛkpa ye kɛ Ye Belemgbunlililɛ ne azo Belemgbunli a? Gyisɛse anwo edwɛkɛ boni a Baebolo ne hanle dole ɛkɛ a?

14 Gyihova ɛkpa Gyisɛse Kelaese kɛ Ye anwuma arane ne anzɛɛ Belemgbunlililɛ ne azo Belemgbunli. Ɛvolɛ apenle dɔɔnwo mɔɔ ɛpɛ nu la anu, Baebolo ne hanle dole ɛkɛ ne kɛ Gyisɛse bali tumi kɛ “Anzodwolɛ Belemgbunli” na ye belemgbunlililɛ ne ɛnrɛra awieleɛ ɛlɛ. (Ayezaya 9:6, 7) Gyisɛse hilehilele ye ɛdoavolɛma ne kɛ bɛzɛlɛ bɛmaa arane ɛhye ɛrɛla wɔ mekɛ mɔɔ ɔhanle kɛ: “Wɔ Belemgbunlililɛ ɛrɛla. Wɔ ɛhulolɛdeɛ ɛyɛ ɛkɛ wɔ azɛlɛ ye azo kɛ anwuma la.” (Mateyu 6:10) Yɛbazukoa kɛzi Nyamenle Belemgbunlililɛ ne baye ewiade arane ne mɔ avi ɛkɛ la wɔ Tile 8 ne anu. (Kenga Daneɛle 2:44.) Akee Nyamenle Belemgbunlililɛ ne bamaa azɛlɛ ye ayɛ paladaese kɛnlɛma.​—Nea Awieleɛdwɛkɛ 11.

EWIADE FOFOLƐ ƐBIKYE!

15. Duzu a “azɛlɛ fofolɛ” ne kile a?

15 Baebolo ne bɔ ɛwɔkɛ kɛ: “Yɛlɛkendɛ anwuma fofolɛ nee azɛlɛ fofolɛ, na ɛhye mɔ anu a tenleneyɛlɛ badɛnla a.” (2 Pita 3:13; Ayezaya 65:17). Ɔdwu mekɛ ne bie na Baebolo ne ka “azɛlɛ ne” anwo edwɛkɛ a, ɔkile menli mɔɔ de azɛlɛ ne azo la. (Gyɛnɛsese 11:1, ɔbdw) Ɔti tenlene  “azɛlɛ fofolɛ” ne kile menli kɔsɔɔti mɔɔ tie Nyamenle na yeyila bɛ la.

16. Ahyɛlɛdeɛ kɛnlɛma boni a Nyamenle bava amaa menli mɔɔ badɛnla ye ewiade fofolɛ ne anu la ɛ, na duzu a ɔwɔ kɛ yɛyɛ na yɛanyia ahyɛlɛdeɛ ɛhye a?

16 Gyisɛse bɔle ɛwɔkɛ kɛ menli mɔɔ badɛnla Nyamenle ewiade fofolɛ ne anu la banyia “dahuu ngoane.” (Maake 10:30) Duzu a ɔwɔ kɛ yɛyɛ na yɛanyia ahyɛlɛdeɛ ɛhye a? Yɛsɛlɛ wɔ, kenga mualɛ ne wɔ Dwɔn 3:16 nee 17:3. Akee maa yɛnlea mɔɔ Baebolo ne ka kɛ asetɛnla bayɛ wɔ Paladaese la.

17, 18. Kɛzi yɛkola yɛnwu kɛ anzodwolɛ bara ɛleka biala yɛɛ yɛbanyia anwobanebɔlɛ ɛ?

17 Amumuyɛyɛlɛ, konle, ɛtanelilɛ nee basabasayɛlɛ bavi ɛkɛ. Amumuyɛnli biala ɛnrɛha azɛlɛ ye azo. (Edwɛne 37:10, 11) Nyamenle ‘bamaa bɛagyakyi konle wɔ azɛlɛ ye kɔsɔɔti azo.’ (Edwɛne 46:9; Ayezaya 2:4) Menli mɔɔ kulo Nyamenle na bɛtie ye la bayi azɛlɛ ye tɛkɛɛ. Anzodwolɛ badɛnla ɛkɛ dahuu.​—Edwɛne 72:7.

18 Gyihova menli banyia banebɔlɛ. Mɔɔ Yizilayɛma diele Nyamenle wɔ tete ne la, bɛanzulo ɛhwee ɔluakɛ ɔbɔle bɛ nwo bane. (Lɛvitikɔso 25:18, 19) Wɔ Paladaese, yɛnrɛzulo awie anzɛɛ debie biala. Yɛbanyia anwobanebɔlɛ dahuu!​—Kenga Ayezaya 32:18; Maeka 4:4.

19. Duzu a maa yɛdie yɛdi kɛ aleɛ babu wɔ Nyamenle ewiade fofolɛ ne anu a?

19 Aleɛ babu. “Aleɛ babu azɛlɛ ne azo; ɔbabu awoka ne mɔ azo.” (Edwɛne 72:16) Gyihova “yɛ Nyamenle ne bayila yɛ,” na “azɛlɛ ne bazo ye ma.”​—Edwɛne 67:6.

20. Kɛzi yɛkola yɛnwu kɛ azɛlɛ ye bayɛ paladaese ɛ?

20 Azɛlɛ ye amuala bayɛ paladaese. Menli banyia azua nee tola ngɛnlɛma. (Kenga Ayezaya 65:21-24; Yekile 11:18.) Ewiade amuala bayɛ kɛnlɛma kɛ mɔɔ ɛnee  Yidɛn tola ne de la. Gyihova bamaa yɛ sa aha debie biala mɔɔ yɛhyia la dahuu. Baebolo ne ka ɔ nwo edwɛkɛ kɛ: “Ɛbuke ɛ sa nu na ɛmaa tease abɔdeɛ biala nyia mɔɔ ɔkulo la.”​—Edwɛne 145:16.

21. Kɛzi yɛkola yɛnwu kɛ anzodwolɛ bara menli nee nane avinli ɛ?

21 Anzodwolɛ bara menli nee nane avinli. Nane ɛnrɛboda menli bieko. Saa ngakula ngyikyi wɔ nane nane mɔɔ anwo yɛ ɛzulolɛ ɛnɛ la bɔbɔ anwo ɛkɛ a, bɛnrɛyɛ bɛ ɛhwee.​—Kenga Ayezaya 11:6-9; 65:25.

22. Duzu a Gyisɛse bayɛ amaa menli mɔɔ ɛnde kpɔkɛ la ɛ?

22 Awie biala anwo ɛnrɛdo ye. Mɔɔ Gyisɛse wɔ azɛlɛ ye azo la, ɔyɛle menli dɔɔnwo ayile. (Mateyu 9:35; Maake 1:40-42; Dwɔn 5:5-9) Noko kɛmɔ ɔle Nyamenle Belemgbunlililɛ ne azo Belemgbunli la ati, Gyisɛse bayɛ awie biala ayile. Awie biala ɛnrɛha ye ɛlɛ kɛ: “Me nwo ɛdo me.”​—Ayezaya 33:24; 35:5, 6.

23. Duzu a Nyamenle bayɛ amaa menli mɔɔ ɛwu la ɛ?

23 Mowuamra badɛnla ngoane nu bieko. Nyamenle ɛbɔ ɛwɔkɛ kɛ ɔbadwazo menli mgbe dɔɔnwo mɔɔ ɛwu la. “Bɛbadwazo tenlenema nee bɛdabɛ mɔɔ bɛnle tenlenema la bɛavi ewule nu.”​—Kenga Dwɔn 5:28, 29; Gyima ne 24:15.

24. Kɛzi Paladaese mɔɔ ɛbadɛnla la maa ɛte nganeɛ ɛ?

24 Ɔwɔ kɛ yɛ muala yɛsi kpɔkɛ. Yɛ nuhua ko biala bahola akpa kɛ ɔbazukoa Gyihova anwo debie na yeazonle ye, anzɛɛ ɔbayɛ mɔɔ ɔdaye ɔkulo la. Saa yɛsi kpɔkɛ kɛ yɛbazonle Gyihova a, yɛ nye balie kenle bie. Mekɛ mɔɔ nrenyia bie mɔɔ ɛlɛwu la hanle kɛ Gyisɛse ɛhakye ye la, Gyisɛse bɔle ye ɛwɔkɛ kɛ: “Ɛbaboka me nwo wɔ Paladaese.” (Luku 23:43) Bɛmaa yɛzukoa Gyisɛse Kelaese nee kɛzi ɔbamaa Nyamenle ɛwɔkɛ ngɛnlɛma ne mɔ ara nu la anwo ninyɛne dɔɔnwo.